O goberno local pode estar incorrendo en ilegalidade se non fai exposición pública das modificacións do Plan Xeral

A Xunta de Galiza devolveu o Plan Xeral de Oleiros para que se incluísen neste algúns informes que non se contemplaban e para que se procedese á modificación dalgúns parámetros urbanísticos do documento sometido a aprobación inicial. As correccións realizadas polo goberno local a instancias da Xunta, e as afeccións que estas poidan ter para moitas veciñas e veciños exixen que se reserve o dereito destas persoas á información pública e o dereito tamén a alegaren se se senten prexudicadas polas modificacións antes de o documento se someter á súa aprobación definitiva. Teñamos en conta, a modo de exemplo, que un recurso presentado por un particular ao Plano Xeral de Ourense provocou a suspensión completa do Plan. En Oleiros esta situación pode levar a que o desamparo de persoas afectadas polas modificacións non expostas conduza nun futuro próximo a situacións semellantes e nada desexábeis. A responsabilidade de calquera goberno obriga cando menos a expor publicamente as modificacións incluídas no Plan Xeral, procedemento de dereito que só atrasaría a aprobación e envío destas á Xunta de Galiza con dous meses como máximo. O BNG non fala de expor o documento completo, senón de adaptalo á lei tanto polo dereito á transparencia como polas obrigas que a Xunta de Galiza vai impor aténdose ás normativas actuais, e que o goberno local non asumiu completamente. Resulta paradoxal que o partido socialista nos propoña como condicións para apoiar o Plan medidas que a propria Xunta de Galiza xa exixe por lei, como o 40% de solo para vivenda protexida, que foi unha iniciativa do BNG cando o PSOE só pretendía incluír o 25%. O único que pode xerar unha demora de anos é a introdución de modificacións pactadas con grupos políticos que vaian máis alá do exixido pola Xunta, xa que isto provocaría unha alteración dun documento que nos retraería a outra aprobación inicial, polo que a demagoxia do goberno e do PSOE a este respeito está a xerar confusión interesada sobre o Plan Xeral de Oleiros. O BNG reitera que nunca nos posicionamos a favor ou en contra do Plan, senón da defensa dos veciños e veciñas a coñeceren as modificacións do documento cunha exposición pública, defendéndomos tamén que o noso modelo urbanístico en Oleiros así como en toda Galiza estea nas antípodas dos modelos do PSOE e do PP. O BNG non apoiará ningunha modificación que non sexa sometida a unha exposición pública porque o contrario suporía conculcar o dereito das veciñas e dos veciños a accederen á información a que teñen dereito por lei, e a presentaren as alegacións oportunas se así o desexaren, tal e como a lei tamén ampara. O dereito a acudir á xustiza non pode impedilo o alcalde de Oleiros, por moito que o pretenda..

O SEÑOR ALCALDE ENGÁNASE

O señor alcalde de Oleiros engánase ao pensar que por ter compartido goberno co BNG a nosa formación política vai estar permanentemente ao seu servizo. E engánase o señor alcalde porque o nacionalismo non se somete a ninguén e moito menos baixo ameazas, presións ou descualificacións. Desde o BNG gardamos un fondo respeito á figura institucional do alcalde, independentemente da falta de educación e de respeito que este amose con toda aquela persoa que non lle dea a razón, e entendemos que a democracía exixe un sacrificio polo ben da cidadanía que depositou a confianza nas súas e nos seus representantes. O goberno local de Oleiros debería de entender que un goberno en minoría exixe moito máis esforzo para o diálogo e o entendemento, para poder levar adiante os proxectos máis importantes que ten un concello nunha lexislatura, pois en ningún caso as formas de gobernar deben ser a imposición nin o inmobilismo. Despois de máis de 5 lustros gobernando, o señor García Seoane non entendeu aínda que os métodos empregados no período de transición e do post-franquismo non son aplicábeis na actual realidade política. E nós podemos entender e asumir derrotas e erros, mais nunca a suplantación da democracía nin da legalidade. Resulta curioso que agora tente o señor García Seoane cualificar de ilegal o abandono dun pleno extraordinario cando el mesmo é o que vai máis aló da legalidade e do diálogo non respeitando unha decisión das comisións informativas de non incluír o Plan Xeral na orde do día, levando o referido Plan Xeral a un pleno extraordinario sen a preceptivo informe da comisión. No ideario político do alcalde de Oleiros parece que non se asume de bon grao recibir a mesma menciña que el aplica aos demais. Quizais un talante máis dialogante e tolerante tería evitado esta situación, mais o señor alcalde non quer enteirarse de que xa coñecemos as súas prácticas e que todo o mundo está moi cansado de padecelas. O BNG quere o Plan Xeral, mais non un Plan Xeral calquera, senón o mellor Plan Xeral para o concello de Oleiros. Non queremos que o noso concello sexa unha illa no conxunto do país, e queremos, polo tanto, que se asuma a realidade, que se adapte o Plan Xeral á actual situación económica e ás normas actuais supramunicipais emanadas da Xunta de Galiza. O Plan Xeral ten de ser para toda a cidadanía e non para os negocios inmobiliarios duns cantos. Por iso defendemos unha apertura dun prazo para que exista a posibilidade dunha exposición pública e de alegacións que permitan a transparencia dun Plan Xeral que debe ser de todas e todos, non dos intereses inmobiliarios que ao señor alcalde lle conveñen.

