Orzamentos do Estado

Despois de tantas promesas e de tanto falar, temos diante de nós o0s orzamentos do Estado e neles non figura un euro para a Estación Intermodal de Pepe Blanco e Orozco. Pero como tampouco figuran cartos para o AVE e como ferrocarril de cercanías non temos, pois que máis ten!
O papel terma do que lle poñen, e no papel dos orzamentos a nova estación non existe.
E outras obras que deberían estar rematadas reciben menos cartos ca este ano, entre elas a nova ponte e a autovía Lugo-Santiago. Da de Lugo-Ourense mellor non falar. E o desdobramento da Ronda Norte para garantir os accesos aos novo polítgono industrial das Gándaras tampouco figura, a pesar de que non se gastaron os cartos que había para este ano. E por riba o PSOE vai e súbenos o IVE e di que é para poder facer as obras, entre elas as do AVE galego.
O debate dos orzamentos é un debate real, non virtual, e o que non está no papel, non existe, diga o que diga o PSOE.

En defensa do sector lácteo

Mañá vanse celebrar por todo o País concentracións en defensa do sector lácteo, que está atravesando unha das peores crises da súa historia. A importación masiva de leite francés a baixo prezo está obrigando aos gandeiros/as galegos a pechar as súas explotacións. E a política das empresas (Leche Pascual) pechando as plantas de transformación e envasado galegas axuda a apiorar esta situación.
Agora que estamos de novo ante unhas eleccións europeas, os partidos estatais deberían dar explicacións de por que estamos nesta situación. A tan cacarexada política europea, avalada por PP e PSOE cando gobernan no Estado é a maior responsábel desta situación de crise do sector lácteo galego.

Vivenda protexida

O PP acaba de anunciar que vai presentar unha moción no pleno do día 23 para demandar da Xunta a retirada do Plan Sectorial de Vivenda de Galiza.
Está claro cal é o obxectivo do PP, atacar a política de vivenda que o BNG está facendo desde esta Consellaría. Pero non o fai só por opoñerse ao BNG, faino tamén por unha cuestión claramente ideolóxica. O PP non cre na política social, non cre na vivenda protexida. O PP, como partido de dereitas, apoia ás clases sociais máis pudentes, con máis poder adquisitivo. O respaldo ás clases populares, aos que menos teñen, nunca formou parte da súa política, nin nos concellos, nin na Xunta nin no Estado.
Pero o BNG tén unha política ben diferente. Este plan sectorial de vivenda vaille permitir a moitos e moitas lucenses con poucos recursos adquirir unha vivenda de calidade igual que a que poden adquirir os desas clases sociais que defende o PP e que desde logo non andan faltos de medios.
Que pode ter de malo que no Carme, na Cheda ou dentro de murallas haxa vivenda protexida? Ou é que esta sempre tén que estar no extrarradio das cidades e das vilas? A nosa aposta é outra, e imos intentar que conte co apoio dos veciños e veciñas que necesitan esa vivenda protexida.

• Presentación
• PARTE I – O Plan Sectorial Galego de Solo Residencial – Introducción
• PARTE II – Estudo Previo – Análise do mercado da vivenda en Galicia
• ANEXO II.1 – Delimitación das Áreas Funcionais
• PARTE III – As Actuacións do Plan Sectorial
• Anexo III.1 – Caracterización das Áreas Funcionais
• Anexo III.2 – As actuacións do Plan Sectorial
• Anexo III.3 – Informe Sostibilidade Ambiental

