GZ nuclear? Non, grazas. E non tamén á guerra!

O nacionalismo sempre foi unha forma de ollar o mundo desde Galiza. Sempre tivemos posición sobre os temas que máis preocupan á Humanidade. Non podía ser doutro xeito: defender a propia Terra é a mellor forma de defender a Humanidade.

Estes días a axenda política mundial está marcada por dous acontecimentos de extraordinaria envergadura: a ameaza nuclear no Xapón -infelizmente, máis que ameaza, incidente gravísimo xa consumado- e a intervención militar en Libia.

Sobre estas dúas cuestións o BNG ten fixado posición con clareza e sen ningunha ambigüidade, converxendo coas correntes de opinión máis progresistas e avanzadas do Planeta.

Verbo da enerxía nuclear, temos reivindicado o noso legado histórico. Desde o Xove Nuclear, Non até as mobilizacións contra as verteduras na foxa atlántica, o nacionalismo galego sempre defendeu a Terra e se opuxo ao uso dunha enerxía cun potencial destrutivo verdadeiramente aterrador. Quero dicir aquí que neste caso as teses históricas do nacionalismo galego son dunha modernidade extraordinaria. O tempo veunos dar a razón: a enerxía nuclear é unha ameaza para o futuro da Humanidade e ten que ser sinxelamente substituída por fontes de enerxía que non poñan en risco a vida no Planeta. Os apoloxetas de toda condición da enerxía nuclear -algúns políticos moi conspicuos do PP e do PSOE- hoxe por certo están calados como petos. Agardan, claro está, que escampe…

MILES DE CIVÍS INOCENTES MORTOS EN AFGANISTÁN E IRAQUE

GZ nuclear? Non, grazas. E non tamén á guerra, naturalmente. Que vai resolver a intervención militar en Libia? Absolutamente nada. Que resolveu en Afganistán ou Iraque? Como se protexe á poboación civil? Bombardeando? Esta forma curiosa de protexer os inocentes custoulle a vida a miles de civís indefensos en Afganistán ou Iraque.

O cinismo dos promotores desta agresión inxustificábel -Estados Unidos ao frente e o Estado español unha vez máis entre eles, antes con Aznar-PP, agora con Zapatero-PSOE- non ten limites. Por que se intervén en Libia e non en Bahrein, onde a monarquía feudal sufoca a sangue e lume un levantamento popular? Ben, en realidade, en Bahrein si que se intervén, através dun testaferro, o Exército de Arabia Saudí, pero non para porse ao lado do pobo senón do Rei represor! Cabe máis hipocresía?

O nacionalismo galego sempre estivo a favor do diálogo e da acción diplomática -chegando a sancións económicas se for necesario- como vía para resolver os conflitos. A vía militar non é tal, é só unha vía para a destrución e, iso si, para a anexión de territorios fértiles en gas e petróleo.


12345 (6 votos, media: 5,00
Loading ... Loading ...

Fai un comentario