O BNG anuncia novas medidas de presión polo incumprimento dos compromisos do alcalde cos accesos da praia de Naval

Logo de 13 anos dun proceso de expropriación sen rematar, de máis de 300 sinaturas recollidas polo BNG entre os veciños e veciñas da zona, presentadas no rexistro municipal, ademais dunha manifestación celebrada o pasado ano para reclamar o acondicionamento e mellora dos accesos da praia de Naval, as promesas e os compromisos asumidos polo alcalde seguen sen se realizar, e diante da reclamación de Fina Quintáns, portavoz do BNG no Concello de Oleiros, o alcalde negouse a asumir a execución desas promesas.

A praia de Naval, situada nun contorno urbano próximo á localidade de Santa Cruz de Liáns, dentro da parroquia de Dorneda, atópase, malia a grande afluencia de usuarios e usuarias que soporta, sen uns accesos dignos coas zonas públicas e privadas sen limpar, con camiños inseguros que rozan acantilados, con falta de iluminación e salubridade, e con nulos servizos para unha praia destas características.

Á vista da nula vontade do Concello e da incompetencia dos servizos municipais para daren solución a un problema tan antigo, o BNG trasladará aos veciños e veciñas da zona información sobre a situación novamente para acordar novas medidas para a mobilización e presión social que solucionen primeiramente a mellora dos espazos públicos existentes, e, logo, para resolver a obriga dos proprietarios privados de dar solución ao actual abandono ao finalizar dunha vez por todas o proceso de expropriación, para se realizar a execución do proxecto para ese contorno. A portavoz do BNG no Concello de Oleiros, Fina Quintáns, trasladará ao vindeiro Pleno unha moción nese sentido, e tntará que sexa apoiada polos outros grupos da oposición, para que sen máis dilación o goberno local de Oleiros se poña a traballar para mellorar a calidade de vida de numerosos núcleos abandonados no concello de Oleiros polo goberno local nas diferentes parroquias, núcleos abandonados que son a vergoña de veciñas e veciñas e das persoas que nos visitan, nun concello que presume de modélico mais que practica de facto desequilibrios no investimento en función de antollos políticos.