Falta de sensibilidade estatal

Hoxe o senador do BNG, o compañeiro Bouza, leva ao Senado unha iniciativa na que reclama outra vez que en Lugo, Ourense e Ferrol se creen xulgados específicos de violencia de xénero. É este un tema, o da violencia de xénero, do que se fala e se escribe arreo, constantemente, en todos os medios e en todos os sectores. Mágoa que á hora da verdade, cando toca aplicar medidas concretas, cando toca destinar fondos ao seu combate e erradicación, non se faga. E sempre nos toca perder aos de sempre, aos do interior, aos que menos temos. Pero como creo que lamentándonos non solucionamos nada, no BNG optamos por actuar e por iso volvemos presentar esta iniciativa, porque sabemos da importancia de insistirlles a aqueles que teñen a responsabilidade de crear estes xulgados.
A batalla que libramos as mulleres pola igualdade está lonxe de rematar. Eu son das que penso que nos queda moito camiño por andar. Non chega con dictar leis se despois non se cumpren, se despois se ignoran ou non se destinan cartos a súa aplicación. Aínda teñen que mudar moitas cousas…

[O Senado aproba unha moción do BNG instando ao Goberno a crear xulgados de violencia de xénero en Lugo, Ourense e Ferrol ..]

Orzamentos do Estado

Finalmente e despois dunha dura negociación o BNG vai apoiar os orzamentos do Estado. E ímolos apoiar a cambio de cousas concretas. E esas cousas concretas non é só que supoñan un incremento dos cartos que se destinan a Galiza, senón acordos políticos que nos van permitir actuar como País e incrementar as nosas competencias e a nosa capacidade de decisión.
Porque de capacidade de decisión é do que estamos faltos, faltos como país e faltos como goberno. O PSOE está moi cómodo nesta situación. A fin de contas son un partido estatal que non considera a Galiza unha nación e polo tanto pensa que o noso autogoberno é suficiente. Pero no BNG non estamos satisfeitos, e por iso nas negociacións antepoñemos estes aspectos a outros que poden ser moi apetecíbeis pero menos prácticos.

A ponte que non existe!!!

Unha cifra: 151.000 €. Esta é a consignación orzamentaria que ten a nova ponte de Lugo nos orzamentos do Estado para o ano que vén. Claro que os 5 millóns de € que tiña para este ano seguen sen gastar. Pero que máis tén, Orozco está feliz e contento e con iso todo solucionado! Que non hai ponte? Non pasa nada, o goberno do PSOE felicítase igual. Que a autovía a Santiago non vai estar rematada antes de 2015? Que máis tén, igualmente o goberno de Orozco segue contento. Que do noso ferrocarril o goberno de Madrid nin fala? Que pasa, Orozco segue sendo un home satisfeito.
Supoño que estará moi agradecido porque os investimentos do Estado fanse públicos coincidindo co San Froilán e agardará que os lucenses non se decaten de nada durante estas festas. Pero a realidade é moi obstinada, e despois do día 12 de outubro a cidade recupera outra vez a súa marcha e teno que facer sen ponte, sen autovías, sen ferrocarril…

O proxecto dos Orzamentos do Estado segue aprazando a alta velocidade e introduce poucas novidades en autovías

Orzamentos do Estado

Esta fin de semana o Portavoz Nacional do BNG, Anxo Quintana e o Portavoz no Congreso dos Deputados, Francisco Jorquera, indicaron que de non haber modificacións nos orzamentos do Estado, o BNG non os vai apoiar.
Non podemos prestarlle o noso apoio a unhas contas que non garantizan o investimento no noso País, pois aínda que se manteña ese 8% comprometido, se o montante total dos orzamentos baixa, tamén baixa esa porcentaxe. Por iso xa aclaramos que a achega a Galiza en infraestruturas ten que ser do 8% do total do orzamento e que a cantidade final non pode ser inferior á deste ano. Queremos máis investimento en aspectos de política social para que non haxa rebaixas na posta en marcha da atención á dependencia, que nos permita desenvolver o Servizo Galego de Benestar. E queremos que se poña en marcha a comisión de seguimento das obras do AVE. Non nos vale con que estén presentes Touriño e Magdalena a fantástica. Non é que desconfiemos, pero…

O BNG considera “un erro” que o PSOE leve ao Consello de Ministros os Orzamentos 2009 “sen ter asegurado os apoios parlamentares”

