O BNG demanda da Xunta de Galiza a organización dun concerto do Xacobeo 2010 en Santa Cristina

A Xunta de Feijóo está a programar diversos concertos enmarcados no Xacobeo, entre eles o da MTV, e Oleiros segue sen aparecer como concello onde se programe un concerto do Xacobeo. Oleiros está, por tanto, excluído por parte da Xunta dos concertos do Xacobeo deste ano.

O BNG de Oleiros apresentou unha iniciativa no seu día no Parlamento de Galiza demandando se a Xunta organizaría o grande concerto do Xacobeo 2010 en Santa Cristina do mesmo modo que nos dous xacobeos precedentes, logo de ter sido apresentada a programación do Xacobeo 2010 por parte do goberno da Xunta. A iniciativa do BNG ten a súa orixe no feito de o noso concello ter sido excluído desa programación por parte da Xunta. A pergunta parlamentar realizada no seu día polo BNG non foi respondida aínda pola Xunta, e o noso concello continúa estando excluído dos concertos do Xacobeo.

O concello de Oleiros foi protagonista nos dous últimos xacobeos de dous concertos dos máis multitudinarios da historia de Galiza. O primeiro deles contou con Mike Oldfield, Luar na Lubre e The Corrs, e o segundo dos concertos con Carlinhos Brown e Orishas, entre outros destacados intérpretes. Máis de 100.000 persoas asistiron a cada un dos concertos, segundo estimacións de diferentes fontes, conseguíndose deste xeito que unha grande cantidade de persoas se achegasen ao concello de Oleiros desde diversos puntos da xeografía galega e internacional, cun excelente comportamento do público asistente que foi envexábel para calquera outro concerto de carácter internacional.

O concello de Oleiros e a comarca da Coruña no seu conxunto beneficiáronse dos concertos antes referidos quer na promoción turística quer nos beneficios xerados para a hostelaría. Por este motivo o conxunto da corporación do Concello de Oleiros así como a poboación deste concello non poden nin poderían entender que non se realizase un concerto destas características coa experiencia dos eventos realizados. Téndomos a capacidade para acollermos un grande concerto no noso concello, nomeadamente en Santa Cristina, no verán de 2010, cun elenco de artistas de relevancia tanto de Galiza como internacionais, que garanta unha afluencia masiva de asistentes a este concerto, esta sería unha ocasión que non deberíamos desaproveitar para promocionarmos o turismo quer a nível local e comarcal, quer a nível galego e internacional.

Así as cousas, non se entende, por tanto, que o concello de Oleiros fique marxinado por parte da Xunta como localidade para se desenvolver un grande concerto do Xacobeo 2010. Por todo isto, o BNG demandará de novo cales son as causas de que Oleiros se marxine canto aos concertos do Xacobeo e exixirá un compromiso por parte da Xunta para a realización dun concerto do Xacobeo 2010 no noso concello.

O BNG de Oleiros non coincide co goberno local no expediente da Escola de Música

Onte martes celebrouse unha Comisión Informativa en que se deu conta das conclusións do expediente de investigación do goberno local a respeito da Escola Municipal de Música de Oleiros. O BNG, na demanda de transparencia e do exercicio da legalidade por parte do concello e para que os intereses dos veciños e veciñas estean sempre por diante dos intereses das empresas que prestan os servizos, motivou a apertura dese expediente e con cuxas conclusións difire:

O informe xurídico é substancialmente correcto mais omite o esencial, que é a coincidencia do obxecto social co posto de funcionario. Sendo certo que a prohibición de contratar un funcionario non se extende a calquera Administración dita prohibición si afecta cando exista coincidencia entre o obxecto de prestación de contrato e o seu posto de funcionario, aínda que as Administracións sexan diferentes.

1.- A Escola de Música, aínda sendo de titularidade municipal, depende da Consellaría de Educación (onde prestan servizos os funcionarios), non só respeito da súa creación senón tamén respecto do seu réxime de funcionamento. Así o estabelece a Orde de 11 de marzo de 1993 (de condicións de creación e funcionamento das escolas de música e danza).

