5 Xaneiro, 2010
Sen clasificar
Non hai comentarios
A pesar de que Ignacio Santos, o director xerente da S.A. de Xestión do Plan Xacobeo, visitou hai un mes Oleiros para impartir unha charla no Castelo de Santa Cruz, o responsábel desta sociedade anónima de xestión do Xacobeo desaproveita a oportunidade para anunciar a celebración dun grande concerto en Santa Cristina tale como se realizara nos anteriores xacobeos cos concertos máis multitudinarios da historia de Galiza. Mike Oldfield, Luar na Lubre e The Corrs, por unha banda, e Carlinhos Brown e Orishas pola outra, congregaron na praia de Santa Cristina máis de 100.000 persoas en cada un dos concertos, cifra nunca igualada canto a asistencia de público nin sequera nos concertos organizados no Monte do Gozo.
Oleiros e o conxunto da comarca, así como a hostelaría e a promoción turística en xeral de todo o contorno, saen claramente prexudicados por unha decisión política sobre un acto con sobrada garantía de éxito a xulgar polos eventos organizados para este fin con anterioridade. Mentres tanto, o parlamentario e portavoz do PP de Oleiros garda silencio sobre o maltrato institucional por parte do goberno da Xunta ao noso concello, negándose a construír outra galescola, co anuncio de privatización do novo centro de día, coa negativa a esponsorizar a ciclista oleirense Eva Castro, non mellorando os accesos dos veciños/as dos Tornos á Vía Ártabra, a falta de compromiso coa gratuidade no que respeita aos Centros de Saúde, a negativa a construír unha polideportiva no IES Xosé Neira Vilas, a falta dun centro de ensino primario en Nós, ou co recorte orzamentario a institucións como o CEIDA.
Sen dúbida, este ano os Reis Magos no que afecta as políticas do goberno da Xunta deixan Oleiros de lado.
4 Xaneiro, 2010
Sen clasificar
Non hai comentarios
O BNG de Oleiros inciará a vindeira semana unha campaña para exixir a xestion pública do novo Centro de Día das Galeras contruído polo Consorcio Galego de Servizos de Igualdade e Benestar, que conta cunha capacidade para 80 usuarios/as, capacidade que é unha das máis altas de Galiza.
Diante da pretensión do goberno do Partido Popular de privatizar a xestión de 14 novos centros de día que deberan entrar en funcionamento este ano e entre os cales se atopa o de Oleiros, o BNG realizará en Oleiros unha campaña de recollida de sinaturas e a realización de charlas informativas para que se manteña o carácter público dos servizos sociais, e para que non se utilicen estes como unha mera beneficiencia ou servizos con ánimo de lucro para empresas privadas ou fundacións, como o caso da Fundación San Rosendo liderada polo condenado crego Moure, que foi sentenciado por ter estafado propriedades de vellos que recibían asistencia nos seus centros.
O Centro de Día de Oleiros foi construído en terrreos públicos municipais e financiado con cartos do Concello e da Xunta de Galiza, e no seu convenio figura o compromiso de xestión pública do mesmo e non a externalización de servizos por conta de empresas privadas. Por iso, no BNG de Oleiros defenderemos que a xestión do futuro centro das Galeras sexa realizada conforme ao convenio asinado entre o alcalde de Oleiros e o ex vicepresidente da Xunta, ademais de defendermos que os servizos sociais no seu conxunto teñan ao igual que a sanidade carácter público universal.
O proxecto do Centro de Día de Oleiros foi realizado polo arquitecto Plácido Lizancos Mora, e o custe de execución deste aproxímase ao 1.500.000 €. A xestión prevista no convenio asinado entre o alcalde e a Vicepresidencia do anterior goberno obriga a confinanciación da xestión entre o Concello, o Consorcio e os usuarios/as cuns prezos públicos en función de porcentaxes da pensión líquida dos mesmos e nunca explotando os usuarios/as nin as súas familias.
21 Decembro, 2009
Sen clasificar
Non hai comentarios
Podes facer click sobre a imaxe da capa do voceiro nº 7
do BNG de Oleiros para o descarregares.
