O BNG apresentou no Parlamento de Galiza unha pregunta parlamentar relativa á concesión de máis de 1 millón de euros en cursos de formación a entidades vinculadas co PP da Coruña

O BNG apresentou no Parlamento de Galiza unha pregunta parlamentar para a sua resposta oral en Comisión relativa á concesión de máis de 1 millón de euros en cursos de formación a entidades vinculadas co PP da Coruña

A iniciativa defendida no Parlamento de Galiza demanda da Xunta os motivos polos que se conceden 1.067.544,75€ en cursos de formación a entidades dirixidas por Gerardo Crespo, empresario coruñés próximo ao PP e, en especial á conselleira Beatriz Mato, en canto se reducen de forma drástica os concedidos aos concellos da comarca da Coruña e, en xeral, do conxunto de Galiza. Asimesmo, o BNG pergunta tamén se ten a ver a concesión destas axudas coa referida ligazóns entre o citado empresario e a conselleira Beatriz Mato.

Reproducimos polo seu interese a iniciativa apresentada á Mesa do Parlamento de Galiza para a súa resposta oral en Comisión, documento que pode ser consultado tamén en PDF aquí.

Á MESA DO PARLAMENTO

Carlos Aymerich Cano, Ana Luísa Bouza Santiago e Henrique Viéitez Alonso, deputados e deputada do Grupo Parlamentar do Bloque Nacionalista Galego (BNG), ao abeiro do Regulamento da Cámara, presentan a seguinte Pregunta, para a súa resposta oral en Comisión, relativa á concesión de máis de 1 millón de euros en cursos de formación a entidades vinculadas co PP da Coruña.

Tal e como vén denunciando o alcalde de Oleiros e diversos medios de comunicación, a Consellaría de Traballo e Benestar vén de conceder máis de 1 millón de euros en cursos de formación a diferentes entidades – Gerecri, Fundefo, Fundelis ou Azetanet – dirixidas por Gerardo Crespo, empresario coruñés próximo ao PP e, en especial á conselleira Beatriz Mato, subvencións que se veñen somar ás concedidas por outras Comunidades Autónomas gobernadas polo PP como a de Castilla y León que lle concedeu no pasado mes de xaneiro 189.587€ para a realización dun programa experimental en materia de emprego. Por certo nunha destas entidades, FUNDEFO, Gerardo Crespo coincide con José Jaime López Cossío, ex director xeral de Formación e Colocación nos gobernos de Fraga Iribarne e un dos promotores da feira acuícola Acui, que malia non contar co apoio do sector recebeu da Consellaría do Mar e do IGAPE máis de 150.000€ en axudas.

Esta sorprendente concentración de axudas en entidades dirixidas por un empresario vinculado ao PP contrasta coa drástica redución das concedidas aos Concellos da comarca da Coruña – e, en xeral, do conxunto de Galiza – para a realización de cursos de formación. Todo indica que nos atopamos diante da privatización das actividades en formación en beneficio de persoas e entidades vinculadas co PP sen que, por parte da Consellaría de Traballo e Benestar se teñan xustificado os motivos desta concesión en atención, por exemplo, aos resultados e eficacia das accións formativas desenvolvidas polas entidades dirixidas por Gerardo Crespo.

Así as cousas, formúlanse as seguintes cuestións:

1ª) Por que motivos se conceden 1.067.544,75€ en cursos de formación a entidades dirixidas por Gerardo Crespo entanto se reducen de forma drástica os concedidos aos Concellos da comarca da Coruña e, en xeral, do conxunto de Galiza?

2ª) Ten a ver a concesión destas axudas coas vinculacións que Gerardo Crespo ten co PP coruñés e, en concreto, con Beatriz Mato?

3ª) Cal foi a eficacia das actividades formativas desenvolvidas con anterioridade polas entidades dirixidas por Gerardo Crespo?

4ª) Cantos dos participantes nestas actividades se achan neste momento empregados?

5ª) Existe algunha directriz do PP en virtude da cal estas entidades deban obter substanciosas axudas das Comunidades Autónomas dirixidas polo PP?

