AS 40 PROPOSTAS DO BNG DE OLEIROS QUE A COALICIÓN ALTERNATIVA DOS VECIÑOS, PP, E PSOE REXEITARON NOS ORZAMENTOS

21 Abril, 2008 Sen clasificar Non hai comentarios

 

Reproducimos as 40 propostas que o BNG fixo para incluír nos Orzamentos 08 con cargo á partida do auditorio. Non foron incluídas. Xulguen, comparen e tiren conclusións sobre quen defende unicamente os intereses dos veciños e veciñas de Oleiros: 1. Pista de skate, que constatamos que é moi demandada entre a mocidade.2. Cubrición pista polideportiva IESP Xosé Neira Vilas, pois é o único instituto sen pista cuberta.

3. Apertura, dotación e mantemento da Oficina de Información Turística no Castelo de Santa Cruz.

4. Oficina de Información Turística nos meses de verán en Santa Cristina, co persoal necesario.

5. Restauración e ampliación do Museo dos Oleiros. Está avellentado e ten pouco espazo.

6. Restauración da antiga Casa da Xuventude en Santa Cristina. Encóntrase bastante deteriorada e sen uso despois de marchar Protección Civil.

7. Arranxo das oficinas dos grupos municipais no edificio traseiro da Casa do Concello. O edificio anexo ao Concello só ten amañado o local da radio. O resto non se corresponde coa imaxe do resto de edificios públicos da capital municipal.

8. Instalación dun elevador na Casa Charry de Oleiros. A falta do mesmo impide o dereito de todos os cidadáns a asistiren aos plenos.

9. Creación de locais de ensaio para grupos de música. Locais adaptados (insonorización e ligazóns para o material técnico). Os instrumentos xa foron enviados pola Dirección Xeral de Xuventude hai dous anos.

10. Compra de emisora móbil en Radio Oleiros para se posibilitar a retransmisión de actividades e actos en directo. Agora mesmo só se fai cos plenos por falta de medios técnicos.

11. Instalación de parques de saúde en áreas públicas como parques, paseos marítimos, etc. Facilitan o acceso universal á actividade física por parte dos cidadáns mediante aparellos ximnásticos anti-vandalismo.

12. Reparación da polideportiva do CEIP “A Rabadeira”. É a polideportiva máis antiga do concello. Precisa dunha grande reforma para ser adaptada aos requisitos actuais a nível deportivo, e precisa de se converter nun espazo polideportivo moderno.

13. Terreo de 3000 metros cadrados de cualificación de equipamento social para un centro de día de nova construción de 80 usuarios.

14. Adaptación dun local para náutico de banco móbil na zona da ría do Burgo.

15. Recuperación dos festivais Revela!, Nova Factory e Cabaré.

16. Mellora da iluminación nos núcleos urbanos substituíndo aqueles puntos que xeran contaminación lumínica.

17. Plano de estudo dos viais municipais para a súa mellora.

18. Plano de revisión de instalacións públicas para a súa mellora:- Casas do Pobo, pavillóns, pistas descubertas, escolas, parques, marquesiñas, mobiliario urbano en xeral, etc.- Redacción por parte do Departamento de Deportes do Plano Director de Infraestruturas Deportivas.

19. Revisión das taxas municipais da auga no prezo mínimo para premiar quen menos consome.

20. Disposición de terreos para construción de vivendas protexidas no Rexistro Único de Demandantes de Vivenda.

21. Terreo para a creación dun aparcamento de autocaravanas.

22. Terreo para a instalación dun albergue público municipal.

23. Inmóbeis para situar os locais de ensaio.

24. Terreos para a construción de dúas galescolas en Nós e Dorneda.

25. Inmóbel para a creación dun centro de asesoramento afectivo-sexual para a mocidade, da rede pública da Xunta “Quérote”.

26. Terreo ou inmóbel para se situar unha futura Escola Municipal de Idiomas.

27. Terreo ou inmóbel para adxudicar unha futura Escola Municipal de Artes.

28. Creación da Oficina da Muller.

29. Vivendas tuteladas para vítimas de acoso ou/e maltrato.

30. Traspaso das escolas infantís municipais á rede galega de galescolas.

31. Mellora dos equipamentos informáticos e tecnolóxicos do Concello. Creación da sinatura dixital, rede de videoconferencia, e retransmisión de plenos e actos públicos pola rede, así como outros actos diversos de interese público, e posibilidade de seren realizadas operacións de rexistro a través da rede. No plano da dotación de persoal necesario para os diferentes departamentos, propomos unha contratación mínima destinada a seren corrixidos e mellorados os servizos existentes: 32. Director/a cualificado/a para o Museo dos Oleiros. Nível: Licenciado/a en Historia da Arte, Humanidades ou similar.33. Técnico/a de Turismo. Nível: Diplomado/a na Escola Superior de Turismo.

