17 Marzo, 2010
Política municipal
1 Comentario
O goberno de Orozco está empeñado en pechar o parque Rosalía de Castro, e para iso vai gastar unha partida de máis de 459.000 €!!! Estamos falando, polo tanto, de investir moitos cartos de todos os lucenses para limitar o acceso a un parque que tamén é de todos os lucenses. Ultimamente esta é a moda do PSOE, poñer restriccións a todo o mundo para non ter que abordar realmente os problemas. Que hai quen ten unha actitude incívica, pois pecamos o parque para que non entre ningúen e xa está. Ou facemos unha ordenanza de civismo da que xa teño falado que o único que fai é convertir a rúa nunha cadea na que só os “ben vestidos” están libres de que vaia a policía facerlles unahs visita.
Máis lle valía ao PSOE de Lugo pensar en gastar eses cartos do peche en mellorar todas as instalacións do parque, deixando que todos o todas poidamos seguir disfrutando delas. O Orozco máis retrógrado está actuando estes días por Lugo, e xa veremos que máis ideas deste tipo teñen aínda.
1 Marzo, 2010
Política municipal
Non hai comentarios
No último pleno trataronse dúas mocións nas que se abordaba o estado da auga na cidade, unha do BNG e outra do PP. No caso da do BNG pedíamos que se trasladasen a unha única delegación, a de medio ambiente, todas as competencias neste tema. Estamos falando polo tanto de que a depuradora e a potabilizadora, os depósitos, a rede de subministración e o servizo de cobro se agrupen baixo a responsabilidade dunha única persoa para evitar despropósitos como os vividos fai 15 días cando tivemos que estar 2 días sen poder usar a auga da billa por unha cafrada do Sr. Piñeiro.
A verdade é que xa me esperaba a actuación do Sr. Orozco que, no seu papel de alcalde ofendido, nos acusou de querer espallar merda sobre a xestión do seu goberno neste asunto. E claro, tivemos que aclararlle que quen provocou esa situación foron os seus concelleiros. Eles foron os que tomaron unha decisión non contrastada tecnicamente e os que non avisaron con tempo aos veciños para poder facerlle fronte a unha situación absolutamente insólita, que o goberno municipal boicotee a propia rede de abastecemento de auga.
O alcalde debe ter algo máis de humildade e recoñer que, neste asunto, erraron de principio a fin. E que, coa súa actuación irrespondábel, deixaron sen auga apta para o consumo a 100.000 persoas. Se isto non é para criticar, xa me diredes que temos que facer!
11 Febreiro, 2010
Política municipal
1 Comentario
Onte os cidadáns de Lugo asistimos atónitos ao descontrol máis absoluto por parte deste concello. Pola mañá cando abrimos as billas comprobamos como a auga saía “turbia”. A verdade é que houbo zonas da cidade onde a palabra turbia non se axusta á realidade, e o que saía era loda de todo!!! E así, grazas a unha arroutada do Sr. Piñeiro, ínclito concelleiro de infraestruturas, case 100.000 persoas non podemos consumir a auga do grifo.
Pero agora a este señor o único que lle preocupa é que me retracte das miñas acusacións de desgoberno e descontrol do PSOE. Non lle preocupa que sigamos sen poder beber a auga, porque desde logo ningunha autoridade municipal dixo que podíamos facelo.
Desde logo non me vou retractar do dito, é máis, mantéñoo e vou máis aló: É inaudito que unha actuación municipal sen control nos deixe sen poder beber a auga dous días, digan o que digan Orozco, Piñeiro e Dopeso. Alguén terá que asumir responsabilidades ante estes feitos e deixarse de culparnos aos demais do que está pasando.
E remato dicindo que o Sr. Piñeiro, que se alzou en máximo enxeñeiro do concello de Lugo, é moi dado a este tipo de actuacións. Cando fai algo xa se ve o resultado. Aínda que le tamén é un esperto e deixar facer aos demais, sobre todo ás empresas que traballan nas rúas do concello de Lugo sen ningún tipo de control. E exemplos hai do que digo: Carlos Azcárraga, Estrada de Santiago,…
2 Febreiro, 2010
Política municipal
Non hai comentarios
O novo portavoz municipal do PP, Jaime Castiñeira, andou falando de que o BNG leva a pleno propostas que non lle preocupan aos lucenses. Referíase o sr. Castiñeira ás nosas iniciativas para reclamar a retirada das bases do decreto do ensino e o arranxo na estrada N-640 que vai de Lugo a Ribadeo pasando por Meira. A verdade é que a min, como veciña desta cidade, si que me preocupan estes temas, os dous. Un porque ante todo son galega e lucense, galego-falante e defensora de que o idioma propio de Galiza (dino a Constitución e o Estatuto) goce de prestixio e de defensa por parte de quen goberna este país. O da N-640 porque son moitos os cidadáns, de Lugo e de fora de Lugo, que a diario teñen que facer uso desta via de comunicación que se atopa en mal estado, digan o que digan o PSOE de Lugo e de Madrid. Como non me fio do superministro, quero que o concello se preocupe pola miña cidade, e que se poida chegar a ela con comodidade e sobre todo, con seguridade, desde toda a provincia.