Santiago de Compostela, 24 de agosto de 2010.

Asinado:

Carlos Ignacio Aymerich Cano
Ana Luísa Bouza Santiago
Henrique Viéitez Alonso

O BNG de Oleiros presenta polo rexistro municipal unha moción para a retirada do canon da auga recollido no Proxecto de Lei de Augas de Galiza

O BNG de Oleiros, através da súa concelleira-portavoz no Concello de Oleiros, Fina Quintáns, presentou na mañá de hoxe segunda feira 26 de xullo a moción que se reproduce a seguir para se pór en coñecemento público.

A/A SR. ALCALDE-PRESIDENTE DO CONCELLO DE OLEIROS, D. ÁNGEL GARCÍA SEOANE

O Proxecto de Lei de Augas de Galiza aprobado polo Goberno galego substitúe o actual canon de saneamento por dous novos tributos, o canon da auga e o coeficiente de vertido, coa única intención de aumentar a recadación por parte do goberno do PP, a costa de familias e particulares. Mentres as administracións preparan novas rebaixas impositivas para a adquisición de segundas vivendas, sen límite de prezo nin de renda das persoas titulares, o PP incrementa de xeito brutal e desproporcionado a imposición sobre o uso ou consumo de auga, nomeadamente para os usos domésticos, que serán os que soporten a maior suba de impostos. Xa no primeiro ano de aplicación destes dous novos tributos a Xunta de Galiza prevé duplicar a recadación prevista polo canon de saneamento para o ano 2010, cun incremento de preto de 35 millóns de euros. Unha persoa que viva soa e que teña un consumo medio, duns 3 m³ ao mes, verá como a carga tributaria do seu recibo da auga se incrementa en máis dun 363%; e unha familia de tres membros, con ese mesmo consumo por persoa, terá que soportar un incremento do 171%.

Esta é unha lei que foi elaborada sen consultar aos concellos galegos, sen discusión previa, obviando a realidade local e a grave situación económica que se sofre no país e nos concellos.

Reducen os consumos asimilábeis a domésticos, pasando dos 3.000 m³/ao ano actuais a 2.000 m³/ao ano, o que terá consecuencias moi importantes na suba que van experimentar colexios, centros de saúde, pequenos negocios, hostalaría, etc.

Suprimen as exencións existentes na actualidade para os núcleos de menos de 2.000 habitantes, prexudicando especialmente aos veciños e veciñas do rural, que terán que pagar o canon polo aproveitamento da auga dos seus propios pozos, ou de traídas veciñais, do que hoxe están exentos, e ademais aínda que non teñan servizos públicos de abastecemento de auga ou de saneamento. Só no caso de que non dispoñan de ningún destes dous servizos públicos poderán aplicar a redución prevista na lei, pero aínda non tendo ningún servizo terán que tributar polo canon da auga.

Esta lei obriga a instalar contadores homologados nos pozos particulares, baixo a ameaza de multas de até 30.000 euros.

Por outra parte, a lei non adopta ningunha medida que veña a incentivar o aforro de auga, nin nos usos domésticos nin nos outros, e por riba estabelece unha cota para todos os fogares aínda que non teñan consumo de auga. Trátase dunha política fiscal abusiva que queren aplicarlle a toda a poboación co único obxectivo de recadar, cando con pór en marcha a recadación do canon industrial -como no caso de ENCE- xa incrementarían os ingresos e garantiría un uso sostíbel da auga e unha xestión transparente do canon industrial do seu uso.

Vén ser outro incremento inxusto da imposición indirecta, que soportarán os galegos e galegas, independentemente dos seus ingresos, que só reponde ao interese do goberno do PP de facer recaer o incremento da recadación sobre as familias e outros usuarios que hoxe non soportan o canon de saneamento, mentres continúan a permitir a fraude fiscal aos grandes consumidores de auga cunha elevada carga contaminante, e néganse no Parlamento galego a estabelecer impostos para as grandes fortunas, para as rendas superiores a 1 millón de euros.

