Turismo sen turistas

Lugo debería ser unha cidade turística, pero os sucesivos gobernos empéñanse en facer xusto o contrario do que deberían para que os turistas veñan á nosa cidade, desde logo unha das máis fermosas e con máis patrimonio de todo o Estado.
Lugo nada ten que envexarlle a ningunha outra cidade galega, e aínda asía recibe poucas visitas de turistas, tanto galegos como do resto do Estado ou doutros países. E iso débese en boa medida a ausencia dunha boa planificación e dunha boa venda do produto.
Este ano cúmprense 10 anos da declaración da muralla como patrimonio da humanidade e tamén estamos de ano Xacobeo, e a nosa cidade segue vivindo de costas á muralla e ao Camiño primitivo, seguramente as súas maiores xoias en canto a patrimonio. E as dúas están descoidadas e pouco promocionadas. E non se ve ningún interese por parte do goberno de Orozco nin no de Núñez Fijóo para poñer en valor o que temos.
Pasan máis tempo polemizando pola intermodal, que non vai ser unha realidade en moitos, moitos anos, que poñendo en valor o que realmente temos e que é o que pode facer que no futuro ese famoso AVE poida traer xente a Lugo.
As polémicas estériles son iso, estériles, e desde logo a nosa cidade non saca nada delas.
Apostemos de verdade por Lugo e polas súas potencialidades, e deixémonos de escenificacións cara á galería.

Ruinas urbanísticas

A semana pasada unha muller sufriu importantes lesións nunha man pola caida dun cristal procedente dunha vivenda declarada en ruina que se atopa na Praza de Santo Domingo, e estas puideron ser moito peores pois tamén lle caeron vidros sobre a cabeza. Resulta ben triste ver como tantos edificios do casco histórico e de fóra deste se van deteriorando mentres se sigue construindo de maneira desproporcionada porque cada día hai máis vivendas baleiras. Xa sei que os procedementos administrativos para poder orbigar aos propietarios aactuar sobre unha vivenda declarada en ruina son longos e complexos, pero tamén teño moi claro que hai situacións que non se pdoen permitir. O deste edificio de Santo Domingo ou o da Rúa Castelao que leva meses cun ridículo balado que o goberno chama “de seguridade” non se pode permitir. Se se lle están impoñendo multas coercitivas aos propietarios, que eses cartos se destinen a realizar actuacións mínimas de seguridade para evitar situacións de risco absolutamente innecesarias. Non se pode seguir dicindo que non hai competencias ou capacidade, porque non é certo. Hai outras maneiras de actuar, o que falta é interese político en facelo.

Ver La Voz de Galicia.

O BNG esixe a intervención municipal para correxir situacións de risco para os peóns

Descaro futbolístico

A verdade é que eu nunca fun moito de fútbol,.. nin de ningún deporte de masas. Desde logo non comparto ese enfervorizamento sempre creado e sempre artificial que atonta a boa parte da sociedade e que lle fai esquecer “con goles” a situación na que nos atopamos. Sempre foi un sistema moi utilizado polo poder para intentar que pasen desapercibidos certos asuntos que a sociedade non interesa que coñeza en profundidade. Agora tócalle á reforma laboral en plena histeria mundialista e baixando ao máis cercano tócalle a todo aquelo que non interesa difundir que se leva a pleno no verán, época na que a xente quere pensar noutras cousas. Por iso o PSOE de Lugo (axudado polo PP que critica só o que lle convén) quere aprobar o PXOM en xullo, mes moi apropiado para que pase desapercibido un documento amplamente cuestionado e que o BNG non apoia por favorecer a especulación urbanística e beneficiar aos de sempre. Só lles falta que gane España o mundial para que o escenario sexa perfecto. Porque con “goles”… as penas e as aberracións urbanísticas son menos.