O BNG urxe ao Goberno a que marque coas CC.AA. todos os detalles da Lei de Dependencia

Liña de alta tensión pola Fonsagrada

Onte estiven na Fonsagrada. Imos prensentar unha iniciativa no Cogreso dos deputados demandando a retirada do Estudo de Impacto Ambiental da liña de alta tensión Boimente (Viveiro)-Pesoz (Oscos). Esta liña atravesa toda a cornisa marítima da provincia de Lugo e introdúcese en Asturias a través do concello da Fonsagrada.
Na Fonsagrada atravesa por unha das zonas de maior riqueza económica, social e paisaxística do Concello, a que limita cos Oscos, con elevado potencial turísitico que comeza a explotarse.
No BNG queremos que se retire ese Estudo de Impacto Ambiental por pouco adecuado, pois das diversas opcións de trazado só estuda a que lle interesa ao Ministerio e a Rede Eléctrica Española, negando incluso que lle afecta a 22 núcleos de poboación da Pontenova e da Fonsagrada.
Evacuar a enerxía producida nos parques eólicos é moi importante, pero preservar unha das mellores zonas da Fonsagrada, tamén. E poden facerse as dúas cousas, só tén que haber vontade pólítica.

O BNG pide en Madrid o cambio da liña a Pesoz

A batalla do financiamento

Esta semana vaise seguir falando moito de financiamento. Vannos seguir acusando aos nacionalistas de ser insolidarios e pedichóns. Xa o facían antes cos cataláns e vascos e agora tamén con nós.

Desde logo no BNG temos moi claro que non imos aceptar sen máis a proposta do Ministro Solbes, e o PSOE galego se ten dignidade tampouco pode facelo. Non pode facelo porque non se teñen en conta factores determinantes para este país como son a dispersión e o avellentamento da poboación. Que nos veñan dicir que é o mesmo prestar servizos en Lugo que en Sevilla o que fai é provocarnos un profundo cabreo. Fainos pensar que, coma sempre, en Madrid esperan que este goberno, do que forma parte o nacionalismo, siga calado e non é así. Pasaron os tempos da procesión dos caladiños. Galiza reclama o que lle corresponde e non precisa da “caridade” de ninguén para sair adiante. Somos capaces de vivir do que producimos e estámolo demostrando cada día.

As balanzas fiscais: mentiras repetidas

Esta semana falouse moito de crise, de Fadesa e tamén das balanzas fiscais. O BNG leva anos e anos denunciando que a información que sempre nos dan os partidos estatais sobre o que achega Galiza ao Estado e o que recibe del está falseada. Está falseada porque está claro que se as grandes empresas que expolian os nosos recursos naturais pagasen aquí os seus impostos o resultado sería moi diferente. Falamos claro está das electricas, de ALCOA, de Citroën,…
O Estado recada en Galiza por distintos conceptos tributairos 11.000 millóns de euros ao ano e só nos transfire 7.000 millóns. Polo tanto esa mensaxe de que somos un país subsidiado, de que dependemos de Madrid para poder sobrevivir é totalmente falsa.
É falsa pero moi útil para os dous partidos estatais. Tanto PP como PSOE enchen a boca falando de solidariedade pero en ningún caso din que, por exemplo Madrid ten unha balanza fiscal e incluso superávit grazas aos impostos dos galegos e grazas aos nosos recursos naturais. Ou é que Madrid produce electricidade? Porque se o pensamos ben, que é o que produce Madrid?
A verdade é que este é un tema realmente interesante e do que seguramente volverei a escribir no futuro. Xa o dixen durante a campaña das Eleccións Xerais, e díxeno porque o penso: queremos que as empresas radicadas en Galiza coticen aquí, que paguen aquí os seus impostos para que Esperanza Aguirre non poida seguir presumindo de superávit fiscal á conta dos impostos dos galegos.