Lugo, o PSOE e o Consorcio de Servizos Sociais

Imaxe moi rechamante a de hoxe nos xornais. Sonia Méndez e Loli Vieiro despois da xuntanza con representantes de Vicepresidencia e do Consorcio acusándonos de querer adoutrinar aos traballadores dos centros concertados coa Vicepresidencia. U-lo respecto por eses traballadores e traballadoras? Agora xa non se atreven a facer as afirmacións que facían sobre a aposta polo uso do galego nas galescolas, como se iso fose un delito. Claro, teñen que variar o discurso porque estamos ás portas dun proceso electoral fundamental para este país e o PSOE non as tén todas consigo.
Ídesme permitir que faga unha pequena reflexión escrita sobre a representación que mandou o concello de Lugo: Sonia Méndez, concelleira de Economía e Loli Vierio, concelleira de Educación. Xa as vexo entrando na reunión e á concelleira Loli Vierio toda alporizada e dicindo que o Consorcio é anticonstitucional!!!
O meu compañeiro Xosé Chorén xa dixo que a Orozco non lle sirve o funcionamento do Consorcio, aceptado polos alcaldes dos 263 concellos de toda Galiza adheridos, de todas as cores políticas, entre eles os alcaldes de todas as demais cidades galegas, porque non pode vender a súa xestión como actuación política propia.
Orozco e o PSOE deberían ter claro a estas alturas que os termos do Consorcio son os mesmos para todos os concellos adheridos. Non pode haber un Consorcio especial para o Concello de Lugo porque a Xunta non pode facer excepcións con ninguén.
Ademais o Concello de Lugo ten a posibilidade de deixar fóra do Consorcio aquelas gardarías que queira xestionar directamente, como fixo por exemplo o Concello de Santiago, polo que non se entende que o Goberno municipal do PSOE de Lugo siga decindo que non ao Consorcio.
Tamén é ben saber que o Concello de Lugo recibíu no ano 2005 da Xunta do Partido Popular 471.000 euros de axudas para as garderías, centros de día e axuda no fogar e neste ano 2008, da Vicepresidencia da Xunta que dirixe o BNG 815.000 euros para os mesmos conceptos. O BNG practicamente duplicou en tres anos os fondos que lle transfire ao Concello de Lugo!!!
Esta actitude de Orozco é lamentábel porque a quen prexudica realmente é aos cidadáns de Lugo, que vemos como a gardaría de San Xillao segue pechada polos caprichos deste señor.

O centro LUG

A Vicepresidencia da Xunta, a através da Dirección Xeral de Mocidade, acaba de abrir na nosa cidade o denominado Centro Lug, nas instalacións do que foron as residencias Irmáns Pedrosa e Eijo Garay. A nova denominación é Lug 1 e Lug 2. O Lug 1 (antes Irmáns Pedrosa) acolle unha residencia de estudantes de carácter público e o Lug 2 un centro de servizos múltiples dirixido á mocidade, pero non do seu uso exclusivo. Conta co centro afectivo sexual Quérote, coa Tradescola (escola de música tradicional), cun salón de actos, unha sala de exposicións, un magnífico albergue internacional, salas de usos múltiples e dentro de moi pouco locais de ensaio e gravación musical e audiovisual.
A verdade é que é unha iniciativa absolutamente novidosa para este país e para esta cidade. O goberno municipal de Lugo con Orozco, Basadre e Rielo á cabeza debería tomar nota deste tipo de iniciativas. Política real para a mocidade e avalada pola mocidade.

Xuventude crea en Lugo un centro multidisciplinar pioneiro

Novo atraso no Plan Xeral

Teoricamente o día 3 de decembro íase celebrar o pleno extraordinario para aprobar o Plan Xeral. Pero xa non vai ser así. Non vai ser así porque para poder facelo, este luns 17 teríannos que ter dado copia de toda a documentación e a nós non nos chegou nada… nin unha explicación. Será que como o PSOE xa tén ese semiacordo co PP para que llo aprobe sen máis, para que se van preocupar porque o BNG teña información e coñeza o plan. Todo o contrario, canto menos saibamos mellor, que así non podemos cuestionalos.
Cando dixemos que queríamos unha nova exposición pública era precisamente para que PP e PSOE non poidan actuar de costas aos cidadáns, para que dean contan das decisións que toman. O PSOE tivo que modificar o Plan porque Orozco perdeu a maioría absoluta, e o PP renuncia a introducir melloras, que seica para eles nas municipais eran irrenunciábeis, para que non haxa unha nova exposición pública. Vaia coherencia a súa!
No BNG témolo claro, o urbanismo de Lugo tén que cambiar e tén que beneficiar ás maiorías e non a unha única minoría.