O Nº7 do noso voceiro local “BLOQUE OLEIROS”, editado neste mes de decembro de 2009, será distribuído polo concello de Oleiros nesta segunda quincena do mes. O voceiro do BNG de Oleiros conta con 4 páxinas a cores e con información destacada na capa a respeito do inicio das expropriacións dos accesos a Naval, logo de 8 anos de atrasos acumulados por parte do goberno local e logo de que a presión veciñal conseguise este logro contando sempre co apoio e a defensa constantes do BNG, participándomos coa xente na denuncia da situación na zona de Naval.
O voceiro do BNG inclúe tamén na segunda páxina unha entrevista co novo responsábel local do BNG, Antonio Ardá, profesor doutor da Facultade de Ciencias da Actividade Física e do Deporte, ademais de adestrador de fútbol, colaborador como crítico deportivo en medios como GZNACIÓN, etc.
Xa no apartado de “breves”, o voceiro do BNG recolle boa parte da actividade e do traballo desenvolvido por parte do BNG no concello de Oleiros con Fina Quintáns á fronte, tanto informacións respeito das múltiplas reunións que mantivo a portavoz municipal nos últimos tempos con cidadáns e cidadás particulares, asociacións e entidades de Oleiros, así como aquelas melloras demandadas por Fina Quintáns no Pleno Municipal de Oleiros, nas diferentes comisións do Concello, ou a través de iniciativas parlamentares que o noso parlamentario Carlos Aymerich e a nosa parlamentaria Ana Luísa Bouza defenderon no Parlamento galego con diversas perguntas parlamentares, etc.
Inclúe tamén o boletín informativo do BNG de Oleiros unha mención sobre aqueles compromisos mantidos polo BNG no goberno galego, proxectos e obras que demostran o compromiso do BNG con feitos, tales como o traspaso de dúas escolas infantís á rede pública galega de Galescolas, o Centro de Día das Galeras, as obras no estadio do INEF, os investimentos na reparación de camiños rurais, etc.
A contracapa do voceiro inclúe o posicionamento do BNG a respeito do PXOM de Oleiros, o noso apoio ao PXOM mantendo sempre como indispensábel a exposición pública do documento, cun período de alegacións correspondente logo das modificacións introducidas, nun exercicio de transparencia e democracia que sempre mantivemos e manteremos, reafirmando o noso compromiso co dereito dos cidadáns e cidadás a se informaren a respeito do documento máis importante que se aproba nun concello. Séndomos conscientes da importancia deste documento, criticamos a ineficacia do goberno local para conseguir que este sexa aprobado definitivamente debido á permanente confrontación coas administracións por parte do alcalde. Asimesmo, criticamos tamén que o PP en Oleiros e Pablo Cobián á súa fronte sexan incapaces de traballar a favor do noso concello no goberno da Xunta de Galiza, e que se dediquen a entorpecer o PXOM, prexudicando o noso concello. Como indicamos na contracapa, “no BNG consideramos que Oleiros non precisa de polémicas senón de solucións”.
9 Decembro, 2009
Sen clasificar
Non hai comentarios
O BNG de Oleiros mobilizarase en contra da privatización do novo Centro de Día que se está a construír na urbanización das Galeras.
A Consellaría de Traballo e Benestar pretende privatizar todos os centros de día construídos en terreo público doados polos concellos e construídos tamén con diñeiro público para dar negocio a empresas privadas a costa das persoas maiores. Os servizos sociais deben ter carácter público da mesma maneira que a sanidade ou a educación o son e en ningún caso debe utilizarse o diñeiro público da cidadanía para beneficiar intereses privados.
O Centro de Día de Oleiros terá unha capacidade para 80 persoas usuarias, e será un dos maiores de Galiza. O proxecto foi realizado polo arquitecto Plácido Lizancos e o seu custe achégase ao millón e medio de euros. Entendemos que o Concello debe manifestarse en contra da súa privatización e que debe tamén manter os prezos públicos de carácter social que o Consorcio Galego tiña para estes centros, que facían posíbel a independencia económica das persoas de idade a respecto das súas familias e evitaban tamén a posibilidade de unha empresa se lucrar a costa das necesidades de atención destas persoas, posibilitando ademais a conciliación da vida laboral e familiar das súas familias do mesmo xeito que as galescolas. Parécenos extremamente grave que o PP dilapide un sistema público, nomeadamente, neste caso, un sistema público dedicado aos nosos maiores.