E finalmente no pleno de onte elexíronse os representantes do Concello de Lugo nas Xuntas Xerais de Accionistas de Caixa Galicia e Caixa Nova. A Lei de Caixas recén aprobada e que o goberno estatal quere recurrir busca, ante todo, que as caixas non se transformen en bancos e que os nosos aforros non se vaian para fóra.
Non sei se Castiñeira segue considerando importantes ou non estes temas, pero desde logo o BNG si.
19 Xaneiro, 2010
Política municipal
Non hai comentarios
O Goberno municipal ven de anunicar que as obras de recuperación do parque Rosalía de Castro van incluir o seu peche ao público en determinarios horarios.
Parece ser que ao PSOE lle entrou unha vea prohibicionista que quere levar até as últimas consecuencias. Ordenanza de represión cidadá – perdón, de civismo- peche ao público do parque máis emblemático da cidade… E que vai vir despois, o peche do adarve da muralla con instalación de avisador acústico para que os paseantes busquen as escaleiras máis cercanas como se dun toque de queda se tratase?
Está claro que o PSOE e Orozco están absolutamente perdidos, e un día afirman que Lugo é a cidade máis tranquila do mundo (eu creo que é así) e ao día seguinte din sen enrubiar que hai que aplicar medidas prohibicionistas e sancionadoras porque nesta cidade o descontrol en certos lugares e por certas persoas (mocidade, prostitutas, mendigos, nenos perigosos, bandas organizadas,… todo isto non é invención miña, figura na ordenanza de civismo) é tal que obrigan a pechar o parque Rosalía de Castro.
A verdade é que non comparto este tipo de medidas porque as prohibicións xerais o único que fan é perxudicar a quen fan bon uso das instalacións e non impiden en ningún caso outro tipo de actitudes.
O parque é de todos os lucenses, é dos nenos e nenas, é dos pais e das nais, e dos avós e das avoas, é dos mozos e mozas, das parellas (sexan estas como sexan, claro) e o seu peche só vai facer que, co paso do tempo, deixe de ser de todos e todas nos.
23 Novembro, 2009
Economía, Política municipal
Non hai comentarios
A estas alturas do mes de novembro deberíamos estar falando dos orzamentos do concello, pero a 23 de novembro non sabemos nada deles. Ben, hai algo que si sabemos polos medios de comunicación, que ou ben lle aprobamos os orzamentos a Orozco ou que volve a presentar unha cuestión de confianza como o ano pasado. Resultan curisosas as “veladas ameazas” cando aínda non se sabe nada do documento por condutos oficiais. Como se pode xa estar intentando culpar aos demais do que vai pasar cando aínda non se nos entregaron nin as liñas mestras do orzamento do ano que vén?
Orozco sempre esquece que non ten maioría. Déixase levar en exceso por esa característica do seu carácter: a arrogancia. E a arrogancia non é boa conselleira en época de crise.
9 Novembro, 2009
Política municipal
Non hai comentarios
O Goberno do estado acaba de aprobar un novo Fondo Estatal de Investimento Local (FEIL). É a 2ª parte do famoso Plan E de xigantescos carteis que vemos por todos os lados, en obras importantes e noutras non tanto. Neste caso ao concello de Lugo correspóndenlle algo máis de 10 millóns de euros, e grazas a unha iniciativa que o BNG levou a pleno, as obras vanse consensuar entre as 3 forzas políticas con presenza no concello.
No BNG temos claro a que ten que destinarse este novo Plan E, dentro dos límites que estableceron para facelo. Obras e gastos de carácter social, obras ambientais, creación de emprego,… Queremos que o 20% do total se destine a políticas sociais, pois en época de crise isto é sempre o máis necesario, cubrir necesidades básicas. Tamén queremos que se invista na zona rural, en saneamentos e en mellora das infraestruturas viárias. E na zona urbana hai que gastar os cartos en sustituir abastecemento e saneamento naquelas zonas que aínda teñen practicamente o primeiro que se lles puxo (xa sabemos o que pasa cada dous días na rúa Mestre Soutullo coa traida de auga). E tamén queremos que se mellore o alumeado alí onde sexa necesario.