2.- Existe relación directa entre a Escola de Música (obxecto de contrato) e os Conservatorios de Música (onde prestan servizos os funcionarios), na medida en que moito alumnado da Escola de Música pode acceder aos Conservatorios.

3.- O Decreto 39/1994, de 17 de febreiro declara de interese público a actividade realizada por funcionarios en escolas de música, aos efectos de aplicación de réxime de incompatibilidades, mais só se dita prestación en ditas Escolas se fai en réxime de contratación laboral, mais non cando, como é o caso, se fai en réxime de contratación administrativa por medio de persoa xurídica interposta.

Conclusión : os exemplos postos pola secretaria-interventora no seu informe non son de aplicación. Neste caso non é que o concello de Oleiros non poida mercar periódicos nun quiosco propriedade do cónxugue dun funcionario da Xunta. Neste caso o fundamental, o trascendente, é que o goberno local adxudicou un contrato para a xestión dunha escola de música a unha empresa propriedade dun funcionario que presta servizos como profesor de música noutra Administración (Consellaría de Educación), si, mais da cal depende educativamente dita Escola de Música e que, ademsis, o proprio funcionario pode ter relación directa co alumnado ao cal a súa empresa impartiu docencia.

*A Empresa concesionaria da xestión da Escola Municipal de Música de Oleiros ten aberto un expediente pola Consellaría de Educación sen resolver.

O BNG de Oleiros xa propuxo hai 8 anos a peonalización da canteira de Perillo

O BNG de Oleiros alégrase de que o goberno local logo de 8 anos da proposta realizada polo BNG feita a través dunha iniciativa para a inclusión no Orzamento Municipal, como tamén en proposta fóra do referido orzamento, para a peonalización do centro histórico de Perillo, finalmente o goberno teña acometido esta peonalización do centro histórico de Perillo, como demandabamos desde hai xa 8 anos.

O BNG de Oleiros congratúlase tamén de que o goberno local teña acometido propostas do BNG como a pista de skate, a oficina estábel de Turismo en Santa Cristina ou que tivese continuado con iniciativas levadas a cabo polo BNG: música na rúa, ordenanza das terrazas, xestión dos pavillóns deportivos, ou as campañas de normalización lingüística.

Agardamos que outras propostas razoábeis e que benefician o conxunto do concello como a rede wi-fi, o servizo de aluguer de bicicletas ou o tanatorio público sexan tamén tidas en conta para a súa execución, mais esperamos que os veciños e veciñas non teñan que agardar 8 anos só para que o alcalde poida presumir da idea e autoría destas iniciativas.

A zona do centro histórico de Perillo, así como outras zonas como o centro histórico de Santa Cruz ou mesmo Xoez en Mera ou outros centros históricos deberían tamén ter unha zona de peonalización e de protección.

O alcalde de Oleiros ofrece á Xunta terreos que non ten

Diante da polémica suscitada polo oferecemento do alcalde de Oleiros á Consellaría de Educación duns terreos que non son propriedade do Concello o BNG quer aclarar o seguinte:

1) Os terreos de que fala o alcalde e que foron oferecidos á Consellaría seguen a ser a día de hoxe propriedade da Fundación Tenreiro.

2) A Consellaría non pode executar a construción de nengún edificio público sen contar coa cesión de terreos municipais por parte do Pleno do Concello tal e como aconteceu por exemplo cos terreos para a construción do Centro de Día nas Galeras, cesión efectuada hai tamén dous anos e cuxa construción se encontra praticamente finalizada. Outros terreos tamén cedidos polo Pleno foron os do Centro de Saúde de Oleiros á Consellaría de Sanidade.

3) O feito de se ofertaren terreos que non son aínda municipais constitúe unha irresponsabilidade do alcalde alén dunha falta de respeito á entidade proprietaria e aos veciños e veciñas de Oleiros, por estar a falar o alcalde de algo que non é certo para eludir a propria irresponsabilidade e incompetencia do goberno local.