O BNG non avala nin avalará actitudes ditatoriais e antidemocráticas

O BNG non dixo que estivese en contra ou a favor de aprobar o documento do Plan Xeral que propón o Goberno de Oleiros. O que si defende o BNG coa maior contundencia é o dereito de toda a cidadanía a coñecer con total transparencia en que lle poden afectar os cambios acontecidos desde a aprobación inicial, hai máis de 2 anos, deste documento.

Todo o mundo sabe, agás o alcalde, que a situación económica ten mudado moito nos 2 últimos anos, e, polo tanto, o inmobilismo do goberno local pode ser altamente prexudicial para o deseño do crecemento do concello no futuro. O lóxico e responsábel é ter en conta esta situación, e non pechar os ollos a unha realidade evidente.

Por outra banda, que o alcalde de Oleiros teña convocado un pleno extraordinario para se saltar os acordos da comisión informativa, e pretenda en solitario forzar o resto dos grupos a aprobar un plan sobre o que non ten dialogado nin negociado con ninguén, parécenos unha medida desesperada que en nada beneficia nin os intereses do concello de Oleiros, nin a saúde democrática da corporación.

García Seoane xa nos ten acostumados a tomar medidas extremas cando os grupos da oposición non se someten aos seus intereses, saltándose a legalidade, provocando o enfrontamento, utilizando as descualificacións, o insulto, e a ameaza, e no BNG non imos avalar, e moito menos aplaudir, actitudes pré-democráticas dun alcalde arcaico que está máis preocupado polo aval que lle poida dar o BNG ás súas prácticas desmesuradas, que por sacar adiante importantes medidas para a mellora da calidade de vida das e dos oleirenses.

O modelo urbanístico do BNG está nas antípodas do practicado polo PP alí onde goberna, e está tamén moi lonxe do exercido polo PSOE, ambos os grupos instalados na utilización do urbanismo como mero negocio inmobiliario. Mais tampouco compartimos un urbanismo elitista desde o punto de vista social, extensivo no territorial, que leva practicando a Alternativa dos Veciños, alimentando tamén en García Seoane a figura do alcalde promotor, que o proprio proxecto de Lei de Vivenda declara como pouco ético e politicamente despreciábel.

O BNG non vai responder os insultos e a provocación do señor alcalde de Oleiros porque non nos move ningún interese particular, mais a defensa da democracía, da transparencia e dos intereses xerais das veciñas e dos veciños de Oleiros. Por iso, negámonos a participar e apoiar outra escenificación circense de García Seoane, neste caso a respeito do Plan Xeral. O Goberno de Oleiros debe entender que nunha situación de minoría debe ter os apoios necesarios para levar adiante os principais proxectos do concello, e a vía da imposición e máis do enfrontamento non é a mellor maneira de acadalos.

Máis unha vez, ponse en evidencia a dramática carencia de capacidade de diálogo e de entendemento do noso alcalde, que ten como máxima da súa actuación política “A Deus rogando e co mazo dando”.

A actitude de García Seoane e do seu equipo de goberno, co seu inmobilismo absoluto a respeito do Plan Xeral, só pode explicarse á luz de intereses económicos e inmobiliarios que impiden a necesaria flexibilidade para acadar os apoios que permitan a aprobación definitiva deste documento.