Pero tamén queremos melloras globais para toda a cidade, e por iso apostamos por instalar un sistema de GPS nos autobuses urbanos, de maneira que cando estamos na parada poidamos saber onde está o bus que queremos coller.
Propostas de futuro que non van poder acometerse cos orzamentos do concello. Esa é a aposta do BNG, unha aposta por e para Lugo.
6 Novembro, 2009
Política municipal
1 Comentario
Esta semana en pleno aprobouse por unanimidade demandar da Xunta a delcaración do Parque Rosalía de Castro como BIC, e pouco despois enterámosnos de que o gobrno está asfaltando a explanada do pavillón municipal dos deportes sen pedirlle previamente informe a Cultura.
Cando se fixo pública a sentenza que di que a ubanización da CS-5 non é legal porque non ten informe de Patrimonio, Orozco e María Novo afirmaron que se ian enviar a Cultura todas as solicitudes de licencia, incluso aquelas que eran para pintar unha parede ou cambiar unha fiestra se estaban dentro do ámbito dalgún ben catalogado. Agora queda ben claro que iso van facelo só cando a obra a fan os lucences, se a fan eles non. Curiosa maneira de entender a lei, aplícoa cando lle afecta aos demais e ignóroa cando me afecta a min.
A intención do PSOE neste tema está cada día máis clara. Escurrir o bulto, deixar que pase o tempo e que todo corra en contra da cidade, porque a fin de contas quen perdemos somos todos, quen perde é Lugo.
26 Outubro, 2009
Política municipal
1 Comentario
O xoves pasado tivemos a primeira xuntanza para renegociar as construcións que se van facer nas costas do parque. A verdade é que non podo calificala máis que de esperpéntica. Esperpéntica porque quen creou o problema e ten polo tanto a obriga de buscar solucións (o PSOE) chegou á xuntanza con todas as partes (grupos políticos, asociación en defensa do parque e propietario) sen nada. Ou non, o correcto é dicir que chegou cunha bomba de fume para enmascarar a súa incapacidade e o seu desinterese pola cidade.
A grandiosa proposta do PSOE, plantexada por María Novo e defendida por Orozco é a declaración imediata de BIC (Ben de Interese Cultural) para o parque Rosalía de Castro. Por certo que o BNG xa apoiou esa solicitude fai dous anos, cando dirixíamos a Consellería de Cultura, e o PSOE foi a única forza política que non o fixo. E agora sáenos con estas, atrevéndose ademais a afirmar na páxina web do concello (que é a de todos os lucenses) que con iso xa se elimina o problema pois impide construir e paraliza todo o que se poida facer aí. Non sei de onde sacan esa teoría, pero desde logo o BNG vai seguir esixindo un novo PERI que sexa respectuoso co entorno e coa legalidade.
13 Outubro, 2009
Política municipal
1 Comentario
Pasou o San Froilán e volvemos á realidade. A verdade é que durante esta semana non se pode falar de nada que non sexan festas. Teño que dicir que non me gustou a apertura das portas porque creo que boa parte dos políticos en activo que interviron deron un mitin político e esqueceron a que viñan a Lugo, excluindo nas súas intervencións a boa parte dos lucenses. Pero houbo honrosas excepcións dentro de todos os partidos. Quero aproveitar para felicitar a Ignacio Rodríguez Eguíbar e sobre todo a Branca Rodríguez Pazos pola súa magnífica intervención de apertura simbólica da porta de San Fernando, cargada de sentimento e xenerosidade. Tamén disfrutei co pregón de Lois Diéguez, onde lobiño baixou a Lugo para ver cos seus ollos a cidade de onte e a de hoxe, quen sabe se tamén a de mañá.
E para que non me acusen de barrer para a casa, teño que dicir en honor á verdade que, aínda sen coincidir con algunhas das cousas que dixo, Xosé Manuel Barreiro tivo tamén unha moi boa intervención na Porta do Carme, correcta e entretida, presentado neste caso por unha emocionada Cristina Ares, quen fixo un sentido repaso pola súa vida persoal e política.
Dos do PSOE quédome con Ricardo Varela, quen cando menos falou da súa ligazón coa muralla e non aproveitou para transformalo nun acto partidario e partidista como fixeron outros.
Pero as festas xa remataron e agora toca volver á realidade. E a realidade nos vindeiros días vainos obrigar a falar de orzamentos. Dos do Estado, dos da Xunta e dos do Concello. Seguro que vai ser un fin de ano ben interesante.
« Entradas anteriores