4) A Fundación Tenreiro non pode autorizar unha permuta tal e como lle ofereceu o alcalde no seu momento nen unha cesión gratuita sen a preceptiva autorización da Xunta de Galiza ao padroado desta Fundación, polo que en calquer dos supostos quer a Xunta de Galiza, quer o goberno local, máis unha vez volven pecar dun reiterado defeito: a falta de diálogo e de capacidade de negociación polo ben do interese común, neste caso un novo colexio no concello de Oleiros. O goberno local, mentindo e culpabilizando terceiros, e a Xunta de Galiza ao obstruír asuntos tan importantes para o concello como o proprio Plan Xeral.

A lei de caixas, a fusión galega e o futuro da economía de Galiza

Martes 23 de febreiro ás 20:00 horas terá lugar un Acto Público do BNG na Casa Charry de Oleiros que versará sobre a Lei de Caixas, a fusión galega e o futuro da economía de Galiza. Neste acto, que será apresentado por Fina Quintáns, portavoz do BNG no Concello de Oleiros, contaremos coa intervención de Carlos Aymerich, portavoz do BNG no Parlamento de Galiza.

Lei de caixas e fusión galega, defendendo os intereses do país

O BNG tense destacado sempre na defensa da economía galega, mais é agora máis do que nunca cando o BNG reclama de maneira enérxica que Galiza ten dereito a estar dotada dunha autonomía financeira que entre todos e todas debemos demandar.

Por ese motivo, na defensa da autonomía financeira de Galiza, o BNG impulsou no Parlamento de Galiza a Lei de Caixas. Nese sentido, o BNG tamén destacou por ter impulsado desde o seu seo o manifesto “Galiza ten dereito”, asinado en primeiro lugar polo BNG como impulsor da iniciativa e tamén polo Partido Popular, a patronal e os sindicatos de Galiza, e subscrito logo por multitude de entidades do país, que se continúan a sumar a unha iniciativa que reclama que Galiza ten dereito a ter a súa propria autonomía financeira, e a non depender de entidades financeiras doutros territorios ou a decisións político-económicas que lle veñan de fóra.

Polas razóns aducidas o BNG de Oleiros convida toda a militancia do BNG, así como simpatizantes, veciños e veciñas, entidades de todo tipo, asociacións, empresas, así como o resto dos partidos políticos ao acto público sobre a Lei de Caixas, a fusión galega e o futuro da economía de Galiza deste martes 23 ás 20:00 horas na Casa Charry de Oleiros.

O BNG acusa o PP de querer paralizar o futuro de Oleiros

O Partido Popular de Oleiros tenta tirar rédito electoral impedindo a aprobación definitiva do Plan Xeral

Resulta significativo ver como no último Pleno Municipal a maioría dos grupos políticos (Alternativa dos Veciños, PSOE e BNG) apoiaron as rectificacións do goberno para a aprobación definitiva despois de varios anos de Plan Xeral e o PP segue a se posicionar en contra nunha actitude cómplice coa Xunta de Galiza que prexudica gravemente os intereses dos e das oleirenses tanto no presente polo atraso acumulado como para o planeamento futuro do concello.

Oleiros, que vai xa pola terceira revisión do Plan Xeral e que a pesar da actitude belixerante e pouco negociadora do alcalde conseguiu finalizar o documento co apoio de tres dos catro grupos despois dos anos de atraso acumulados, ten que padecer agora a actitude irresponsábel do Partido Popular que pon por diante dos intereses xerais os intereses partidarios por causa dunhas eleccións municipais que non será quen de gañar e que, lonxe de lle reportar un beneficio electoral, contribuirá a ser castigado politicamente polo boicot ao concello.

A Consellaría de Ordenación do Territorio, lonxe tamén de ter unha actitude dialogante co Concello, utiliza a chantaxe e a coacción política nun asunto de vital importancia para a vida dun concello como é o Plan Xeral de Ordenación Municipal. O BNG levará de novo ao Parlamento Galego unha iniciativa instanto a Xunta de Galiza a solucionar dunha vez por todas a aprobación definitiva do PXOM cando o concello accedeu a incluír as modificacións exixidas e o Pleno Municipal aprobou cos votos de todos os partidos políticos, excepto o PP, esas modificacións.