Por iso, propómos ao Pleno da Corporación municipal a adopción do seguinte

ACORDO

Solicitar do Goberno galego a retirada do Proxecto de Lei de Augas de Galiza e elaborar un novo proxecto de Lei que sexa sometido a consulta pública. Debendo recoller as seguintes cuestións:

a) Cumprimento da Directiva Marco da Auga e inclusión de todos os seus preceptos.

b) Garantir o acceso ao ciclo completo da auga a todos os cidadáns e cidadás de Galiza en igualdade de condicións.

c) Garantir unha fiscalidade progresiva para a auga en Galiza que de ningún xeito constitúa un incremento da carga impositiva na situación actual de crise pola vía dos impostos indirectos.

d) Regulación e ordenación dos usos da auga que recolla todas as peculiaridades do territorio galego e do acceso á auga, de xeito que se garanta que a auga sexa un servizo universal das galegas e dos galegos.

e) Ter en conta unha regulación dos usos industriais da auga que garanta o uso sostíbel do recurso e unha xestión transparente do canon industrial do uso da auga.

Asinado:

A presente moción pode descarregarse en PDF aquí.

ACTO PÚBLICO DO BNG: O FUTURO DA SANIDADE PÚBLICA. Alternativas á privatización e ao copago. LAR espazo aberto, luns 28 ás 20h30.

ACTO PÚBLICO DO BNG: O FUTURO DA SANIDADE PÚBLICA. Alternativas á privatización e ao copago.

Presenta o acto: FINA QUINTÁNS, portavoz do BNG no Concello de Oleiros.

Falarán: PABLO VAAMONDE, médico de familia de atención primaria e ex director de Asistencia Sanitaria da Xunta de Galiza, e SERVANDO LÓPEZ ÁLVAREZ, médico anestesista do Complexo Hospitalario Universitario A Coruña (CHUAC).

Data: luns 28 de xuño.

Hora: 20h30.

Lugar: LAR espazo aberto (rúa Dolores Ibárruri, nº 6 – Santa Cruz).

O BNG congratúlase en abrir as portas do seu LAR espazo aberto no número 6 da rúa Dolores Ibárruri de Santa Cruz para dar a palabra a PABLO VAAMONDE, médico de familia de atención primaria e ex director de Asistencia Sanitaria da Xunta de Galiza, e SERVANDO LÓPEZ ÁLVAREZ, médico anestesista do Complexo Hospitalario Universitario A Coruña (CHUAC), para nos falaren do futuro da sanidade pública e das alternativas á privatización e ao copago.

Nos últimos tempos o PP está a levar adiante unha política pouco disimulada de camiñar cara a fórmulas de privatización da sanidade. Neste sentido, estamos a asistir a fórmulas de construción de novos hospitais que hipotecan o futuro da sanidade pública galega, como está a acontecer, por exemplo, en Vigo ou Pontevedra. Asimesmo, o recorte xeral dos orzamentos para a sanidade foi este ano de 100 millóns de euros. Estes recortes na sanidade son mediante a vía de redución do persoal, que redunda na redución da calidade da asistencia sanitaria. Para o BNG segue a ser necesaria a batalla en defensa da sanidade pública porque é a única que pode prestar servizo de calidade a toda a cidadanía por igual na asistencia a un dereito básico como é a saúde.

A saúde da cidadanía non debe depender do diñeiro que cada persoa teña, senón que o goberno debe garantir a saúde dos cidadáns e cidadás de maneira pública. A Xunta do PP encamiña a sanidade pública a un proceso de privatización ante o cal non debemos permanecer en silencio.Por iso, para nos falaren deste asunto, do futuro inmediato da sanidade pública e das alternativas á privatización e ao copago, contaremos coa participación de PABLO VAAMONDE, médico de familia de atención primaria e ex director de Asistencia Sanitaria da Xunta de Galiza, e SERVANDO LÓPEZ ÁLVAREZ, médico anestesista do Complexo Hospitalario Universitario A Coruña (CHUAC), que intervirán no acto público que terá lugar no LAR espazo aberto no próximo luns 28 de xuño ás 20h30.