No BNG de Oleiros mobilizaremos a cidadanía en contra da privatización do Centro de Día oleirense.
4 Decembro, 2009
Sen clasificar
Non hai comentarios
O BNG de Oleiros trasladou na mañá de hoxe a través da súa portavoz Fina Quintáns numerosas propostas ao Consello de Administración do Organismo Autónomo Municipal de Cultura entre as que destacan as seguintes:
-Aumentar a compra de novidades literarias nas bibliotecas públicas e amplialas a máis bibliotecas que a da Rialeda.
-Criar para as bibliotecas públicas baremos de promoción interna dentro do persoal destas.
-Instalación de rede wi-fi en todas as bibliotecas do concello, con acceso libre e gratuíto.
-Criación e posterior aprobación dun baremo obxectivo de valoración para a concesión de subvencións a clubes deportivos, colexios, asociacións, etc., que evite desigualdades en función de simpatías ou afinidades políticas na concesión de axudas.
-Solicitude de que se tomen medidas concretas a respeito das ilegalidades cometidas pola empresa concesionaria da Escola Municipal de Música de Oleiros e evitar que a situación remate en procedementos xudiciais.
-Recuperar a tradicional festa das Letras Galegas coincidindo coa conmemoración no vindeiro 17 de maio do Día das Letras Galegas dedicado a Uxío Novoneyra. A referida festa das Letras Galegas era celebrada anteriormente de maneira itinerante polas diferentes parroquias.
4 Decembro, 2009
Sen clasificar
Non hai comentarios
O BNG de Oleiros xa propuxo hai 8 anos a instalación dun elevador na Casa Charry para facilitar o acceso ao primeiro andar deste edificio público onde está situada a Sala de Exposicións xuntamente co Salón de Plenos. O BNG xa realizou esta proposición hai 8 anos para que todas as persoas, independentemente das posíbeis discapacidades físicas que puderen ter, poidan acceder ao Pleno Municipal do Concello de Oleiros presenciándoo in situ.
Hai precisamente 8 anos, e desde hai bastante máis tempo, o xornalista de La Voz de Galicia José Manuel Pan, que cubría os plenos municipais de Oleiros, tiña que acceder ao Salón de Plenos polas escaleiras nos brazos da policía municipal e, deste xeito, as persoas discapacitadas que querían e queren estar no Pleno Municipal como calquera outro veciño ou veciña, non podían nin poden exercer este dereito en igualdade de condicións, como debera ser. Foi por ese motivo polo que o BNG xa expuso no seu momento a instalación no recinto público da Casa Charry dun elevador que facilitase o aceso aos plenos municipais. O BNG de Oleiros realizara naquela altura un dossier dos edificios públicos onde se mantiñan barreiras arquitectónicas que non permitían o libre acceso a toda a cidadanía, e a día de hoxe moitas destas instalacións atópanse nunha situación semellante á daquela época.
Ao BNG de Oleiros comprácelle que o goberno local copie as iniciativas previamente propostas polo BNG, mais lamenta que a toma de decisións ao respeito de asuntos tan importantes como a eliminación de barreiras arquitectónicas sexa tan lenta, mentres que obras de tipo menor e menos urxentes reciben por parte do goberno local unha cantidade económica maior e realízanse con máis premura porque son rendábeis electoralmente e porque se utilizan de xeito partidista. Neste anos téñense instalado elevadores en edificios como a Casa Echeverry de Perillo, con cargo a fondos doutras administracións, mais o dereito universal á asistencia aos plenos estaba coartado para veciños e veciñas que tiñan e teñen algún tipo de discapacidade física que combinada coas barreiras arquitectónicas existentes así o impedía e impede. Malia o tempo transcorrido por causa de o goberno local se demorar na criación dun elevador na Casa Charry, o BNG de Oleiros congratúlase de este tome en consideración as nosas propostas que van encamiñadas para a mellora social e a igualdade.