O BNG apresentou hoxe polo Rexistro Municipal 21 medidas para a súa inclusión no Orzamento de 2010

O BNG, continuando co desenvolvemento da súa política responsábel expón ao goberno local unha serie de propostas en 21 puntos para a súa inclusión no Orzamento de 2010 e para o seu correspondente debate.

O goberno local debe facer un esforzo para que no Orzamento deste ano 2010 os investimentos que se realicen teñan relación coa xeración de emprego e o impulso de medidas encamiñadas á mellora da economía no noso concello, e para que se leve a cabo o cumprimento das promesas incumpridas en anteriores anos.

O BNG quere contribuír deste xeito á mellora do Orzamento Municipal de 2010 cunha relación de propostas para seren incluídas no referido documento. Moitas delas non son propostas estrictamente económicas, senón que responden máis á vontade política de levar adiante unha serie de melloras para as cidadás e cidadáns do concello. Por iso, pensamos que deben ser contempladas no Orzamento Municipal de 2010, aínda que sexa con partidas simbólicas como o compromiso escrito e aprobado en pleno de levar adiante este ano unha chea de actuacións que de seguro mellorarán os servizos, os investimentos e outras administracións no concello, e, polo tanto, tamén han mellorar, sen dúbida, a calidade de vida das cidadás e dos cidadáns de Oleiros.

Estes 21 puntos que o BNG apresentou hoxe polo Rexistro Municipal son de maneira resumida os que a seguir enumeramos:

OBRAS

1. Restauración e ampliación do Museo dos Oleiros.

2. Reparación da polideportiva do CEIP “A Rabadeira”, pois esta é a polideportiva máis antiga do concello e precisa dunha grande reforma.

3. Mellora da iluminación nos núcleos úrbanos substituíndo aqueles pontos que xeran contaminación lumínica.

4. Correcta sinalización do aparcadoiro de Canide e eliminación de barreiras arquitectónicas para persoas con discapacidade, nomeadamente nos pasos a peóns.

5. Construción de beirarrúas na Corredoira das Viñas, que une a Avenida Che Guevara á altura de Santa Cristina coa rúa Xosé Neira Vilas na Canteira de Perillo, ao estar esta sen beirarrúa e con escasa iluminación, cunha calzada estreita que fai perigar a integridade das persoas nun tramo altamente denso en tránsito.

6. Reparación inmediata da rúa dos Pozos en Montrove dado o estado de deterioro desta.

7. Construción dun valado de protección nas pozas do antigo acceso á ría do Burgo na urbanización do Seixo como o colocado nas furnas do monumento natural da costa de Dexo, e colocacións duns letreiros de advertencia na citada zona para previr posíbeis accidentes.

8. Ampliación do aparcadoiro da piscina de Oleiros e protección para que os coches non caian.

9. Creación dun tanatorio municipal por non contar o concello cun tanatorio nin público nin privado.

10. Melloras para a parroquia de Nós incluíndo demandas que van desde a realización de melloras na vía pública, a mellora dos rexistros de pluviais na baixada da Urbanización Xardín de Nós á estrada AC221 (Salvador Allende), e conexión da rúa León Felipe coa rúa dos Cabaleiros.

RADIO OLEIROS

11. Compra de emisora móbil en Radio Oleiros para facer posíbel a retransmisión de actividades e actos en directo.

FINANCIAMENTO

12. Financiamento para a xestión do Centro de Día nas Galeras de carácter público, prevendo na partida orzamentaria o 30% do gasto correspondente ao Concello.

DEPORTES

13. Redacción por parte do Departamento de Deportes do Plano Director de Infraestruturas Deportivas.

TURISMO

14. Dispor terreo para a creación dun aparcamento de autocaravanas e dispor tamén terreo para a instalación dun albergue público municipal.

