Bo Nadal e feliz Aninovo

Hoxe quero felicitarvos o Nadal e desexarvos un bon Aninovo a todos e todas.

Mira que ben bailamos

Pleno para as obras do fondo estatal

Dentro dun pouco temos pleno e imos debatir sobre as obras a realizar cos cartos do fondo estatal. No caso de Lugo estamos falando de 16 millóns de euros, moitos cartos tendo en conta a situación de crise na que nos atopamos. E vaise debater este tema no pleno non porque o alcalde o puxese na orde do día, senón porque o BNG presentou unha moción cunha proposta de obras para que se debata pola corporación. O PP tamén presentou a súa.
No pleno ordinario de decembro pedimos que se crease unha comisión con representación de todos os grupos para acordar as obras a facer, pero o PSOE e Orozco negáronse, a pesar de pedir o mesmo nos concellos nos que non gobernan. Vaia coherencia. Xa veremos que pasa no pleno desta mañá.

Plan Xeral aprazado

Pleno do Plan Xeral aprazado indefinidamente. Iso é o que sabemos a día de hoxe. Iso e que María Novo está en Madrid reunida coas redactoras.
O que está claro é que este documento tal e como está non se pode aprobar. O BNG xa o dixo ben claro, e despois tiveron que sumarse os demais, o PP e tamén o PSOE.
Que o PP veña dicindo agora que eles tamén defendían o da nova exposición pública é de coña. Non hai máis que ver a acta do pleno de setembro no que o BNG presentou unha iniciativa reclamando un acordo político sobre este tema. Pero claro, visto o visto e o ben que estaba todo (en palabras do seu portavoz para estes temas), agora ter que recuar é difícil.
Xa veremos o que vai pasando nos vindeiros días, pero moito me temo que Orozco non vai querer saber nada do PXOM até despois das eleccións do 1 de marzo.

Esperpento

O do plan xeral de Lugo é un verdadeiro esperpento. Orozco esconde a cabeza, María Novo titubea e non sabe que dicir e o PP carga contra o BNG porque lles desvelamos aos lucenses os graves erros que segue tendo o documento.
Xa o dixen en máis ocasións. O BNG non se vai amordazar e vai seguir denunciando todas as barbaridades que quere facer o PSOE.

17-12-2008 // O BNG di que o PXOM só responde ao 20,6% das alegacións

Aprazado ’sine die’ o pleno para aprobar o PXOM de Lugo

A «imprecisión» das respostas ás alegacións lastra a aprobación

Unha adxudicación feita en 1997 polo goberno de García Díez e que supón ao Concello pagos por uns 725.000 euros

E suspenden outra vez o pleno do Plan Xeral

O nunca visto. O do PSOE de Lugo e do seu alcalde, o señor Orozco, é alucinante. Estamos ante o maior esperpento que se pode dar nun concello, o cambio dun pleno para aprobar un documento como o Plan Xeral até o punto final, a súa suspensión sine die.
O BNG celebrou onte pola noite unha asemblea local e, despois de analisar o novo documento do Plan Xeral, decidiu que non lle podíamos dar o noso apoio a un proxecto urbanístico ao que só lle corrixiron os erros que tiña. O modelo territorial deste novo documento é o mesmo co do anterior, modelo que sempre criticou o BNG.
Orozco, o PSOE e o PP terán que explicar como é posíbel que consideren tan bon un documento que a día de hoxe aínda está incompleto e non dá resposta ás alegacións dos veciños.
Nós témolo moi claro: nova exposición pública XA!!! polo ben de Lugo e dos veciños.

O BNG non apoiará o plan por «expansionista e caduco»

Pleno extraordinario Plan Xeral

Alegacións ao Plan Xeral

Faltan 3 días hábiles para a celebración do pleno de aprobación do Plan Xeral e aínda non está no concello o informe completo ás 6.800 alegacións presentadas polos veciños e veciñas de Lugo. É dicir, que aínda non sabemos que é o que aceptan e que é o que non aceptan do que pediron os veciños.
O BNG non vai deixar de denunciar aquelas cousas que nos parecen inxustificábeis.Non nos poden ocultar información necesaria para poder fixar a nosa postura definitiva sobre un documento amplísimo e moi complexo que vai influir no futuro deste concello e polo tanto no futuro dos seus habitantes.
Seguimos reclamando, por xustiza e por democracia, unha nova exposición pública do Plan Xeral de Lugo.