O relatorio remitido por un arquitecto do equipo redactor do Plan Xeral pretende xustificar a cerrazón a calquera modificación do Plan, mais, desde o respeito a estes profesionais, o BNG non comparte estas consideracións técnicas como argumento para dar carpetazo ao necesario diálogo e confronto de modelos, á análise da actual realidade social e política e, en definitiva, ao maior acerto e consenso do noso concello.

O BNG non acudirá ao pleno extraordinario do PXOM se non hai unha exposición pública que garanta a trasparencia e as alegacións oportunas

Perante a convocatoria por parte do Concello de Oleiros dunha sesión, de carácter ordinario, do pleno do Concello de Oleiros para quinta feira (xoves) 29 de Maio ás 20h00 e mais da convocatoria dunha outra sesión de carácter extraordinario onde -nesta última- a orde do día será o Plan Xeral, debo realizar as seguintes declaracións:

O BNG propuxo recentemente a apertura dun novo prazo de exposición pública do PXOM, para posibilitar a presentación de alegacións, debido a que en case 3 anos desde a aprobación inicial do referido Plan Xeral ten habido modificacións importantes, quer no plano socio-económico, quer no plano normativo, así como na lexislación vixente, cambios que enumerarei a seguir. En primeiro lugar, estamos nunha situación de crise económica, chámese “desaceleración económica” ou chámese como se quixer, mais enfrontamos unha situación económica diferente á de hai 3 anos, que afecta a economía da cidadanía en xeral así como tamén unha crise no sector inmobiliario. As condicións actuais non son as de hai case 3 anos, como é evidente. En segundo lugar, non existe un consenso entre os concellos limítrofes a respeito de actuacións que deberían tomarse conxuntamente. Debe existir un consenso en actuacións referidas á Ría do Burgo, así como nas comunicacións, etc., nomeadamente entre o Concello de Oleiros e mais os de Culleredo e o da Coruña. O BNG considera imprescindíbel estabelecer e construír espazos de diálogo entre concellos con problemas comúns, que deben solucionarse conxuntamente, pois Oleiros non é unha illa na comarca. En terceiro lugar, actualmente existe unha Lei de Protección do Litoral que debería ser considerada polo Concello de Oleiros. E debe ser así non só por unha cuestión legal, mais tamén pola máis elemental ética ecolóxica a respeito do noso contorno mariño, fonte de riqueza natural e paisaxística, turística e económica. En cuarto lugar, hoxe en día existe un Decreto de Normas do Hábitat Galego que no inicio do Plan Xeral non existía. Debe considerarse o referido decreto polo benestar e pola calidade de vida, calidade habitacional, das cidadás e dos cidadáns, e non priorizando intereses inmobiliarios particulares, alén de que os decretos están para ser cumpridos. En quinto lugar, existe unha Lei de Vivenda que tamén debería terse en conta por este goberno para poder presentar o Plan Xeral á súa aprobación. Non se pode levar adiante un Plan Xeral sen considerarse aos ollos dunha lei (neste caso nada menos que a Lei de Vivenda!), nomeadamente cando o Plan pretende intensificar a construción de vivenda no concello en circunstancias de crise no sector inmobiliario, así como das dificultades para o acceso a vivenda, etc. Ademais, en sexto e sétimo lugar, non se somete o PXOM ao Plan Director do Aeroporto de Alvedro (AENA), que é preceptivo, nin se considera o tamén preceptivo Informe Medioambiental correspondente. Téñase en conta que unha zona do noso concello está afectada polas servidumes acústicas de Alvedro.

Por iso, por todas as razóns aducidas, xa que a situación actual dista moito de ser a de hai case tres anos, debido a que as modificacións e cambios acontecidos nos últimos anos no plano económico, normativo e legal poden condicionar en grande medida o documento municipal, o BNG solicitou en tempo e forma por escrito ao goberno local a apertura dun novo período de exposición e xa se instou os outros grupos a exixiren de novo esta medida ao Concello de Oleiros como garantía de transparencia e de respeito dos dereitos das veciñas e dos veciños. Despois de case 3 anos de atraso acumulados desde a aprobación inicial, un mes máis que garanta unha actuación transparente por parte do Concello non debería preocupar ao goberno municipal. Polo tanto, perante a convocatoria dun Pleno extraordinario por parte do Concello de Oleiros para esta quinta feira (xoves) 29, para a aprobación do PXOM de Oleiros, o BNG propón que se non hai unha nova exposición pública pactada previamente con posibilidade de presentar alegacións, que ao finalizar o Pleno ordinario axendado para as 20h00, se ausenten os grupos da oposición e non acudan ao pleno extraordinario posterior. A falta de respeito e de diálogo e as imposicións do goberno local obrigan o BNG a tomar esta decisión de non acudir ao pleno extraordinario do PXOM se non se abre un período de exposición pública con posibilidade de presentar alegacións. Convocamos o resto de formacións políticas da oposición a ausentarse de non se abrir o referido prazo.