EDUCACIÓN

15. Dispor terreos para a construción dunha galescola en Nós.

16. Terreo ou inmóbel para se situar unha futura Escola Oficial de Idiomas.

CULTURA

17. Creación de locais de ensaio para grupos de música. Estes locais deberán estar adaptados canto á insonorización e que contén con ligazóns para o material técnico.

MANTEMENTO

18. Malia se ter iniciado xa o proceso de expropriación dos terreos na zona de Naval, este feito non exime o goberno local de adecentar e limpar o contorno da zona, cumprindo coas ordenanzas de limpeza, designando unha partida orzamentaria para tal fin.

OUTRAS INICIATIVAS

19. Sistema de aluguer de bicicletas con puntos de intercambio nas principais localidades do concello de Oleiros.

20. Acceso público á internet vía wi-fi.

21. Conxelación salarial dos cargos políticos (goberno e oposición) e das súas correspondentes asistencias cando as tiveren.

O BNG de Oleiros pide ao alcalde que exixa á empresa concesionaria das piscinas unha indemnización polo tempo en que estas permaneceron pechadas

Os usuarios e usuarias das piscinas municipais de Oleiros non son responsábeis das causas polas que as referidas piscinas se atoparon pechadas a consecuencia da folga, ou, no caso da Canteira, por causa tamén do temporal. Debido a estes peches é polo que o goberno local, en aplicación do convenio, debe exixir á empresa concesionaria (Sidecu) unha indemnización polo tempo que as piscinas teñen realizado os seus peches, e debe realizarse a conseguinte devolución dos cartos aos usuarios e usuarias das piscinas municipais polos días en que se atoparon pechadas ben pola folga ou, como no caso da piscina da Canteira, polas consecuencias do temporal.

Non serve de xustificación alegar para as persoas usuarias da piscina da Canteira que existen máis piscinas desta empresa ás que estas persoas poden acudir, pois estas persoas escolleron esa piscina e non outra por causa da proximidade e da facilidade de combinaren os horarios en función das súas actividades laborais e familiares. Por ese motivo as solucións expostas polo goberno local e a empresa concesionaria non son as máis satisfactorias. O acontecido respeito da Escola de Música e respeito das piscinas municipais coas empresas concesionarias obriga a revisar para o futuro os pregos de condicións para todas aquelas xestións de servizos públicos que se saquen nun concurso, pois na práctica o goberno local e os usuarios e usuarias están sempre condicionados polas empresas privadas, que priorizan os seus intereses privados e económicos por diante do servizo público que deben oferecer á cidadanía. E o goberno local, por vacíos legais e por conivencia con estas empresas, non exerce activamente o seu papel de exixir o servizo nas mellores condicións e as conseguintes reparacións para co usuariado no caso de non cumprir a empresa correspondente debidamente con esta obriga.

A día de hoxe ningún usuario ou usuaria das piscinas recibiu devolución de cartos polos servizos non prestados nin o goberno indemnización polo incumprimento do contrato, o que deixa claro a precariedade na prestación dos servizos públicos por parte das empresas que xestionan estes servizos en Oleiros.

Coa saúde da xente non se debe xogar

Os cidadáns e cidadás soportan a incompetencia dos responsábeis políticos

Mentres o goberno local e o Partido Popular pelexan a respeito da cesión e asunción de gastos dos centros de saúde, quen sae prexudicada é a cidadanía de Oleiros, que non é responsábel en ningún caso da incompetencia dos responsábeis políticos. Mais os cidadáns e cidadás teñen que padecer día a día as liortas entre Alternativa dos Veciños e Partido Popular mentres que os problemas seguen sen resolverse.

A día de hoxe a situación nos centros de saúde de Oleiros é lamentábel. O goberno local di que desde o pasado 31 de decembro non asume os gastos de mantemento destes centros e o Sergas di que non lle entregaron a documentación necesaria para asumir dito mantemento.