O BNG de Oleiros presenta polo rexistro municipal unha moción en defensa da lingua galega

O BNG de Oleiros presentou na mañá de hoxe 31 de maio unha moción en defensa da lingua galega a través do Rexistro Municipal do Concello de Oleiros

A moción presentada hoxe polo BNG de Oleiros para a súa proposta ao Pleno Municipal do Concello está motivada por unha situación de deterioración da situación da nosa lingua por parte do trato recibido polo goberno Feijóo. No contexto actual de discriminación do Galego polo goberno Feijóo, Oleiros non pode ficar á marxe dos ataques ao Galego promovidos por un goberno que non só non defende a nosa lingua senón que a maltrata e coloca esta nunha posición de subalternidade, a pesar de ser o Galego non só lingua oficial mais tamén a lingua propia de Galiza.

Perante os ataques que está a desenvolver o goberno Feijóo nos últimos tempos contra a nosa lingua, e perante a aprobación dun decreto do ensino que coloca o Galego como lingua B no seu propio territorio, o BNG de Oleiros propón ao Pleno do Concello de Oleiros a seguinte moción que a seguir reproducimos:

A/A ALCALDE-PRESIDENTE D. ÁNGEL GARCÍA SEOANE

EXPOSICIÓN DE MOTIVOS

Resulta evidente que o proceso de normalización de usos do Galego foi lento e, até hoxe, insuficiente para garantir o dereito a vivir na nosa lingua. O respecto á legalidade vixente (Estatuto de Autonomía e Lei de Normalización Lingüística) e a implementación de cambios legais na dirección da igualdade e da convivencia semellan non ir na dirección daqueles que aínda poñen proa ao dereito fundamental para que o Galego goce no seu territorio do mesmo status legal que o Castelán no seu.

Asistimos nos últimos tempos a unha situación esperpéntica, por canto existen sectores –políticos e mediáticos– que pretenden trasladar á opinión pública a idea de que o idioma castelán corre perigo en Galiza por mor da suposta discriminación a que se ven sometidas as persoas que falan nesta lingua.

Mentres tanto, a realidade é claramente á inversa: non só non gozamos dunha realidade que permita a existencia e normalidade dos usos do noso idioma no día a día, senón que ademais resulta evidente un proceso de confusionismo que pretende rebaixar aínda máis o status xurídico do Galego, partindo dunha situación de clara desigualdade e desvantaxe do Galego fronte ao Castelán, e que os únicos deberes para as administracións públicas queden referenciados ao uso do Castelán. Na práctica, estamos nunha situación de negación da igualdade e convivencia entre as dúas linguas.

De feito, un contundente informe do Consello de Europa elaborado a finais do pasado ano, advertía de que no noso País non se están a dar garantías para o uso normal do Galego en sectores tan importantes como a educación, a xustiza, os servizos públicos ou os medios de comunicación; incumpríndose de feito os tratados internacionais sobre dereitos lingüísticos. Na mesma liña, un recente informe da Real Academia Galega sinala que en doce anos ficou reducida á metade a cantidade de persoas que falan habitualmente en Galego. Tamén o Consello Escolar de Galiza, nun informe sobre o Galego no ensino, confirma unha clara desgaleguización do alumnado no seu tránsito da familia á escola, como consecuencia da desvantaxe do Galego fronte ao Castelán no ámbito do sistema educativo.

Acreditamos que compete ao pobo galego, a través das súas institucións representativas, definir a política lingüística acorde co criterio de cooficialidade e de lingua propia que mesmo o actual Estatuto recoñece para o noso idioma; exixindo das institucións de autogoberno a defensa da igualdade plena de dereitos para o Galego e a aplicación de medidas a favor da normalización dos seus usos.