APOIEMOS A MANIFESTACIÓN EN DEFENSA DA RÍA DO BURGO

PLATAFORMA PARA A DEFENSA DA RÍA DO BURGO

Plataforma para a defensa da Ría do Burgo Reproducimos aquí o texto da Moción que o BNG apresentará en todos os concellos da Comarca: Texto da Moción: A Ria do Burgo atópase desde fai anos nun lamentábel estado de contaminación por mor dos continuos verquidos de augas resuiduais procedentes de diversos concellos da Comarca da Coruña. Ademais do tremendo impacto ambiental que esto implica tamén debemos ter en conta as negativas repercusións sobre a actividade pesqueira. Trátase dunha zona de tradicional labor marisqueira, actividade da que viven moitas familias da comarca. A Coruña é a única cidade do estado español con máis de 200.000 habitantes que carece de saneamento de augas residuais. Máis de 400.000 habitantes da Area coruñesa verten as súas augas residuais directamente ao mar, na Ria do Burgo ou en Bens, sen depuración algunha e provocando graves consecuencias ambientais e económicas sobre a pesca o marisqueo e o turismo. O certo é que a estas alturas xa debería estar funcionando a estación de- puradora de Bens e arranxado o emisario submariño. Tratándose dunha zona densamente poboada deberíase contar cun sistema de depuración segundo as directivas da UE. Nestes intres a situación é tan delicada que a zona está declarada, pola Consellaría de Pesca , como zona “C”, por mor da alta contaminación e degradación medioambiental que padece. O BNG amosou sempre a súa preocupación polo saneamento da Ría do Burgo e nesa liña fixo un intenso traballo tanto no Parlamento de Galiza coma no Congreso dos Deputados. É preciso recordar que grazas a ese intenso traballo negociouse a inclusión nos orzamentos do Estado para o ano 2007 unha partida de 8 millóns de € destinada a limpeza, rexeneración e saneamento da Ría do Burgo e dos ríos Ulla, Limia e Miño na súa desembocadura. De igual xeito acordouse unha partida concreta de 1 millón de € para a rexenaración da Ría nos orzamentos de 2008. Por mor da constante e crecente preocupación social do grave deterioro da Ría constituiuse recentemente unha plataforma para a súa defensa. Ademáis da confraría de pescadores da Coruña, agrupación de mariscadores de a pé e a flote , tamén están diversas entidades veciñais, colectivos, sindicatos e partidos políticos. O fin non é outro que demandar a firme actuación na aplicación da lei para os causantes directos e indirectos de verquidos á Ría, a finalización do proxecto integral de saneamento para eliminar os importantes focos de contaminación que van directamente á Ría, a posta en funcionamento da EDAR de Bens, a definición consensuada coas asociacións de marisqueo dun plano de rexenearión medioambiental de limpeza integral da Ría do Burgo para o goce e lecer cidadán ,a recuperación dos bancos de marisqueo e finalmente defender a vixencia temporal e indefinida dos actuais convenios subscritos entre a Consellaría de Pesca e as Agrupacións de Marisqueo mentras non se poida desenvolver con normalidade a actividade marisqueiras. Co fin de demandar das diferentes administracións públicas responsábeis as cuestións manifestadas con anterioridade a Plataforma para a defensa da Ría do Burgo convocou para o vindeiro sábado 21 de xuño ás 19:30 h. unha manifestación co lema “Recuperemos a Ría do Burgo”. Por todo isto o grupo municipal do BNG solicita a adopción do seguinte acordo: 1. O pleno da corporación municipal vista a grave situación medioambiental que sufre a Ría do Burgo por mor dos contínuos verquidos apoia as reivindicacións da Plataforma e a convocatoria da manifestación do día 21 de xuño ás 19:30 h. baixo o lema “Recuperemos a Ría do Burgo”.

