Punto e final

Esta mañá presentei a miña renuncia como concelleiro de Sanxenxo.

En política, como na vida, cada cousa ten o seu tempo e o meu tempo como concelleiro do BNG en Sanxenxo coido que tiña que rematar xa.

Os que nos presentamos como candidatos, encabezando unha lista, a calquera cargo público, estamos condicionados polo apoio que os votantes queiran darnos e cando se ve que estes apoios son menos, temos a obriga de deixar paso.

Isto é o que pasou coa candidatura do BNG en Sanxenxo nas últimas eleccións municipais.

Eu estou convencido de que é preciso un goberno nacionalista en Sanxenxo e que unha parte importante da súa poboación tamén. Mais tamén sei que os veciños e veciñas do noso concello dixeron, co seu voto, que non querían que eu fose alcalde.

Xuntando eses dous factores, desde o BNG, imos darlle á cidadanía a oportunidade de que poida elixir o goberno que quere sen que eu sexa un inconveniente.

Dentro do BNG, e na súa contorna, hai xente capacitada para poder liderar ese proxecto. Agora temos dous anos para atopar a persoa máis axeitada para iso e estou seguro que o conseguiremos.

A min agora só me queda dicir dúas cousas: desculpas e grazas.

Desculpas, por unha banda, a todos aqueles que, de palabra ou acción, puiden ofender, sen pretendelo, no exercicio do meu cargo e por outra, aos que depositaron a súa confianza na miña persoa e non viron colmadas as súas pretensións.

Grazas, a todas e a todos que sempre me apoiaron incondicionalmente. Aos militantes do BNG, aos simpatizantes e a todos e todas que por algunha razón confiaron en min: grazas, unha e mil veces grazas!

Programa “Paifillonai”

O grupo de goberno do PP de Sanxenxo aprobou, na Comisión de Contas celebrada hoxe, as tarifas para o programa “Paifillonai” que se desenvolve nos meses de verán.

Segundo informan, na prensa de hoxe, a suba das tarifas con relación ás do ano pasado van desde o 18,4 ao 20% para os residentes no municipio.

Ademais engaden que “con estas tarifas queren primar ás familias de Sanxenxo”.

Esta actuación ven a confirmar o que o BNG leva anunciando desde hai tempo, que nos momentos de crise, como a actual, os gobernos do PP comezarían as “rebaixas” pola desatención nas áreas do benestar social.

Non é de recibo que, mentres os concelleiros do PP manteñen os seus soldos millonarios, lembremos que a alcaldesa cobra 4.600 euros ao mes, incrementen nun 20% un servizo que é fundamental para que moitas familias de Sanxenxo poidan traballar nos meses de verán.

Como pode unha familia que cobra 800 ou 900 euros ao mes pagar 136 por deixar atendidos aos seus fillos para poder traballar? Non digamos si teñen que pagar por dous!

Así é como comprende o benestar unha alcaldesa que presume de levar persoalmente esa área de goberno. Non pode entenderse que nuns orzamentos multimillonarios como os de Sanxenxo non se favoreza as axudas ás familias que son as verdadeiras necesitadas.

O grupo de goberno do PP de Sanxenxo non quere primar ás familias do municipio, senón que o quere con estas tarifas é tomalos por “primos”!

Xunta Xeral de Ínsula Sanxenxo, S.L.

A empresa municipal Ínsula Sanxenxo, S.L. foi constituída no ano 2006 e a día de hoxe, 3 anos despois, o goberno do PP de Sanxenxo inda non foi capaz de facer a inscrición definitiva no Rexistro Mercantil, o que demostra a súa incompetencia mais absoluta.

O día 14 de agosto de 2.007 celebrouse unha Xunta Xeral da devandita empresa na que se modificaron os estatutos, segundo indicaba o Rexistro Mercantil.

O día 22 de xullo de 2.008 volveuse a celebrar unha Xunta Xeral na que se modificaron outra vez os estatutos, seguindo as directrices que esixía o Rexistro Mercantil.

O pasado luns, día 2, recibimos a convocatoria dunha nova Xunta Xeral de Ínsula Sanxenxo, S.L. para celebrar o xoves día 5 na que, entre outros asuntos, vólvense a modificar os estatutos, a requerimento do Rexistro Mercantil, para a súa correcta inscrición.

