FINA QUINTÁNS INICIA UNHA ROLDA DE ENTREVISTAS COS REPRESENTANTES DOS CLUBES DE FÚTBOL DO CONCELLO DE OLEIROS

Fina Quintáns comezou esta semana unha rolda de encontros cos representantes dos clubes de fútbol do concello de Oleiros. Na tarde de hoxe xoves a portavoz do BNG no Concello de Oleiros mantivo unha entrevista con Roberto Pintos, presidente do Hércules de San Pedro, e Manuel Tellado, vicepresidente tamén do mesmo equipo. O obxectivo desta rolda de entrevistas que iniciou hoxe Fina Quintáns é o de coñecer de primeira man, a través dos máximos representantes das directivas de cada un dos equipos de Oleiros, aquelas necesidades que teñen os clubes de fútbol do noso concello.

Na reunión mantida na tarde de hoxe xoves nas inmediacións do campo de fútbol do Hércules de San Pedro entre Fina Quintáns e militantes do BNG de Oleiros co presidente e vicepresidente do Hércules de San Pedro, a portavoz do BNG mostrouse especialmente interesada en coñecer as carencias e necesidades que ten actualmente o clube do Hércules.

Entre as necesidades que apuntaron Roberto Pintos e Manuel Tellado están a limpeza do río das proximidades, así como tamén do paseo á beira do río, que se encontran a escasos metros do campo de fútbol, e indicaron que “o adecentamento do río xa estaba no proxecto da Urbanización do Mesón da Auga”, referindo que “non se fixo a limpeza do río que se debería ter feito nestes últimos 8 anos de retrasos na urbanización’’, o que sen dúbida beneficiaría o contorno deixando un paseo agradábel á beira do río. Pintos e Tellado salientaron tamén que “sería necesario cerrar o recinto deportivo cun valado de formigón de máis de un metro de altura e cun valo metálico, porque hai persoas que entran sen permiso no campo con motocicletas”.

Os responsábeis do Hércules de San Pedro comunicaron tamén a Fina Quintáns que “os 18 aspersores que posúe o campo de fútbol do Hércules non teñen a presión suficiente” e indicaron que “a solución é introducir uns depósitos de propano para meter un motor que teña a presión necesaria para regar” especificando que precisarían dun “sistema automático para programar o rego”. Outra necesidade que apuntaron os directivos do Hércules foron as redes de 190 metros de longo por 10 metros de alto, así como a limpeza nunha das esquinas onde se debería proceder a “un transvase de terra que provoca problemas, nomeadamente cando chove”.

Os responsábeis do Hércules de San Pedro fixeron chegar a Fina Quintáns o seu interese por colocar as novas tecnoloxías ao servizo do equipo que dirixen, e indicaron que necesitan que lles chegue a rede de telefonía para poder conectarse á internet. Afirmaron que o alcalde xa se comprometeu con eles en disponibilizar a rede de telefonía, mais que polo momento aínda non fixo nada ao respecto. Roberto Pintos e Manuel Tellado comunicaron a Fina Quintáns que tamén están esperando polo asfaltado até á ponte pola que se accede ás inmediacións do campo do Hércules, e indicaron que se debería reparar a ponte pois presenta unha esquina defectuosa que é un perigo para calquera persoa, especialmente para nenas e nenos.

Fina Quintáns indicou a Roberto Pintos e Manuel Tellado que o BNG está especialmente comprometido na defensa do deporte e que fará chegar ao alcalde de Oleiros estas demandas e as demandas do resto de responsábeis dos clubes de fútbol do concello de Oleiros cos que espera entrevistarse no transcurso das vindeiras semanas.

O BNG defende un Alvedro “plenamente operativo” e considera que as polémicas creadas “ocultan a falla de compromiso de PP e PSOE co aeroporto e cos problemas da comarca”

A dirección comarcal do BNG, lembra que “a pesar de que é competencia do Goberno Central, o BNG desde a Xunta de Galiza leva destinados case un millón de euros a financiar novas conexións en Alvedro, mentres que en 16 anos de Goberno do PP a Xunta non investiu un só euro no aeroporto”

A dirección comarcal do BNG da Coruña reafirma a postura da formación nacionalista en relación coa terminal de Alvedro, “que como defendeu historicamente o BNG da comarca, é a dun aeroporto plenamente operativo, con novas conexións e axeitadamente integrado no contorno urbano en que está situado”.

Neste sentido, a dirección comarcal do BNG considera que as polémicas creadas sempre arredor do aeroporto “só obedecen aos intereses de PP e PSOE de agocharen os problemas da comarca e de ocultaren a súa falta de compromiso co aeroporto”.

“Despois de 20 anos, os Gobernos do PP e do PSOE en Madrid non foron capaces de mellorar Alvedro”

En todo caso, a dirección comarcal do BNG subliña que a ampliación de Alvedro “é un asunto que depende do Ministerio de Fomento”.

A este respeito, o BNG critica especialmente que “desde hai vinte anos que se abriu Alvedro, os sucesivos gobernos estatais de PP e PSOE non foron quen nin tiveron a vontade política para que a comarca da Coruña teña o aeroporto que demanda”.

“A pesar de ser competencia estatal, o BNG desde a Xunta de Galiza leva destinados case 1 millón de euros en dous anos a Alvedro, o PP en 16 anos 0 euros”

Ademais, o BNG lembra que “nos 16 anos de gobernos do PP en Galiza, o aeroporto de Alvedro non recibiu nin un só euro dos orzamentos da Xunta”.

Pola contra, subliña que “coa chegada do nacionalismo á Xunta de Galiza houbo un cambio radical: a pesar de que é competencia do Ministerio de Fomento, e de que a Dirección Xeral de Transportes, dependente da Consellaría de Política Territorial, segue sen investir un só euro en Alvedro, a Dirección Xeral de Turismo da Consellaría de Innovación e Industria dedicou 300.000 € en 2008 a financiar novas conexións en Alvedro, estando reservados nos Orzamentos da Xunta para 2009 unha partida de 600.000 € para o mesmo fin”.

“É necesario que o Goberno galego xestione os aeroportos”

“O BNG aposta por un sistema aeroportuario galego, integrado e xestionado desde Galiza”. Salienta que “no caso de Alvedro, isto permitiría atraer novas conexións xa que sería o Goberno Galego e non AENA quen fixase as tasas aeroportuarias e negociase directamente coas compañías”.

“PP e PSOE queren utilizar Alvedro como cortina de fume para ocultar os problemas da comarca”

Por iso, desde o BNG comarcal considérase que a polémica creada “só obedece aos intereses do PP e do PSOE de agocharen problemas que poñen de manifesto a súa falta de compromiso coa comarca da Coruña, como a falta de saneamento da ría, a inexistencia dun sistema de transporte metropolitano por estrada e ferroviario, ou a situación de SOGAMA”.