Isto tradúcese, entre outras cousas, por exemplo, en que no Centro de Saúde de Santa Cruz a empresa dos elevadores ten intención de desconectalos porque ninguén se fai cargo do pagamento deste servizo, e desde esta empresa xa comunicaron que non se farán responsábeis por calquera accidente que poida ocorrer. Tal situación reflecte a precariedade e a inseguridade coa que se enfrontan neste centro de saúde, e que afecta as persoas usuarias do centro e o cadro de persoal deste, por non indicar outros asuntos e gastos de mantemento dos que nin o goberno local nin o Sergas se fan responsábeis. A irresponsabilidade é por tanto manifesta en ambos os casos e inmerecida por parte da cidadanía, que paga os seus impostos por uns servizos dos cales tanto o PP na Xunta de Galiza como a Alternativa á fronte do goberno local non se responsabilizan. Neste momento calquera accidente ou problema derivado da falta de responsabilidade para afrontar os gastos de mantemento do Centro de Saúde de Santa Cruz está a ser remitida a Santiago de Compostela, desde onde en teoría se deben ocupar do tema, aínda que non fagan nada ao respecto, xogando coa saúde da cidadanía e obviando as súas obrigas para con esta.

No centro de saúde de Perillo están aínda nunha peor situación pois acaban de quedar sen calefacción ao se lles esgotar o gasoil en pleno inverno e non ter quen corra cos gastos de mantemento porque nin o goberno local nin a Xunta se fan responsábeis. Neste caso, a xerencia só procederá a enviar 14 radiadores, o cal máis que unha verdadeira solución ao problema é un parche, ademais de que non se sabe cando se levará a cabo este medida, mantendo unha situación lamentábel especialmente nun inverno tan frío como este.

Respeito da cesión do Centro de Saúde de Santa Cruz a segregación da parte da pista polideportiva para acceder aos terreos é un trámite sinxelo que o goberno local non foi quen de facer en tempo e que non pode servir de escusa para a cesión dese centro de saúde, xa que esa segregación apesar da incompetencia do goberno local podería ser feita a posteriori, polo que as escusas duns e doutros semellan máis unha liorta política interesada que non a vontade de resolver os problemas dos cidadáns e cidadás de Oleiros.

O BNG de Oleiros quere facer un chamamento á responsabilidade de ambas as partes, do goberno local e do goberno da Xunta, lembrando que ambos deben velar pola saúde dos cidadáns e cidadás, así como pola súa seguridade nestes centros, e que a saúde e a seguridade da cidadanía non pode ser elemento de xogo político, senón un dereito. Así que, por favor, póñanse de acordo e garantan os gastos de mantemento dos Centros de Saúde en Oleiros e resolvan todo aquilo que teñen que resolver. Póñanse de acordo porque coa saúde da xente non se debe xogar.

Santa Cristina abandonada polo goberno local

A localidade de Santa Cristina, na parroquia de Perillo, é unha das grandes esquecidas polos investimentos do Concello de Oleiros ao longo dos anos. A localidade de Santa Cristina concentra un grande número de locais de hostalaría que precisan, especialmente en momentos de crise, dun impulso orzamentario na zona para fomentar e promover de novo esta localidade como un referente hostaleiro e turístico de cualidade tanto na comarca como no conxunto de Galiza.

As rúas e beirarrúas atópanse nun lamentábel estado, a iluminación é moi deficiente, dando unha imaxe de penumbra a partir das primeiras horas da tarde. O paseo marítimo precisa dunha urxente remodelación e non somente de parches ou remendos. Os negocios da zona precisan de campañas de promoción que atraian o maior número de visitantes. Ademais precísase dun plan de intervención global na zona que transmita profesionalidade e cualidade.

Logo de varios anos de constatar o fracaso do plan de aparcamentos públicos promovidos polo goberno e que teñen un baixo nível de uso. Por outra banda, é necesaria a redacción dun proxecto integral de promoción da zona realizado por profesionais que converta Santa Cristina no grande bulevar da comarca coruñesa coa promoción de actividades náuticas vinculadas á praia e á ría, ademais dalgún paso peonil que comunique a zona coa outra beira da ría no concello da Coruña.