3 Decembro, 2009
Sen clasificar
Non hai comentarios
A anterior Dirección Xeral de Deportes do bipartito comprometeuse coa remodelación do estadio do INEF que xa foi realizada e tamén comprometeu unha partida para a remodelación posta en funcionamento que se atopa na parte traseira do estadio dentro do parque metropolitano.
A remodelación desta pista inclúe os accesos e a mellora xeral da instalación para evitar que os adestramentos e competicións de lanzamentos deterioren o estado do novo campo de herba do estadio e dá cabida ao amplio colectivo de lanzadores que adestran agora nas instalacións do INEF. Esta emenda prodúcese porque o Partido Popular non incluíu ningunha partida destinada a este fin na proposta orzamentaria e era un compromiso adquirido pola anterior conselleira de Cultura e Deporte Ánxela Bugallo co reitor da Universidade da Coruña e o decano do INEF.
25 Novembro, 2009
Sen clasificar
Non hai comentarios
O goberno local incumpre as súas obrigas pois en vez de velar polos intereses de todos os veciños e veciñas do concello toma partido na defensa de ilegalidades por parte de empresas concesionarias de servizos públicos municipais, como a que xestiona a Escola Municipal de Música, a pesar dos moitos problemas laborais, educativos e de xestión que existen nela. Ademais, estes problemas prexudican a imaxe do concello e o goberno local négase a tomar medidas contra unha empresa que debe indemnizar os veciños e veciñas de Oleiros por danos e prexuízos, e que debe responder das incompatibilidades das persoas proprietarias. Quizais o alcalde, imputado por un delito de negociacións prohibidas a funcionarios se sinta solidario.
Artigo de Fina Quintáns para o próximo número da publicación municipal Vivir en Oleiros.
20 Novembro, 2009
Sen clasificar
Non hai comentarios
O BNG de Oleiros, através da súa concelleira-portavoz no Concello de Oleiros, Fina Quintáns, apresentou na mañá de hoxe venres 20 de novembro a moción que reproducimos a seguir, que poñemos en coñecemento público.
AO ALCALDE-PRESIDENTE DO CONCELLO DE OLEIROS
AO PLENO DA CORPORACIÓN MUNICIPAL DO CONCELLO DE OLEIROS
Josefina Quintáns Antelo, concelleira-portavoz do Grupo Municipal do BLOQUE NACIONALISTA GALEGO de Oleiros, ao abeiro do art. 25 do ROM e art. 97.3 e 91.4 do RD 2568/1986, de 28 de novembro), somete a consideración do Pleno da Corporación a seguinte
MOCIÓN RELATIVA AO ACORDO DE INCOACIÓN PARA A REVISIÓN DE OFICIO DO CONTRATO DE CONCESIÓN DE XESTIÓN DA ESCOLA DE MÚSICA
(Para o seu debate e aprobación, se procede, no próximo pleno ordinario do Concello de Oleiros)
EXPOSICIÓN DE MOTIVOS
PRIMEIRO.- Determina o art. 31 da Lei 30/2007, de 30 de outubro, de Contratos do Sector Público (LCSP) que constitúe un suposto de invalidez dos contratos “cando o sexa algún dos seus actos preparatorios ou os de adxudicación provisoria ou definitiva, por concorrer neles algunha das causas de dereito administrativo..” a que se refire o artigo 32 de dita lei.
No apartado b) do artigo 32 da LCSP (Causas de nulidade de dereito administrativo) estabelécese que é causa de nulidade de dereito administrativo o feito de estar incurso o adxudicatario “…nalgunha das prohibicións para contratar sinaladas no artigo 49”.