Sobre o botellón

O Goberno municipal acaba de anunciar que está elaborando unha ordenanza que regule o botellón, aínda que máis que regular, falan exclusivamente de sancionar. Vaia por diante que eu creo que non hai que criminalizar o botellón e que tamén non ten discusión o dereito dos veciños e as veciñas de Lugo a poder descansar. Polo tanto, o que toca é intentar regular unha práctica que en ocasións entra en contradición cos dereitos cidadáns. Pero dereito tamén ten a mocidade a reunirse e a gozar do seu tempo ao ar libre sen que iso teña que xerar problemas e conflitos.
O que tamén está claro, é que antes de facer unha ordenanza deste tipo sería ben que o goberno escoitase a todas as partes, aos veciños, aos mozos e mozas, aos grupos da oposición. Pero non, Orozco e o PSOE prefiren facer o de sempre, ir pola vía da imposición, o que por certo nunca dá bos resultados. Agardo con impaciencia ver que propostas fai Orozco sobre este tema…

E pasou o G-20 ese

Xa pasou a famosa xuntanza do G-20 e tal e como dicía o venres pasado, poucas cousas novas nos trouxo. Trouxo unha imaxe clásica de homes con traxe e gravata e unha presenza absolutamente reducida de mulleres. Que pouco cambian as cousas!
E de que falaron? Falaron de ECONOMÍA. Falaron de economía con letras maiúsculas. Porque eran xente importante, dirixentes de paises importantes, de potencias mundiais. E que concluiron? Que hai que controlar máis os mercados e reactivar a economía!!! Pois para chegaren a esa conclusión non facía falta montar este número, nin andar a correr durante 3 semanas. Se imos a calquera tertulia de café as conclusións que se obteñen son máis prácticas e máis interesantes…
Mágoa que os do G-20 ese non escoiten algo máis o que os pobos, o que a xente e outros gobernos están dicindo e aplicando dentro das súas posibilidades. Máis control público, máis regulación dos mercados, mellores salarios e mellores condicións laborais,… Pero claro, diso non interesa falar.

Xuntanza do G-20

Hoxe e mañá vaise celebrar a xuntanza do G-20 en Washington. Supoño que ninguén esperará que as receitas que aporten alí Zapatero vaian resolver os graves problemas que está a xerar a crise económica. Cando falan de refundar o capitalismo hai que botarse a tremer, porque o capitalismo salvaxe na súa versión actual, o neoliberalismo, é o responsábel da miseria de milleiros e milleiros de persoas. Cando falan de refundar o capitalismo realmente de que están falando, de reformar o sistema de pensións, de reformar o mercado de traballo,… están falando de medidas positivas para a economía ou de medidas encamiñadas claramente a quen quen máis teñen sigan tendo máis e quen menos teñen aínda teñan menos?
Por iso que non hai que esperanzarse moito co que vaia pasar no G-20. Desde o momento en que o Estado español lle entrega aos bancos miles de millóns sen ningún control sobre o seu futuro uso, como podemos crer que realmente hoxe e mañá van cambiar algo?

Mulleres mortas

Onte, outra vez, un home asasinou á que fora a súa parella e nai da súa filla polo feito de ser muller. Cada vez que acontece pensas en que non chegan as concentracións, non chegan as ordes de afastamento, non chegan os xulgados específicos (que Lugo non ten) contra a violencia de xénero, non chegan as axudas nin as casas de acollida. E non van chegar nunca mentres non haxa un cambio social radical. Un cambio na mentalidade dos homes que pensan que as mulleres son da súa propiedade e un cambio na mentalidade das mulleres que pensan que é obrigatorio perdoar a quen as maltrata, a quen as humilla… a quen as mata. Porque lamentabelmente aínda está tan interiorizado que o home é quen manda, que despois destes sucesos case sempre se di que eran unha parella normal, que el era boa persoa, … algo introvertido pero máis nada. Xustifícase o inxustificábel! Non existe un rexeitamento real destes feitos e as administracións e a xustiza son excesivamente lentas para atallaren o problema antes de que chegue a morte.
Seguimos fallando no fundamental, na educación, e esta cuestión non logramos cambiala. Non logramos educar homes e mulleres libres, donos de si e do seu corpo, capaces de decidiren e plenamente respectuosos coa vida do outro/da outra. E como non educamos segue habendo mortes, e iso é algo que ningunha sociedade que se di civilizada pode permitir. Cando falamos de terrorrismo esquecemos que morren máis mulleres a mans dos homes, que homes e mulleres a mans do terrorrismo. Pero iso si, cando se produce un ataque terrorrista, todos nos lamentamos e daquela si que se aplican verdadeiras medidas preventivas. Contra a violencia de xénero, non. E o resultado é dramático: mulleres mortas, orfos e orfas, familias destrozadas, vidas truncadas…