Non obstante, estamos a escoitar declaracións de persoas con cargos de alta responsabilidade no novo Goberno Galego que constitúen un ataque contra o Galego e mesmo poden constituír un perigo de confrontación e de fractura social; á marxe de ir contra os acordos unánimes do Parlamento Galego, nomeadamente contra o recollido no artigo 5 do Estatuto de Autonomía, que sinala o Galego como lingua propia de Galiza e a obriga dos poderes públicos de potenciala nos diferentes ámbitos de uso.

Por isto, solicitamos do Pleno da Corporación Municipal a adopción do seguinte

1. Instar o Goberno Galego a que cumpra as obrigas estabelecidas no Estatuto de Autonomía de Galiza, que no seu artigo 5º di: “A lingua propia de Galiza é o galego. Os poderes públicos de Galiza (…) potenciarán o emprego do galego en todos os planos da vida pública, cultural e informativa, e disporán os medios necesarios para facilitar o seu coñecemento”.

2. Como proba da vontade de volver ao consenso sobre a lingua galega instar ao Goberno Galego:

2.1. A que non proceda á derogación do Decreto 124/2007, que desenvolve unha medida contemplada no Plan Xeral de Normalización Lingüística aprobado por unanimidade polo Parlamento de Galiza no ano 2004.

2.2. A que non modifique a Lei 4/1988 da Función Pública de Galiza no referente a demostrar o coñecemento da lingua galega nas probas selectivas que se realicen para o acceso ás prazas da Administración Autonómica.

3. Instar o Goberno Galego a que promova a reforma do marco legal que posibilite a plena igualdade en dereitos e deberes do Galego e do Castelán, como fórmula para facer real a cooficialidade das dúas linguas.

O BNG congratúlase de que finalmente se realizase o paso a peóns da Av. Rosalía de Castro

O BNG de Oleiros congratúlase de que finalmente se realizase o demandado paso a peóns na Avenida Rosalía de Castro

Froito dunha serie de demandas realizadas en repetidas ocasións polos veciñas e veciñas da zona da Avenida Rosalía de Castro e polo BNG de Oleiros a través da súa portavoz municipal Fina Quintáns e tamén a través do BNG no Parlamento Galego, destacando as reiteradas peticións públicas con recollida de sinaturas e a iniciativa levada polo BNG ao Parlamento Galego, reclamando da Xunta de Galiza a creación dun paso de peóns na estrada AC-174 á altura da antiga escoliña das pedras, desde hai uns días no lugar citado figura finalmente un paso a peóns. O BNG realizou a este respeito diversas preguntas parlamentares a través do parlamentar Carlos Aymerich e da parlamentar Ana Luísa Bouza Santiago, deputado e deputada correspondentes pola nosa comarca. O BNG alertou en numerosas ocasións desta situación de carencia de seguridade viaria e das demandas da cidadanía perante diversas autoridades e medios de comunicación.

Na Avenida Rosalía de Castro precisábase dun paso a peóns no lugar en que desde hai uns días xa figura, debido a que esta estrada soporta diariamente abundante tránsito de vehículos procedente de Sada e Oleiros cara á N-VI, ademais de contar con numerosas vivendas no contorno, o colexio público Valle-Inclán de Perillo e cada día con maior número de habitantes tanto nun lado como no outro da estrada nunha zona urbana de alta densidade poboacional. A Portavoz do BNG no Concello de Oleiros xa ten reiterado en numerosas ocasións esta necesidade comunicada persoalmente por varios veciños e veciñas da zona, persoas ás que xa tivo a ocasión de felicitar polo logro conseguido en beneficio da xente.

O paso a peóns colocado estes días é sen dúbida un importante logro para os veciños e veciñas da zona, en primeiro lugar, como para calquera outra persoa que deba transitar a pé por aquela zona, pois constitúe unha boa noticia para a seguridade viaria.

Congratulámonos, por tanto, de que a acción cívica e cidadá unida á acción política desenvolvida polo BNG teñan dado o seu froito en beneficio dos veciños e veciñas de Oleiros.

