Oleiros, que sempre destacou por ter iniciativas singulares, non conta cun tanatorio nin público nin privado. Loxicamente desde o BNG non imos defender nin propor que se faga un investimento privado para este servizo. O que defendemos é que o Concello de Oleiros, que ten a dotación de solo público destine algunha parcela para crear un servizo hoxe inexistente e que ademais xere recursos para o concello e que se poida xestionar de maneira que oferte servizos máis accesíbeis para aquelas persoas coas rendas máis baixas, e que conte coas máis completas propostas deste tipo de actividade, como poden ser un crematorio, servizo de florestaría, capela, etc. Este tanatorio sería o único de iniciativa pública da nosa comarca e atendería unha grande cantidade de demanda de persoas que se ven obrigadas a se desprazaren ao Graxal ou a Pompas Fúnebres da Coruña, cando son xente nacida ou criada en Oleiros e que verían con agrado que para o futuro tivésemos onde poder velar polas persoas falecidas nun moderno tanatorio, que facilitase a xa de por si difícil situación a que se enfronta unha persoa cando pasa por unha situación como a referida.

Agardo que por ser unha idea do BNG non se esqueza esta iniciativa que a min me teñen comentado persoalmente moitas veciñas e veciños, que manifestan o seu desagrado por ter que se desprazaren ao Graxal ou a Pompas Fúnebres da Coruña, cando son persoas que naceron ou viven en Oleiros e que verían con aprobación que para o futuro contásemos cun moderno tanatorio, público e municipal.