16 Xuño, 2010
Política Estatal, Política nacional
1 Comentario
Xa está aí. Xa é unha realidade. O PSOE facendo a política máis dura do PP, aplicando as medidas máis antisociais que se recordan no Estado, eliminando dereitos conseguidos despois de anos e anos de esforzos.
Quen pense que despois desta reforma laboral todo vai seguir igual está moi equivocado/a. Quen pense que a partir deste momento a relación que as empresas van manter cos traballadores/as vai ser a mesma ca antes, non sabe o que se nos vén enriba. Non é só que reduzan o número de días por ano traballado que nos teñen que pagar cando nos despiden, o que xa é moi grave. É moito peor. É que lles van permitir (tal e como pedía a patronal) desligarse da negocación colectiva, polo que os convenios colectivos que servían de colchón mínimo para moitos sectores van desaparecer ou van ser “legalmente” ignorados, co que a nosa provincia, con menos industria, con menores salarios, vai baixar un paso máis nese camiño descendente que se iniciou co recorte salarial e das pensións, coa redución da obra pública e cos recortes das infraestruturas.
Como non nos movamos, como non actuemos ante as políticas antisociais europeas, estatais e galegas, os tempos que están por vir si que van ser duros.
13 Maio, 2010
Economía, Política nacional
Non hai comentarios
Hoxe todos fomos coñecedores das medidas que o presidente do Goberno vai aplicar para que España se recupere. As medidas van encamiñadas exclusivamente a reducir o défice público e non a potenciar a economía e producir emprego.
Mete medo escoitar falar a tantos e tantos políticos de medidas represivas e regresivas sen que lles treme a voz. Mete medo que o neoliberalismo económico se introducise de tal maneira nas nosas actuacións que non somos quen de darnos conta de que o problema non é só que se lle recurte o salario a unha parte dos traballadores ou aos pensionistas. O problema é que estas medidas só teñen un obxectivo: beneficiar ás grandes empresas, á banca e aos especuladores e prexudicar moi gravemente á clase traballadora.
Levamos moitos anos tendo medo a falar de clase traballadora. Temos medo a encher a boca con este termo e a poñernos do lado de quen menos teñen porque seica agora somos todos/as “clase media”.
Cando antes se dicía que procedías dunha familia humilde o que querías dicir é que procedías dunha familia pobre. Eu procedo dunha familia pobre onde sempre houbo máis fillos que vacas, o que indica claramente cal era a nosa situación. E a miña familia non é tan diferente doutras que actualmente viven e padecen a grave cirse económica que nos afecta e que seican son “clase media”.
Levo meses escoitando, incluso nos ámbitos nacionalistas, que non hai tanta crise como se di porque a xente sigue estando nos bares. Quen sabe, igual agora si que ven a crise como algo máis real e cercano, porque a crise está aí e desde logo non creo que a maior parte da sociedade nos vaiamos librar dela. E moito menos polo camiño que van PP e PSOE. Defenden exactamente as mesmas medidas, medidas fixadas desde fora e que só buscan o recorte dese famoso défice público. Nada, absolutamente nada, para reforzar os servizos públicos. Nada, absolutamente nada, para incrementar a produción e o consumo, tan ligados entre si. Nada, absolutamente nada, en definitiva, para a clase traballadora.
Recomendo ler as propostas nacionalistas (BNG e CIG) para atallar esta situación. Están nas repectivas páxinas web.
29 Outubro, 2009
Política nacional
Non hai comentarios
Xa se ve cal é a política social do PP: retirarlle o complemento de 200 € ás pensións non contributivas, eliminar a gratuidade dos libros de texto, ampliar os concertos coa sanidade privada,… E pretenden facernos crer que o fan para que teñamos máis e mellores servizos!!!