A reforma laboral

Xa está aí. Xa é unha realidade. O PSOE facendo a política máis dura do PP, aplicando as medidas máis antisociais que se recordan no Estado, eliminando dereitos conseguidos despois de anos e anos de esforzos.
Quen pense que despois desta reforma laboral todo vai seguir igual está moi equivocado/a. Quen pense que a partir deste momento a relación que as empresas van manter cos traballadores/as vai ser a mesma ca antes, non sabe o que se nos vén enriba. Non é só que reduzan o número de días por ano traballado que nos teñen que pagar cando nos despiden, o que xa é moi grave. É moito peor. É que lles van permitir (tal e como pedía a patronal) desligarse da negocación colectiva, polo que os convenios colectivos que servían de colchón mínimo para moitos sectores van desaparecer ou van ser “legalmente” ignorados, co que a nosa provincia, con menos industria, con menores salarios, vai baixar un paso máis nese camiño descendente que se iniciou co recorte salarial e das pensións, coa redución da obra pública e cos recortes das infraestruturas.
Como non nos movamos, como non actuemos ante as políticas antisociais europeas, estatais e galegas, os tempos que están por vir si que van ser duros.

Novos verquidos ao Rato

A semana pasada producíuse un novo verquido contaminante ao Miño procedente do Río Rato, concretamente dun dos colectores da cidade que verte nel. É o concello de Lugo punteiro no desenvolvemento dunha rede de saneamento que a verdade é que non acaba de funcionar do todo ben, sobre todo os colectores que verten ao Río Rato e Fervedoira.
Seguimos tendo un grave problema no Río Miño, e temos que impedir que se produzan novos verquidos de augas residuais se queremos que siga sendo un organismo vivo e activo, do que todos e todas poidamos disfrutar.

O BNG esixe a reparación do colector de Muxa, estragado polas obras da Rolda este, que verte no Rato

Ver El Progreso

O BNG advirte dun vertido de aguas residuais ao Miño na súa confluencia co Rato

O Camiño Primitivo

Resulta penoso ver como está o Camiño Primitivo a seu paso polo Carme. Alí chámase Carreiro dos Hortos, e a herba, as silvas e as ortigas suben por riba da xente. E tamén hai lixo e trastos vellos tirados por todos os lados.
Non me estraña que os peregrinos opten por non baixar por el e seguir a ruta urbana, a pesar de carecer de atractivo, pero é que mete medo meterse por alí.
Este ano, que celebramos Xacobeo e o X Aniversario da Muralla como Patrimonio Mundial, non é de recibo telo así. Tanto o concello como a Xunta deberían actuar de imediato e deixar de culparse uns aos outros, porque xa estamos en xuño e cada vez vén máis xente de visita á cidade.
A Xunta do PP deixou sen limpar a muralla e agora medra a herba por todos os lados. E o concello tampouco fai nada para remediar esta situación nin para ter o Camiño Primitivo ao seu paso pola cidade nun estado presentábel. Por certo, cando o BNG dirixía Cultura ben que se encabritaba Orozco cando algo non lle parecía ben. Semella que agora todo está ben e que é mellor quedar calado ante o que acontece.

O PSOE e as medidas ante a crise

Está claro que o PSOE está totalmente desnortado neste momento, o que lle dá bazas ao PP para poder atacalo, cando as medidas antidéficit (que non anticrise) que eles aplicarían serían exactamente as mesmas. Resulta ben patético o acontecido onte no Senado, onde a Cámara de Representación Territorial do Estado se converteu nunha feira de proporcións dantescas. Así o único que se fai é contribuir ao descrédito da clase política, cado a verdade é que non todas as organizacións somos iguais. Curioso que agora se cargue (sobre todo desde a dereita) contra partidos políticos, sindicatos e todo tipo de asociacións que desenvolven apostas colectivas e non individuais.
E en todo este baile vai o alcalde de Lugo e, tamén fiel ao seu estilo, un día carga contra Zapatero e as súas medidas de cara aos concellos e ao día seguinte xa rectifica e matiza as súas palabras porque o chamaron á orde desde Madrid. Cando un non vai manter as súas palabras, mellor é quedarse calado.