O BNG solicita unha normativa de uso para instalacións deportivas municipais

O BNG de Oleiros solicitará mañá polo rexistro municipal que se aprobe unha normativa de uso para algunhas instalacións deportivas municipais, en concreto as polideportivas cubertas das parroquias e o campo de fútbol Eugenio Pardo Conchado “O Condús” de Oleiros.

O BNG de Oleiros rexistrará mañá un escrito en que solicita do goberno local a redacción dun regulamento de uso das polideportivas cubertas existentes nas parroquias e que nalgún caso están a ser usadas por persoas de fóra de Oleiros (polideportiva de Nós), peñas e clubes de amigos desprazando os repaces de Oleiros do seu uso.

No caso do único campo de fútbol sintético do concello de Oleiros, o coñecido como “Condús” e de propiedade municipal, está a ser xestionado polo Obreiro de Oleiros, que incluso ten en exclusiva a xestión do ambigú, en detrimento do resto de clubes, que non poden utilizar este cando celebran partidos nese campo.

Aos sábados pola mañá o campo está infrautilizado, polo que o goberno local debería implantar unhas normas de uso como pois é o Concello o propietario da instalación en canto non estean construídos outros campos sintéticos no noso concello.

Os pavillóns cubertos contan cun regulamento e unhas normas asumidas polo conxunto de clubes que os usan e os colexios e colectivos, mentres que nestoutras intalacións, cada día máis demandadas, a desorganización, e, polo tanto, as inxustizas son evidentes.

O BNG instará o alcalde de Oleiros a xestionar coa Deputación e coa Xunta de Galiza o arranxo da pista de lanzamento de Bastiagueiro

Logo de se ter remodelado por case un millón e medio de euros o estadio do INEF de Bastiagueiro, o goberno bipartito comprometeuse a acometer neste 2010 a remodelación tamén da pista de lanzamentos situada na parte posterior do estadio. Esta pista encóntrase actualmente nun estado de abandono e precisa da súa remodelación e da creación de accesos desde a parte posterior do estadio adaptado tamén para persoas con discapacidades.

A citada pista atópase en terreos propriedade da Deputación Provincial da Coruña e deben ser cedidos estes terreos á Universidade para que a Secretaría Xeral para o Deporte poda acometer as obras de remodelación. Existe xa un anteproxecto redactado pola empresa NAOS Arquitectura para poder acometer esta obra. O INEF-Galiza pertence á Universidade da Coruña e, polo tanto, a Xunta de Galiza debe de contemplar como complemento á obra do estadio a habilitación desta pista de lanzamentos porque, ademais de se encontrar nun estado lamentábel, A Coruña conta cun grupo de lanzadores de entre os mellores do Estado, entre os que están campións do Estado español e mesmo olímpicos que desenvolven o seu labor de adestramento en condicións precárias.

A maior parte dos deportistas referidos están adestrados por Reimundo Fernández, adestrador de recoñecido prestixio a nível internacional, e, tendo en conta que todo este complexo se atopa nun contorno privilexiado do parque metropolitano, o alcalde de Oleiros como máximo representante do concello de Oleiros debería levar a cabo todas aquelas accións que conduzan a mellorar ese contorno por motivos de carácter social e deportivo máis que evidentes en beneficio do prestixio do noso concello.

En calquera caso, lamentamos a actitude negativa do secretario xeral para o Deporte José Ramón Lete Lasa que, na súa última visita ao INEF no pasado 23 de abril, mantivo unha actitude negativa con respecto ao financiamento desta obra deportiva necesaria para que o céspede do estadio non se deteriore a causa dos habituais adestramentos dos lanzadores.

Para cando o Plano Local de Turismo de Oleiros?

O BNG de Oleiros quere chamar a atención sobre a falta dun plano local de turismo en Oleiros que defina as estratexias turísticas a curto, medio e longo prazo no noso concello.

A saída do BNG no pasado mandato deixou sobre a mesa e inacabada a aprobación dun plano local de turismo e a solicitude de declaración de Oleiros como concello turístico, estes vitais para a economía do concello e máis agora que estamos nun período de crise económica.