No artigo 49.1.f) de dita LCSP, ao regular as prohibicións para contratar, inclúese na citada prohibición a de “Estar incursa a persoa física ou os administradores da persoa xurídica nalgún dos supostos da Lei 5/2006, do 10 de abril, de regulación dos conflitos de intereses dos membros do Goberno e dos altos cargos da Administración xeral do Estado, da Lei 53/1984, do 26 de decembro, de incompatibilidades do persoal ao servizo das administracións públicas, ou tratarse de calquera dos cargos electivos regulados na Lei orgánica 5/1985, do 19 de xullo, do réxime electoral xeral, nos termos estabelecidos nela.
A prohibición alcanzará as persoas xurrídicas no capital das cales participen, nos termos e contías estabelecidos na lexislación citada, o persoal e os altos cargos de calquera Administración pública, así como os cargos electos ao servizo destas…”.
O artigo 50 da LCSP precisa, ademais, que a citada prohibición de contratar , “…será apreciada directamente polos órganos de contratación, e subsistirán mentres concurran as circunstancias que en cada caso se determinen”
O artigo 12.1.c) da Lei 53/1984, de 26 de decembro de Incompatibilidades do persoal ao servizo das Administracións Públicas estabelece que o persoal incluído no seu ámbito de aplicación non poderá exercer a actividade de “O desempeño, por si ou por persoa interposta, de cargos de toda orde en Empresas ou Sociedades concesionarias, contratistas de obras, servizos ou suministros, arrendatarias ou administradores de monopolios, ou con participación ou aval do sector público, calquera que sexa a configuración xurídica daquelas”. E na letra d) do mesmo artigo se prohíbe tamén “A participación superior ao 10% no capital das Empresas ou Sociedades á que se refere o párrafo anterior”.
SEGUNDO.- De acordo coa información facilitada polo BNG de Oleiros (rexistrada formalmente o pasado 14 de novembro de 2009 con nº de rexistro de entrada 2009020652):
a) A empresa MUSICORUÑA, adxudicataria da concesión de xestión da Escola Municipal de Música, é propriedade de D. Ismael Vaquero Baquero NIF 35.306.991J e Dona Aránzazu Vera Beltran NIF 46.896.927L que son persoas funcionarias do corpo de profesorado de música e artes escénicas, con destino no Conservatorio da Coruña, e de GEMMA VERA BELTRAN con NIF 47.357.425 B (non é funcionaria). As persoas citadas que son funcionarias son tamén socias fundadoras da empresa MUSICORUÑA, SL, con CIF B15913148 e domicilio na “Rúa do Río, 71-1ºB” da Coruña (CP 15011), e de acordo co informe do Rexistro mercantil achegado, cada unha destas persoas é titular de mil catrocentas oitenta e cinco participacións da sociedade (33,3%), restando unicamente 39 participacións que pertencen a outra persoa.
b) Dona Aránzazu Vera Beltrán é administradora solidaria de MUSICORUÑA, SL desde a súa constitución e D. Ismael Vaquero Baquero foi nomeado apoderado, con plenitude de facultades de control e dirección da empresa (BORME 26/2/09 p 102067 – Musicoruña SL (R.M. A coruña).
TERCEIRO.- En consecuencia cos datos anteriores, concorre en Musicoruña S.L o suposto de prohibición de contratar coas Administracións Públicas que estabelece o art. 49.1.f) da LCSP (en relación co art. 12.1.c) da Lei 53/1984, de incompatibilidades), en tanto en canto persoal suxeito ao ámbito de aplicación da Lei 53/1984 ostenta a condición de partícipe en máis do 10% dunha entidade xurídica concesionaria, da que, ademais, ostentan a condición de cargos orgánicos da mesma (administrador e apoderada).
Faise constar ao respecto que de resultar de aplicación a lexislación contractual pública anterior (RDL 2/2000, de 16 de xuño, de texto refundido da Lei de Contratos das Administracións Públicas, LCAP) a prohibición de contratar (art. 20.e) LCAP) e os seus efectos (art. 22 LCAP) son os mesmos, a nulidade das adxudicacións.
