O alcalde de Oleiros sorpréndenos hoxe con unhas declaracións no diario La Opiniónde A Coruña, nas que acusa ao BNG de ter intereses económicos en Oleiros, según él, por cobrar as dietas de asistencias a plenos e comisións.

Xa que logo, o alcalde cifra os “intereses económicos” do BNG en 250€ mensuáis, todo un escándalo de altas dimensións proposto por él mesmo ao Pleno e aprobado pola corporación ao mesmo tempo que o seu salario de máis de 70.000€, que nós mesmos apoiamos por entender que o alcalde dun concello tan importante como Oleiros debe ter a dedicación necesaria e o salario digno para atender os intereses do concello antes que os privados.

Nesta acusación, o sr. alcalde esquece que él mesmo tardou máis dunha hora en describir as súas propiedades privadas nun pleno municipal recoñecendo que superaban o valor de 1.000 millóns das antigas pesetas, e que incluían tres casas. Non manifestou o sr. alcalde que a maior parte dese patrimonio inmobiliario foi adquirido con unha calificación e hoxe son todas urbanas. (todo un lince dos negocios e sen intereses económicos).

Esquece o sr. alcalde que está procesado por “negociacións prohibidas a funcionarios” en asuntos urbanísticos e baixo sospeita de exercer de alcalde promotor no seu propio concello.

Pero a “perla” millor das súas declaracións, que “caeu nos brazos do PSOE” por culpa do BNG, non ten desperdicio, cal amante rexeitado, que culpa a terceiros das súas libres decisións.

No BNG xa coñecemos actitudes como estas en outros alcaldes “independentes” que ao final rematan nas filas socialistas para salvagardar os seus intereses, que representan bastante máis que os 250€ que ingresa o BNG por asistencias aprobados democraticamente.

CONCENTRACIÓN: SÁBADO 9 ÁS 12:00 NA PRAIA DE NAVAL

-Contra o abandono durante máis de 20 anos do contorno de Naval, en Breixo (Dorneda).

-Pola colocación de iluminación, adecentamento dos espazos públicos e pola colocación de valados de protección e a mellora dos accesos e da limpeza do contorno de Naval.

Acude á concentración do Sábado 9 ás 12:00 horas na praia de Naval!!!

Convocan: Veciños e veciñas da zona.
Apoia: BNG de Oleiros

Carta de Fian Quintáns ao Alcalde de Oleiros.

Estimado sr. alcalde:

Sorprendennos moito no BNG as súas declaracións polo posicionamento do BNG sobre o Plan Xeral de Oleiros, e sobre todo cando vostede afirma que o documento actual é o mesmo que o inicial apoiado polo Bloque Nacionalista Galego.

O actual documento, cos cambios introcudidos por vostede no acordo co PSOE, descoñecemolo nós e todos os veciños e veciñas do concello, e o documento inical, non serviría neste momento non por un antoxo do BNG, senón porque desde hai tres anos que se aprobou, mudaron algunhas situacións de moita trascendencia para o futuro de Oleiros e para o conxunto do País.

Saberá vostede que desde a aprobación inicial entrou en vigor a Lei de Protección do Litoral e se teñen aprobado a Lei de Vivenda ou o Decreto de Normas do Habitat Galego. Ademáis, todos sabemos xa que estamos no comenzo dunha importante crise económica que afecta en grande medida á construcción de vivendas libres e que esta situación obriga a facer fondos cambios nas previsións de futuro para o noso concello.

Debemos adaptarnos ás novas leis e normativas pero tamén debemos facer previsións de crecemento adaptadas á nova situación, promovendo vivenda pública para os que máis a necesitan e non en función da antigüedade no padrón municipal, apostar decididamente por alternativas económicas como o turismo de calidade, novos espazos para o crecemento industrial e millores comunicacións e transporte público que facilite e abarate a mobilidade no noso concello e na comarca ademáis de incrementar a colaboración institucional para millorar a calidade de vida dos nosos veciños e veciñas.

No BNG non criticamos un documento que descoñecemos, senón que facemos propostas e demandamos transparencia, participación e respeto aos dereitos mínimos de todos os cidadáns á información e a alegar aos cambios que consideren oportunos.

No documento inicial, tivemos acceso a un CD co documento do PXOM, período de exposición pública, alegacións e mesmo aportacións das entidades. Agora, non temos coñecemento exacto dos acordos acadados por vostedes (só propaganda mediática) e non hai as mínimas garantías de transparencia, información e diálogo, polo que non pretenderá vostede que o BNG apoie “a cegas” un documento que descoñecemos nós e todo Oleiros, fiandonos só da súa contradictoria palabra.

Estimado alcalde, creame cando lle digo que no BNG estaríamos encantados de poder apoiar un Plan Xeral o máis consensuado posíbel para Oleiros, pero de ningunha maneira podemos ser cómplices dunha aprobación pactada de costas aos cidadáns, con “premeditación, alevosía e nocturnidade politicas”.

Aínda está vostede a tempo de pechar as sospeitas sobre un acordo, que por secreto, parece ocultar intereses inconfesábeis, facendo un proceso de aprobación limpo e transparente, e nese caso, o BNG, independentemente do seu voto, será respetuoso e acatará con total normalidade a vontade maioritaria do Pleno.

Sen máis, reciba vostede un sincero saúdo de Fina Quintáns, Portavoz Municipal do BNG de Oleiros.

O BNG de Oleiros logrou que o goberno local inicie esta mesma semana as obras de asfaltado dos accesos á praia de Naval.

O BNG agradece aos veciños e veciñas a boa acollida da iniciativa e comprométese a exercer o control da reparación dos accesos e o posterior mantemento destes.

Quero manifestar ao Consulado de Cuba e á comunidade cubana de Galiza o meu máis fondo respeito e admiración pola figura do Che Guevara, a quen considero merecedor de todas aquelas homenaxes que se lle tributen, mais entendendo tamén que o Che non pode ser instrumentalizado e utilizado por un alcalde como foco dunha polémica para enfrontar a cidadanía entre si, como tampouco para enfrontar os partidos políticos. Debido á torpeza das formas con que o goberno local obrou neste asunto, xa que o goberno oleirense non foi quen de consultar ao resto de forzas políticas e moito menos de chegar a un consenso para honrar a figura do Che Guevara como merece, o alcalde de Oleiros converteu un monumento e unha homenaxe ao Che nun foco de polémicas e confrontacións estériles, que nos impiden participar dun acto instrumentalizado polo goberno oleirense e utilizando para iso a moi respeitábel figura do Che Guevara.

Desde o BNG de Oleiros lembramos a loita do Che Guevara polos dereitos do pobo cubano e dos máis desfavorecidos, e seguiremos a honrar a memoria coa práctica política honesta, mais fundamentada non só na promoción de eventos e monumentos seitarios dun alcalde megalómano, senón na práctica diaria e coherente comprometida cos dereitos da cidadanía.

Por outra banda, tampouco o BNG apoia manifestacións reaccionarias impulsadas polo PP contra o monumento ao Che Guevara e sinto profundamente que o BNG non poida participar dun acto utilizado polo goberno oleirense como arma arreboladiza contra todas aquelas persoas que non coincidimos co referido goberno. Ademais, lamento que neste caso se use a figura do Che como centro desta controversia que beneficia fundamentalmente o Partido Popular, sen que o BNG poida facer máis por evitar tal situación.