Un barcelonés agride á súa parella en Vigo porque non lle deixaba beber viño

Toca Plan Xeral

Despois das declaracións de onte de Orozco non podo deixar de falar do Plan Xeral. Teoricamente tería que ir a Pleno o día 3 de decembro, e para iso o vindeiro luns, 17 de novembro, teríamos que ter copia íntegra de toda a documentación. Non sei, pero todo soa a novo incrumprimento de datas. Orozco demostra que segue sen escoitar. Non escoita porque o BNG xa lle dixo por activa e por pasiva que a nosa decisión non depende de informes administrativos. A nosa postura co Plan Xeral sempre foi moi clara. Queremos melloras evidentes para os barrios, para o patrimonio, para a zona rural, e queremos que todo se faga de maneira que os veciños e veciñas de Lugo coñezan o Plan antes da súa aprobación definitiva e que podan opinar sobre el. Por iso queremos que se volva a expoñer ao público, independentemente do que digan os informes. A nosa é unha decisión política. A única decisión que se pode tomar se queremos que o PXOM non se aprobe de costas aos cidadáns.
O PP xa fai tempo que renunciou a introducir melloras. Non se sabe quen tén máis presa por aprobar o Plan Xeral, se o PSOE ou o PP. Está claro que neste caso os intereses urbanísticos pesan moito.

Declaracións de Paz Abraira: “O BNG non renuncia a introducir melloras no PXOM antes da súa aprobación definitiva”

Orozco ignora se o plan de urbanismo poderá debaterse o 3 de decembro, como estaba previsto

Novembro: orzamentos e máis

Pasou o pleno da cuestión de confianza e a vida deste concello segue adiante, aínda que onte algúns catastrofistas afirmasen o contrario. O BNG actuou de maneira coherente e non prolongou por máis tempo a farsa que crearon o PSOE de Orozco e o PP de García Díez e Barreiro. Orozco impuxo os seus orzamentos e fíxoo pola porta de atrás.

Pero como hai máis vida no concello hoxe vou falar doutra cousa, e non vai ser de orzamentos nin de urbanismo. Novembro é o mes contra a violencia de xénero, e todas as institucións celebran actos para favorecer a igualdade entre homes e mulleres e contra a violencia sexista. É tempo de que despois dos plenos do concello non teñamos que gardar nin un minuto de silencio polas mulleres mortas pola violencia machista. É tempo de que as cousas cambien.

Hoxe novo pleno de orzamentos

Poida que xa esteades cansos de que estes últimos días fale sempre do mesmo, pero é que ás veces as circunstancias políticas obrígannos a aclarar certas cousas. A nosa abstención no pleno de hoxe non é un apoio aos orzamentos de Orozco. Ímonos abster para pechar definitivamente un procedemento imposto polo PSOE, para poder aprobar os seus orzamentos pola porta de atrás. Pero claro, prefire facelo así que negociando con nós melloras evidentes nunhas contas que non convencen a ninguén, e moito menos aos lucenses.
Xa dixemos por activa e por pasiva que non imos presentar unha moción de censura co PP. E non o imos facer porque o noso obxectivo non é gobernar a calquera prezo. Temos moi claro o noso proxecto para Lugo, pero o BNG ten 4 concelleiros na Corporación de Lugo. Por certo, que a política en Lugo, a do PSOE de Orozco e do PP de García Díez, son ben semellantes. Por iso o ano pasado pactaron e votaron a favor da aprobación dos orzamentos. Por iso o PP lle dixo ao alcalde en todas as xuntanzas que contase co seu apoio, se presentaba un recurso contra o Consorcio de Servizos Sociais da Vicepresidencia. Non imos deixar que nos enganen, e tampouco imos permitir que enganen aos cidadáns.
Orozco e o PSOE, con esta saída legal, impoñen os seus orzamentos. E fixérono porque o alcalde é incapaz de negociar e chegar a acordos, acordos que de seguro serían beneficiosos para Lugo. Xa o foron no pasado. Alá cada quen coas súas actitudes.