Exixirei a apertura dun novo prazo de exposición pública do Plan Xeral

Exixirei ao Concello a apertura dun novo prazo de exposición pública do PXOM e as posibilidades de presentar alegacións debido a que en case 3 anos desde a aprobación inicial ten habido modificacións importantes tanto pola Lei de Protección do Litoral, Lei de Vivenda e Decreto das Normas do Hábitat, que poden condicionar en grande medida o documento municipal.

Desde o BNG xa lle temos solicitado por escrito ao goberno local a apertura deste novo período de exposición e xa instamos a que os outros grupos exixan de novo esta medida como garantía de transparencia e de respeito dos dereitos das veciñas e dos veciños.

Despois de case 3 anos de atraso acumulados desde a aprobación inicial, un mes máis non debería repercutir negativamente nun Plan que debería ser o Plan de todas e todos, e non só ser o Plan do goberno apoiado por intereses partidistas dalgún grupo, como ocorreu cos orzamentos municipais, que foron aprobados cos votos da dereita.

En calquera caso, o Plan de Oleiros debería contemplar obrigatoriamente a adaptación deste á nova situación económica que deixa ben claro que a cantidade de vivendas que se pretenden construír enfronta unha situación de crise, razón pola que se deben crear alternativas de crecemento económico non dependentes do urbanismo e orientadas a outros intereses económicos como o turismo, a industria e o comercio, alternativas estas que non se contemplaban no momento de redacción do documento, co peso que neste momento merecen para contrarrestar o parón inmobiliario.

Por outra banda, débese definir claramente o sistema de vivenda de promoción pública, e mais o sistema de vivendas de aluguer, para que Oleiros se integre no Rexistro Único de Demandantes de Vivenda e fomente a construción de vivenda de promoción como alternativa ao retroceso de vivenda libre. Débe contemplarse tamén a alternativa de creación de transporte público nunha área metropolitana colapsada despois de 5 lustros de caos na planificación, nunha área metropolitana que viu medrar a súa poboación sen que se criasen alternativas de transporte viarias e da rede de ferrocarril e marítima para absorber ese incremento.

Outra das necesidades esenciais é a criazón de alternativas a edificacións faraónicas sen contido, e a necesidade de criar servizos previamente ao incremento poboacional contemplado polo documento. En conclusión, é preciso facer un concello máis habitábel e en que poidamos vivir todas e todos independentemente da renda de cada persoa, un concello para toda a xente, e non só para aquelas clases privilexiadas que converteron Oleiros nos últimos tempos nun concello elitista

Facéndomos un intenso traballo

Seguindo coa rolda de entrevistas con diversas entidades, onte despraceime a visitar, cos meus compañeiros Antón Tenreiro e Xurxo Dopico, a Fundación Juana de Vega, que está a desenvolver numerosos proxectos de arquitectura da paisaxe e que realiza varios proxectos coa Universidade da Coruña e coa Universidade de Santiago de Compostela. Aproveitei tamén a visita para coñecer así de primeira man as instalacións da referida fundación na parroquia de Nós, no Pazo da Carballeira. Visitamos tamén a Fundación Tenreiro, que conta tamén con terreos da parroquia de Nós, e en ambas as fundacións amosáronme a preocupación que teñen polo deseño unilateral do destino dos terreos destas fundacións por parte do goberno local, que non ten realizado ningunha consulta nin efectuado ningún contacto con ningunha destas entidades a este respeito, e é preciso subliñar que no caso da Fundación Espoz e Mina (Fundación Juana de Vega) amosou sempre a súa vontade colaboradora co Concello cedendo unha parte dos terreos do Pazo da Carballeira, cedendo ao Concello o campo de fútbol do Hércules de San Pedro, e prestando a escoliña de Vilanova para uso educativo e social. A Fundación Tenreiro ten tamén unha escola infantil e un Centro de Día en Eirís (A Coruña) e uns terreos que agora se pretenden deixar integramente para equipamentos e onde o Concello quere urbanizar o contorno nunha operación de claros intereses inmobiliarios especulativos.

Tamén me despracei á Asemblea da Plataforma en Defensa da Ría do Burgo, que está a preparar unha mobilización para o día 21 de Xuño, unha manifestación que conta co apoio do BNG de Oleiros e onde estaremos para apoiar as reivindicacións da Plataforma en Defensa da Ría do Burgo, que leva recollidas xa máis de 12000 sinaturas de apoio.

Continuamos traballando.

A nave das redeiras de Lorbé abrirá en breve