O recorte dos núcleos rurais avala unha nova exposición, segundo o BNG

• A variante oeste dispara os custos dos sistemas xerais e suscita unha advertencia do interventor

O BNG di que o PXOM de Lugo só responde ao 20,6% das alegacións

Anteriores novas relacionadas

• Non haberá nova exposición do PXOM de Lugo
• O voto en contra do PSOE e a abstención do PP tombaron a proposta do BNG

• O PSOE rexeitou onte no pleno expoñer por segunda vez o PXOM

Vivenda protexida

O PP acaba de anunciar que vai presentar unha moción no pleno do día 23 para demandar da Xunta a retirada do Plan Sectorial de Vivenda de Galiza.
Está claro cal é o obxectivo do PP, atacar a política de vivenda que o BNG está facendo desde esta Consellaría. Pero non o fai só por opoñerse ao BNG, faino tamén por unha cuestión claramente ideolóxica. O PP non cre na política social, non cre na vivenda protexida. O PP, como partido de dereitas, apoia ás clases sociais máis pudentes, con máis poder adquisitivo. O respaldo ás clases populares, aos que menos teñen, nunca formou parte da súa política, nin nos concellos, nin na Xunta nin no Estado.
Pero o BNG tén unha política ben diferente. Este plan sectorial de vivenda vaille permitir a moitos e moitas lucenses con poucos recursos adquirir unha vivenda de calidade igual que a que poden adquirir os desas clases sociais que defende o PP e que desde logo non andan faltos de medios.
Que pode ter de malo que no Carme, na Cheda ou dentro de murallas haxa vivenda protexida? Ou é que esta sempre tén que estar no extrarradio das cidades e das vilas? A nosa aposta é outra, e imos intentar que conte co apoio dos veciños e veciñas que necesitan esa vivenda protexida.

• Presentación
• PARTE I – O Plan Sectorial Galego de Solo Residencial – Introducción
• PARTE II – Estudo Previo – Análise do mercado da vivenda en Galicia
• ANEXO II.1 – Delimitación das Áreas Funcionais
• PARTE III – As Actuacións do Plan Sectorial
• Anexo III.1 – Caracterización das Áreas Funcionais
• Anexo III.2 – As actuacións do Plan Sectorial
• Anexo III.3 – Informe Sostibilidade Ambiental

355 núcleos rurais sen servizos

Lugo ten 54 parroquias e 355 núcleos rurais sen servizos, e o Plan Xeral que o PSOE de Orozco quere aprobar provisionalmente o día 23 de decembro (xa non é o día 19) agranda aínda máis a fenda existente con respecto á zona urbana. Pero o que é aínda máis grave, vai crear cidadáns de primeira e de segunda na zona rural, pois os que vivan nos núcleos rurais tradicionais van seguir sen servizos de abastecemento e saneamento pero os que vivan nas novas urbanizacións rurais si que van telos, e con fondos en boa medida municipais. Desde logo os cambios introducidos no documento non van facer que o BNG se amordace e deixe de facer públicas as carencias que aínda ten, entre elas a dotación de servizos á zona rural. O BNG ten claro que o mellor para Lugo é someter o documento a unha nova exposición pública, o que permitiría que os veciños o coñecesen antes da súa aprobación e lle daría seguridade xurídica ao concello antes posíbeis reclamacións.

O BNG denuncia que no 80% dos núcleos rurais hai cambios no PXOM

Dúbidas razoábeis

Teño serias dúbidas de que o plan xeral vaia finalmente a pleno o día 19 de decembro tal e como anunciou o alcalde a semana pasada. E digo isto porque, por exemplo, onte houbo Consello Económico e Social e non dixo nada da data plenaria.
Non sería de estrañar que volvese pasar. O goberno do PSOE de Lugo se por algo destaca é polos seus reiterados incumprimentos, tamén en materia urbanística.
Poida que quen salte a protestar sexa o PP, porque polo visto son uns dos que máis ansia teñen por aprobar este plan xeral. Nin que fose seu!
Onte nun debate, ao que non foi o PSOE, o gran defensor dun documento -e que polo visto aínda non estudaron en profundidade-, foi Jaime Castiñeira. As malas linguas din que tamén pode ser que lle queira facer o traballo suxo a García Díez antes de marchar definitivamente para o Parlamento Galego, como xa apuntaban algúns medios de comunicación.
Quen sabe, á parte da súa importancia, o pleno aínda pode resultar ben entretido, sexa cando sexa.