Temos unha poboación fortemente envellecida, cobramos as pensións máis baixas do estado, vivimos dispersos e no rural hai poucos servizos públicos, e agora o PP vennos dicir que todas estas medidas son para beneficiar a quen menos teñen!. Que llelo vaian dicir ás familias numerosas, á infinidade de parellas con fillos que non chegan a ser mileuristas, ás mulleres que non puideron pagar as súas cotizacións á seguridade social e que malviven cunha pensión non contributiva, a quen padeza unha enfermidade e vexa como os recursos da sanidade pública van parar aos petos de quen lles dan un trato despectivo nas consultas do SERGAS,.. Esta e non outra é a política social do Partido Pupular de Feijóo.
28 Setembro, 2009
Política nacional
1 Comentario
Benvido sexa este plan e todos aqueles que apoien a Lugo. E agardemos que non se quede no de sempre, publicidade e pouco máis.
A estas alturas falar de que se vai facer un novo plan estratéxico no que se vai gastar máis de medio millón de euros aumenta o meu excepticismo. E digo isto porque xa sei para que serviron o plan estratéxico do concello de Lugo e da Deputación: para entreter á xente, dicir obviedades e non avanzar en nada.
Se algo temos ben claro en Lugo é o que nos fai falta: impulso económico, impulso ás infraestruturas e máis e mellores servizos públicos (entre os que están os servizos sociais).
Poñer a funcionar o polígono industrial das Gándaras sen permitir a especulación do do CEAO e de moitos outros dos arredores, investir en i+D+I, rebaixas impositivas, apoio fiscal decidido ás pequenas e medianas empresas e aos autónomos, creación e posta en marcha de centros de día, residencias, gardarías,…
Espero que este novo plan signifique unha aposta clara por todo isto e que non se quede en pura palabrería.
11 Setembro, 2009
Política nacional
2 Comentarios
Este curso escolar comeza cargado do problemas e de polémicas. A decisión do PP de eliminar a gratuidade dos libros de texto, de suprimir a presenza do galego nas aulas, de non crear comedores, de retirar profesorado de apoio aos cativos con discapacidades, de eliminar profesorado no rural (Concello de Cervantes) deixa ben clara cal é a intención deste PP que goberna a Xunta.
Imos ver como nos orzamentos da Xunta para os vindeiros anos se van asignar boa parte dos cartos destinados ao ensino ao ensino privado e privado-concertado, onde incluso chegan a segregar aos cativos por xénero.
E despois quéixanse de que haxa protestas. Oxalá haxa moitas máis nas que os galegos e as galegas se neguen a dar por boa unha política que o único que fai é recortarlles dereitos individuais e colectivos.
2 Setembro, 2009
Política nacional
1 Comentario
Xa comezou setembro e con el arranca un novo curso político que vai estar marcado pola crise, a gripe A, a reforma estatutaria, o idioma,… Feijóo déixase querer pola prensa e disfruta como se fose un neno cando lle din que pode ser o sustituto de Rajoi. Porque el realmente o que quere é ser Ministro ou Presidente de España, non de Galiza. Para el o noso país é un paso intermedio necesario para facerse coñecido en Madrid, que é onde realmente quere residir. A súa actuación na Xunta está marcada polas directrices do PP máis reaccionario e máis dereitoso, pero iso si, adubiado todo de liberdade individual e de respeto á legalidade.
Tivemos un verán moi fresquiño pero seguro que o outono vai ser máis quente, cando menos politicamente. Quen queremos a este país, quen non renegamos do que somos e estamos orgullosos de ser galegos e de actuar coma galegos de ben, imos ter moito que dicir nos vindeiros meses.
31 Xullo, 2009
Política nacional
4 Comentarios
Ultimamente o PP fala moito de liberdade, da súa liberdade. Da liberdade que lles dá a maioría para impoñer as súas normas, as súas prácticas e para retirarlles dereitos básicos a todos os cidadáns.
Acaban de facer público o resultado da enquisa do galego, e cando parece ser que maioritariamente os pais/nais queren un ensino nas dúas línguas, vai o sr. Anxo Lorenzo e interpreta que iso significa que o que queren é un ensino en español. Está claro que non poden caer máis baixo. E por iso fan públicos os resultados hoxe, venres 31 de xullo, cando todo o mundo está pensando en marchar de vacacións.