O servizo municipal de bicicletas

O servizo municipal de bicicletas naceu con 5 bases e 100 bicis (para cubrir as de uso diario e repoñer as estropeadas). A semana pasada fixemos un reconto a distintas horas (hora de peche do servizo de préstamo) e en distintos días e só puidemos atopar 10 bicicletas nas 5 bases. Eu mesma esta mañá tiven dificultades para poder devolver a que collín porque non funcionaba ningún enganche da base que hai ao lado da policía local. Despois de numerosos intentos deixeina por fin amarrada no seu sitio.
A verdade é que é unha lástima que o PSOE se desentenda deste servizo, no que se investiron cerca de 130.00 € desta maneira, porque o único que se logra é obter o efecto contrario ao que se quere provocar: que cada día sexan menos os usuarios deste servizo e que, polo tanto, cada día haxa menos persoas que utilizan a bici para desprazarse deixando o seu coche na casa.
Se queremos que Lugo avance temos que postar por outros modelos de transporte, e dado que xa fixemos o investimento, manter en bon estado o que temos, non deixando que se deteriore e que cada día haxa menos bicis. Apostemos por outros modelos de transporte e fagámolo con políticas claras e non erráticas.

As obras do parque de Frigsa

Hai obras do Plan E do ano pasado que aínda están sen rematar, a pesar de ser realmente necesarias para a nosa cidade. Estou falando por exemplo da peonalización do parque de Frigsa ou do novo vaso da piscina climatizada, tamén de Frigsa.
No caso do parque dá verdadeira pena ver o parque pechado e a xente maior e aos nenos sen poder xogar nun recinto no que, polo menos aparentemente, as obras están rematadas. O novo pavimento instalado, o mobiliario e a iluminación tamén… A xente pregúntase que falta e a resposta é axilidade e control por parte de quen goberna, o PSOE, incapaz de conseguir que obras coma estas rematen nos seus prazos e sobre todo que o parque se abra de novo ao público agora que vén o bon tempo.
Se non apretan á empresa, a obra non ten por que rematar antes do 30 de xuño, porque esa é a prórroga que lles concedeu o Estado, a pesar de que tiña que estar feita en 6 meses.
Lugo non ten moitas zonas verdes como a de Frigsa. E nesa zona da cidade é o único parque de verdade que temos, por iso é tan urxente que se abra canto antes.

Crise económica e crise social

Hoxe todos fomos coñecedores das medidas que o presidente do Goberno vai aplicar para que España se recupere. As medidas van encamiñadas exclusivamente a reducir o défice público e non a potenciar a economía e producir emprego.
Mete medo escoitar falar a tantos e tantos políticos de medidas represivas e regresivas sen que lles treme a voz. Mete medo que o neoliberalismo económico se introducise de tal maneira nas nosas actuacións que non somos quen de darnos conta de que o problema non é só que se lle recurte o salario a unha parte dos traballadores ou aos pensionistas. O problema é que estas medidas só teñen un obxectivo: beneficiar ás grandes empresas, á banca e aos especuladores e prexudicar moi gravemente á clase traballadora.
Levamos moitos anos tendo medo a falar de clase traballadora. Temos medo a encher a boca con este termo e a poñernos do lado de quen menos teñen porque seica agora somos todos/as “clase media”.
Cando antes se dicía que procedías dunha familia humilde o que querías dicir é que procedías dunha familia pobre. Eu procedo dunha familia pobre onde sempre houbo máis fillos que vacas, o que indica claramente cal era a nosa situación. E a miña familia non é tan diferente doutras que actualmente viven e padecen a grave cirse económica que nos afecta e que seican son “clase media”.
Levo meses escoitando, incluso nos ámbitos nacionalistas, que non hai tanta crise como se di porque a xente sigue estando nos bares. Quen sabe, igual agora si que ven a crise como algo máis real e cercano, porque a crise está aí e desde logo non creo que a maior parte da sociedade nos vaiamos librar dela. E moito menos polo camiño que van PP e PSOE. Defenden exactamente as mesmas medidas, medidas fixadas desde fora e que só buscan o recorte dese famoso défice público. Nada, absolutamente nada, para reforzar os servizos públicos. Nada, absolutamente nada, para incrementar a produción e o consumo, tan ligados entre si. Nada, absolutamente nada, en definitiva, para a clase traballadora.
Recomendo ler as propostas nacionalistas (BNG e CIG) para atallar esta situación. Están nas repectivas páxinas web.