A falta de oficinas abertas ao longo do ano, aulas de interpretación ambiental como o Faro de Mera pechadas habitualmente, a falta de aparcadoiros para autocaravanas, a carencia dun albergue público municipal, que non se teña asistido a máis feiras turísticas nin feito promoción exterior, a falta dunha concellaría específica que planifique en sectores tan importantes como son a hostalaría, o náutico-deportivo, campañas de promoción pública, impulso do investimento en creación de talasos, spa, ou outro tipo de ofertas complementares como a promoción de visitas organizadas de grupos, a mellora do Museo dos Oleiros, etc., provocan que o o goberno local estea desaproveitando un importante recurso económico e de xeración de emprego. Oleiros precisa tomarse en serio dunha vez por todas a industria turística e non deixar unicamente da man privada a planificación e dirección para un turismo de calidade no noso concello, complementario co turismo da metrópole coruñesa e da Terra das Mariñas.

É necesario, por tanto, a creación dunha concellaría específica de turismo, con persoal técnico titulado e cualificado que prepare o plano local de turismo en Oleiros para traballaren o antes posíbel na dirección apuntada.

Os veciños e veciñas de Nós quéixanse do uso da polideportiva

Fina Quintáns con directivas da Asociación de Veciños “Os Rueiros” de Nós.

A portavoz do BNG de Oleiros, Fina Quintáns, na rolda de visitas ás entidades veciñais que está a realizar nos últimos días constatou cos veciños e veciñas de Nós problemas no uso da polideportiva cuberta da Praza da Liberdade.

Veciños e veciñas da parroquia de Nós manifestaron a Fina Quintáns a súa preocupación porque a polideportiva parroquial está a ser utilizada por persoas de fóra do concello desprazando do seu uso os rapaces e rapazas da parroquia, polo que demandan a regulación do uso das polideportivas e que se prioricen estas para os habitantes do concello.

A capacidade dos polideportivos municipais instalados nos centros de ensino está sobrepasada e isto provoca agora que as polideportivas ao ar libre (e, en concreto, a de Nós) sexan empregadas por peñas, clubes e grupos de amigos de fóra do concello desprazando os rapaces e rapazas da zona do seu uso.

Fina Quintáns comprometeuse a trasladar o problema ao goberno local para que comprobe esta situación e tome medidas ao respecto.

O BNG apresentou hoxe no Parlamento de Galiza unha iniciativa para mellorar a seguranza das persoas na estrada entre Arillo e Breixo

A iniciativa defendida no Parlamento de Galiza demanda da Xunta a construción de beirarrúas ou camiños peonís para garantir a seguranza das persoas que teñen que transitar pola estrada AC-173, no paso por Lourido Grande e Lourido Pequeno

Na iniciativa defendida na mañá de hoxe polo deputado Carlos Aymerich e as deputadas Ana Luísa Bouza e Teresa Táboas, o BNG apresenta unha pergunta relativa á construción de beirarrúas na estrada AC-173 entre Arillo e Breixo, xa que a referida estrada, ao seu paso por Arillo e Breixo (nomeadamente entre os lugares de Lourido Grande e Lourido Pequeno, na Avenida República Arxentina) carece de beirarrúas, malia existir espazo abondo para as construír. Esta carencia constitúe un perigo para as persoas que transitan a zona, muitas delas en idade avanzada, que non dispoñen doutro camiño ou vía máis segura. O BNG, a través do seu deputado Carlos Aymerich e as deputadas Ana Luísa Bouza e Teresa Táboas pergunta que actuacións ten previsto a Xunta de Galiza para mellorar a seguranza dos peóns na AC-173 ao seu paso polas parroquias de Arillo e Breixo, no Concello de Oleiros, e, en concreto, se a Xunta ten previsto construír beirarrúas ou camiños peonís nas beiras da estradas e en que prazo.

A iniciativa defendida polo BNG en defensa da seguranza das persoas que transitan pola estrada AC-173 e en demanda da necesaria construción de beirarrúas ou camiños peonís pódese consultar aquí.