CUARTO.- O artigo 34 da LCSP (Revisión de Oficio) estabelece, no seu apartado primeiro, que “A revisión de oficio dos actos preparatorios e dos actos de adxudicación provisoria ou definitiva dos contratos das administracións públicas e dos contratos suxeitos a regulación harmonizada efectuarase de conformidade co establecido no capítulo primeiro do título VII da Lei 30/1992, do 26 de novembro”, engadíndose a continuación, no seu apartado segundo, que “…serán competentes para declarar a nulidade destes actos ou declarar a súa lesividade o órgano de contratación, cando se trate de contratos dunha Administración públlica”.
QUINTO.- Procede a revisión de oficio, para a súa nulidade, do contrato adxudicado a Musicoruña S.L, sendo a citada revisión unha obriga para toda Administración Pública, ao concurrer un suposto de nulidade e invalidez contractual, nulidade contractual que leva aparellada os efectos e consecuencias xurídicas previstas no art. 35 da LCSP. É polo que o Grupo Municipal do BNG de Oleiros somete a consideración do Pleno da Corporación a adopción do seguinte
ACORDO
1. Ao considerar que concorre o suposto de prohibición para contratar da entidade Musicoruña S.L, previsto actualmente no art. 49.1.f) da LCSP (anteriormente no art. 20.e) da LCAP) e, en consecuencia, levar aparellado a súa invalidez por nulidade de dereito administrativo, procede que por parte do órgano de contratación se incoe o preceptivo expediente de revisión de oficio do referido contrato, de acordo co procedemento previsto no art. 102 da Lei 30/1992, de 26 de novembro.
2. Instase á Alcaldía-Presidencia do Concello de Oleiros á execución e cumprimento do presente acordo, debendo proceder a convocar sesión do órgano de contratación aos efectos de incoación de expediente de revisión de oficio, para a súa nulidade, do contrato de concesión de xestión da Escola de Música efectuado á adxudicataria Musicoruña S.L.
Oleiros, 20 de novembro de 2009
FINA QUINTÁNS ANTELO
Portavoz do BNG no Concello de Oleiros
19 Novembro, 2009
Sen clasificar
Non hai comentarios
A empresa concesionaria da Escola Municipal de Música de Oleiros ten un contrato nulo por non ter concedida nin solicitada a compatibilidade perante a Xunta
Confirmado que a empresa MUSICORUÑA S. L., concesionaria da Escola Municipal de Música de Oleiros nin ten concedida nin solicitada a compatibuilidade dos seus socios para exerceren estes como funcionarios no Conservatoria da Coruña e na Escola de Oleiros, confírmase tamén o seguinte:
1.- Ou ben a empresa mentiu ao Concello de Oleiros coa posterior e conseguinte complicidade deste, ou os servizos técnicos municipais amosan unha incompetencia para o control do concurso e do posterior seguimento do contrato.
2.- Este contrato coa empresa xestora é nulo e, polo tanto, esta debe indemnizar o Concello por danos e prexuízos e convocarse un novo concurso.
3.- O alcalde incumpriu deliberadamente as súas obrigas, ao defender unha ilegalidade negándose a investigala, beneficiando unha empresa tramposa e prexudicando unha empresa tramposa e prexudicando o conxunto dos veciños e veciñas de Oleiros, ao ser esta unha Escola Municipal.
4.- O alcalde por este feito convértese nun cómplice dunha ilegalidade evidente.
O BNG apresentará unha iniciativa no Parlamento de Galiza para que a Xunta exercite o expediente sancionador que lle corresponde cos funcionarios titulares desta empresa e a propria MUSICORUÑA polas súas actuacións ilegais e, ademais, que se depuren as responsabilidades polas neglixencias no Concello de Oleiros neste contrato.
A portavoz do BNG no Concello de Oleiros, Fina Quintáns, exixirá as desculpas correspondentes do Concello de Oleiros por causa da moción apresentada na pasada semana contra o BNG no Consello de Administración do Organismo Autónomo Municipal de Cultura, xa que agora se demostra que as denuncias do BNG estaban avaladas pola legalidade xurídica e que se alguén infrinxiu a lei foron o alcalde de Oleiros e a empresa concesionaria deste servizo.
« Entradas anteriores Entradas Recentes »