Pois que non conten con iso, porque este país non se vai de vacacións e ten claro que o galego, o noso idioma, é unha grande riqueza, e non imos permitir que ninguén nola arrebate e aras das chamadas “liberdades individuais”. Porque como pobo temos unha liberdade colectiva, común a todos e todas nós, que non van poder enterrar, por moito que o intenten.
28 Xullo, 2009
Política nacional
1 Comentario
Xa está, xa pasaron os primeiros 100 días de goberno do PP. Seica hai que esperar sempre ese tempo para empezar a facer valoracións, pero neste caso a miña é a mesma hoxe que fai 100 días: negativa. É negativa porque non pode ser doutra maneira. Que nos deixaron estes 100 días? Pois deixáronnos ataques mortais ao galego, acordos fraudulentos para restrasar aínda máis a chegada do AVE, un novo financiamento autonómico que nos deixa en peor situación da que estabamos antes, un acordo para o sector lácteo que non resolve os graves problemas que teñen os nosos produtores de leite,…
E agora por riba PP e PSOE falan de aprobar un novo estatuto que non sexa de nación porque seica esa é unha aspiración pasada de moda. Menos mal que no BNG temos ben claro o que queremos con respecto a este tema, porque senón cando cheguemos aos 1000 días de goberno do PP non vai quedar nada do que é este País.
17 Xullo, 2009
Política nacional
Non hai comentarios
Xa hai acordo sobre financiación, e non é bon para Galiza. E o chamativo de todo isto é que os alcaldes, tan dados eles a reclamar máis fondos para os concellos, agora están calados. Onde vai ese Orozco que sempre clamaba por máis cartos para poder atender ás necesidades de Lugo? Por que está agora tan calado? Non será que como esta financiación a impón o PSOE desde Madrid hai que dicir amén?
Pero é que o PP de García Díez tamén está calado. E por que será neste caso? Ao mellor porque coa boca grande din unha cousa e coa pequena outra. Coa boca grande din que este modelo de financiamento non é bon, pero coa pequena abstéñense e falan baixo porque realmente se eles estivesen gobernando no Estado, Galiza non sairía mellor parada, porque quen manda é Madrid e a nosa considérana unha Comunidade de segunda.
O BNG dixo desde o primeiro momento que non podíamos perder posicións con respecto ao que tiñamos, que era o 7,8% do total dos fondos que se reparten. E non é por capricho. É porque desta maneira non imos poder prestarlle aos nosos cidadáns uns servizos públicos de calidade, e iso non se pode permitir. Como poden primar máis á poboación de menos de 17 anos que á de máis de 65? Quen consume máis recursos, un neno ou un ancián?
Pero volverán os tempos nos que os concellos clamen de novo por un financiamento local máis axeitado ás necesidades reais de cada un. Pero tristemente, agora están calados, e despois poucos fondos haberá para repartir. O momento de reclamar era este. Oportunidade perdida!!!
13 Xullo, 2009
Política nacional
Non hai comentarios
Estase debatindo estes días sobre financiamento autonómico. Fálase moito pero concrétase pouco. O BNG xa dixo que non podíamos aceptar ningunha cantidade que ande por debaixo do 7,8% do total estatal. E iso partindo dun reparto de 15.000 millóns de euros, non dos 9.000 (todo máis 11.000) dos que falan desde Madrid.
Pero Feijóo non se dá aclarado, e Pachi xa o ten moi claro. Un non di nin que si nin que non (estará agardando a ver que di Rajoy) e o outro di que si sen matices, que os cartos que nos tocan son moitos e moi necesarios (xa lle dixo Zapatero – ou foi Blanco?- que non hai máis).
Coma sempre Galiza non anda nin para adiante nin para atrás, sempre agardando polo que digan os partidos estatais. Se tivésemos un Estatuto de Nación como ten Cataluña as cousas serían ben diferentes. Pero claro, o PP diso non quere nin oir falar, non vaia ser que Madrid deixe de cobrar os impostos das empresas que ganan milleiros de millóns de euros á conta dos nosos recursos naturais.
« Entradas anteriores
