Día D

Hoxe é o día D. Hoxe decídese o goberno de Sanxenxo para os próximos catro anos. Como podedes comprobar eu xa exercín o meu dereito ao voto esta mañá. O resultado haberá que esperalo até a noite, a ver se reflicte as expectativas creadas o pasado venres no peche de campaña en Vilalonga. Catrocentas persoas se pasaron pola praza para escoitar o que tiñamos que dicir os do BNG.  Catrocentas persoas que nos manifestaron o seu apoio. Unha auténtica sorpresa. E iso sen necesidade de anunciar nos carteis que iamos ter polvo ao remate. Para que logo digan que os tempos non están mudando. Agora toca agardar a ver que decidides vós: se me dades e razón e entón terei que cantar ese corrido mexicano, ou se pola contra, estaremos outros catro anos máis escoitando promesas baleiras.

Aniversario

Onte foi o meu aniversario: medio século de historia ás miñas costas (aínda que non o parece, eu síntome como un chaval de vinte anos). A miña muller e os meus compañeiros déronme unha pequena sorpresa despois do mitin (por certo, do que saín moi contento; normal, con Iria Aboi mitineando calquera non sae contento, os que a escoitastes algunha vez xa sabedes do que estou a falar). Ao rematar a faena no ruedo do Pazo Emilia Bazán fumos cear, o descanso do guerrero, que tamén nos corresponde, e nos postres agasalláronme cunha tarta que só traía unha vela. Que ilusión me fixo, non mo esperaba. Pero máis ilusión que a tarta fíxome o feito de que levase unha única vela, quizais non para celebrar os meus cincuenta anos, senón o meu primeiro aniño como alcalde de Sanxenxo…!  Iso saberémolo o vindeiro domingo.

Terrorismo urbanístico

Tremebundo! Botándolle un ollo á prensa de hoxe atopeime na portada dun xornal con esta aberración urbanística que se esparce pola costa do levante como unha epidemia. E como toda epidemia que non se controla a tempo, estase a converter nunha pandemia que ameza con infectar o territorio galego. Que nadie se sorprenda cando dentro duns anos, e non serán tantos, todo o litoral galego sexa un continuo de urbanizacións desligadas do seu contorno, sen conexións coa cultura na que se insiren, nin respecto polo medio. Leer o resto …

Touciño e velocidade

O meu fillo regresou esta tarde a Barcelona, onde está estudando, despois de pasar unha semana na casa. E vai en tren, porque, como a moita xente non lle gustan os avións. 16 interminábeis horas de traqueteo (”al compás del chachacá”, como cantaba El Consorcio) atravesando o norte da Península nun tren que poderiamos tildar de antediluviano: o “Estrella Galicia”. Pois se este é a estrela ferroviaria dos galegos, non quero pensar como serán as máquinas máis normaliñas… Leer o resto …

Peche de campaña

E como non podía ser doutro xeito esta noite teremos o peche de campaña na miña terriña. Mitin a partir das dez da noite na Praza de Vilalonga, con intervencións dos catro primeiros candidatos da lista e mais Montse Prado, a delegada provincial de Innovación e Industria, que nos acompañará neste último acto de campaña.

Mitin en Portonovo

Hoxe estaremos de mitin en Portonovo, no Hotel Cachalote. Falaremos Albino Caneda, número sete da candidatura, Yoya e mais eu. Tamén intervirá o responsábel comarcal do BNG e membro do Consello Nacional, Duarte Correa.

Mitin en Sanxenxo

Esta noite teremos o mitin central desta campaña ás municipais. O lugar: o Pazo Emilia Pardo Bazán. Interviremos Sandra e mais eu e ademais estarán connosco Iria Aboi, a secretaria xeral de Galiza Nova,  e o senador e coordinador da Executiva Nacional do BNG, Francisco Jorquera. Non faltedes! 

Mitin en Arra

Hoxe toca visitar Arra. Ás nove e media mitin en Casa Zulema. Falaremos David Otero, Gloria González (Yoya) e eu.

Mitin na Adina

Esta noite faremos un mitin no Hotel Peregrina, na Adina. Interviremos Sandra F. Agraso, Yoya e mais eu.

De espellos e realidades

A realidade é como un espello no que cada un se ve como quere. Todos somos conscientes de que é un espello, pero o que nel se reflicte depende de quen o vexa. Pois ben, semella que algúns neste concello non son nin sequera capaces de recoñecer ese espello común, tan desviada está a súa perspectiva.   E como non son quen de ver ese espello tampouco son quen de transmitir o que outros intentan proxectar nel. Escoitan palabras, pero non saben onde e transmítenas terxiversando completamente o seu significado, coa esperanza de confundir á opinión pública e transformar, sempre para mal, a imaxe que a xente ten das cousas. Pero eu confío plenamente na intelixencia dos veciños deste concello, e agardo que saiban diferenzar entre as visións deturpadas que algúns van espallando por aí, e a realidade común a todos nós.

E despois desta digresión filosofante, lembrarvos que esta noite toca debatir en TeleSalnés. Os seis candidatos á alcaldía de Sanxenxo presentaremos as nosas propostas e botarémonos os trastos á cabeza. Ben, isto último supoño que non pasará, aínda que hei de recoñecer que de acontecer seguro que batiríamos récords de audiencia.