34. Técnico/a de Xuventude. Nível: Licenciado/a en Socioloxía, Psicopedagoxía ou similar.

35. Monitor/a de deportes. Nível: Licenciado/a no INEF.

36. Xornalista para Radio Oleiros. Nível: Licenciado en Xornalismo.

37. Responsábel da Oficina da Muller. Nível: Licenciada en psicopedagoxía ou equivalente. Nota: debe contratarse unha muller para este servizo.

38. Dúas persoas para a Concellaría de Turismo, de apoio ao persoal técnico. Nível: estudos de FP na especialidade de Turismo ou similares.

39. Dous axentes para policías ambientais.

40. Maior dotación de persoal laboral cualificado para corrixir as carencias existentes na nave de servizos municipais.

 

O PLENO ORZAMENTARIO CONVERTEUSE NUNHA MOCIÓN DE CONFIANZA

21 Abril, 2008 Sen clasificar Non hai comentarios

O Pleno en que se sometían a aprobación os orzamentos para o 2008 convertiuse “de facto” nunha moción de confianza gañada pola Alternativa dos Veciños

Nun pleno sen acordo previo do goberno de Alternativa dos Veciños cos grupos da oposición e con negociacións “in situ”, tanto PP como PSOE sufriron a vertixe dunha convocatoria dos mesmos sometidos a unha moción de confianza que o alcalde anunciou durante o proprio pleno, desafiando o resto dos grupos como ten por costume neste tipo de circunstancias. 

O Partido Popular amosou máis disgusto polo desprezo de Alternativa a pactar con eles que polas medidas que puidesen xustificar o seu apoio, tentando deixar o PSOE fóra de calquera acordo. 

O PSOE, con medo a ter que decidir o futuro do goberno nunha moción de confianza, e medo tamén a quedar excluído do apoio e que iso lle puidese prexudicar politicamente, optou por un acordo de última hora. 

Só o BNG foi coherente nos seus posicionamentos, pois non apoiou uns orzamentos en que non se incluíron 40 medidas sociais propostas polo BNG, mais tampouco se posicionou en contra porque o BNG entende que é bo para os veciños e veciñas un orzamento, aínda que non sexa o que entendemos como o mellor para a cidadanía. 

Agora, despois de toda a política obstrucionista de PP e PSOE ao labor de goberno, con este apoio dos dous grupos estatais no Concello, os referidos grupos da oposición acaban de dar o seu aval á xestión de Alternativa e lexitiman a acción de goberno debilitando os seus argumentos. 

Tendo en conta as coincidencias dos tres grupos, a realidade é que o único grupo de oposición real é o BNG. O resultado do Pleno do pasado día 18 fortalece a Alternativa para sacar adiante un PXOM que tanto PP como PSOE combaten e obstrúen politicamente e que será outra das batallas perdidas de antemán polos dous grupos estatais da oposición. O mao é que poidan ser tidas como certas as escusas e xustificacións do apoio aos orzamentos e proximamente ao Plano Xeral despois de tantas descalificacións a estes documentos. 

Alternativa gañou unha moción de confianza e descompuxo a oposición, o resto é só o traxe que lle quixeron pór á súa derrota.

MEIXÓN DA AUGA: A PELOTA NO TELLADO DO GOBERNO LOCAL

2 Abril, 2008 Sen clasificar Non hai comentarios

 

Unha vez rematadas as obras das vivendas de protección oficial do Meixón da Auga en Oleiros, que despois de 8 anos de atraso acumulado polo goberno do PP, en tan só 2 anos a Consellaría de Vivenda conseguiu rematar esta promoción. Agora, unha vez que XESTUR deu ás persoas proprietarias todas as facilidades para renegociaren os seus créditos, e inclusive puideron comprobar que as súas vivendas están absolutamente rematadas, depende do goberno local de Oleiros dar a licenza de primeira ocupación destas vivendas, que se demora máis do esperábel na concesión da referida licenza.

O goberno local xustifica o atraso na autorización desta licenza nunha suposta irregularidade na execución das zonas verdes desta promoción. Está claro que a estas alturas esta xustificación antóllasenos caprichosa e vingativa contra unha Consellaría de Vivenda que se atopa en Oleiros cunha oposición do goberno local ás súas políticas sociais, tanto contra o Rexistro Único de Demandantes de Vivenda como contra a cesión de terreos de vivenda protexida no termo municipal. É unha mágoa que os adxudicatarios das vivendas do Meixón da Auga paguen as actitudes belixerantes e de confrontación estéril dun alcalde que leva os seus antollos políticos ao extremo contra todo aquel que non se someta aos seus ditados, e que interpreta o concello como un territorio do seu patrimonio e onde calquera asunto por menor que sexa debe contar coa correspondente autorización da alcaldía.

No BNG de Oleiros entendemos a preocupación e malestar das persoas afectadas por esta situación no Meixón da Auga, e apoiamos as súas demandas de recepción das vivendas contra o atraso inxustificado ao que as está a someter o goberno local de García Seoane.