O BNG votou en contra da ratificación da realización da Xunta polos defectos de forma na súa convocatoria.

A lei 2/1995, de Sociedades de Responsabilidade Limitada, no seu artigo 45.2, di que as convocatorias deberanse facer polos administradores da mesma. Esta convocatoria foi feita e asinada só pola alcaldesa.

O artigo 46.3, da mesma lei, di textualmente: “Entre a convocatoria e a data prevista para a celebración da reunión deberá existir un prazo de, ao menos, 15 días”. Esta convocatoria foi feita e asinada o día 2 para celebrar o día 5.

As convocatorias anteriores foron feitas cumprindo a lei.

Non pode entenderse tanta presa despois de agardar case tres anos para inscribir definitivamente a sociedade!

Dicir que o BNG impediu a celebración da Xunta Xeral porque “non lle ía ben a hora” só pode entenderse desde unhas mentes valeiras como as dos nosos gobernantes do PP.

A soberbia da que fan gala desde que están subidos no seu “becerro de ouro” non lles permite ter o máis mínimo respecto polos concelleiros e concelleiras da oposición, convocando xuntas e plenos en horario laboral, sen importarlle que teñan que ausentarse dos seus postos de traballo, co risco que iso ten para quen traballa na empresa privada.

Cando o grupo de goberno “autoimpúxose” os seus desorbitados soldos, dixeron que ían dedicarlle ao Concello as 24 horas do día. Pasados 2 anos xa todos os veciños e veciñas de Sanxenxo saben que a súa “dedicación” é só á hora de cobrar e por iso moléstalles celebrar as reunións fora do “seu horario de traballo”.

Os membros do grupo de goberno do PP de Sanxenxo pensan que o posto de alta remuneración que gozan na actualidade vailles durar toda a vida.

Si en 3 anos non foron quen de inscribir a sociedade no Rexistro Mercantil, a saber canto tardarán en facer a primeira vivenda.

Mentres tanto dedícanse a “despilfarrar” cartos públicos en soldos inútiles e alugueiros, como están a facer na empresa Ínsula, que conta con 3 empregados e un local, sen ter actividade algunha.

Son moi previsíbeis!

Dicía eu nunha entrada neste blog, o día 12 de xaneiro, que o goberno do PP ía usar os 3 millóns de euros do Fondo Estatal de Investimento Local como propaganda electoral.

Iso non quere dicir que eu sexa adiviño, nin moito menos, o que pasa é que despois de case 6 anos “lidiando” con eles un xa sabe de antemán como van actuar.

Onte a páxina web do Concello publica a seguinte nova: “O Concello de Sanxenxo destinará máis de 280.000 euros ao acondicionamento de 21 áreas infantís”. (Ben, como xa sabedes, isto está traducido!).

Esta nota é a que mandaron á prensa e que sae publicada hoxe.

Con esta nova, La Voz de Galicia vai máis alá e, lendo o titular,  xa lle atribúe o investimento non ao Concello de Sanxenxo senón que son cartos da propia alcaldesa!

Se non fora que este investimento está reflictido na proposta da alcaldía, para usar os cartos do Fondo Estatal, case me convencerían a min tamén.

Agora só nos resta saber a que empresas lle “conceden” as obras.

Saberémolo en poucos días… e tereivos informados.

A vergoña dos plenos de Sanxenxo

O pasado luns día 2, celebrouse o pleno extraordinario para elixir aos membros das mesas electorais nas eleccións ao Parlamento de Galiza do vindeiro 1 de marzo.

Este é un pleno de trámite que sempre hai que celebrar cando se convocan eleccións. Estes plenos nunca tiveron transcendencia mediática, porque nunca prantexaron problemas. Teñen un único punto e non hai debate nin  votacións.

O sorteo faise mediante un programa informático.

Tivo que chegar este novo grupo de goberno do PP, ou mellor dito: tivo que chegar esta alcaldesa, para que un asunto de mero trámite tivera repercusión nos medios de comunicación e, como sempre, de xeito negativo.

A polémica xurdiu ao darse unha explicación no pleno de que primeiro se ía facer o sorteo para elixir aos “suplentes” e logo aos “titulares”, expresións que levan a pensar que estamos a falar de persoas e non de sorteos.

Ante o debate suscitado por esta “aclaración”, a alcaldesa solicitou a presenza do funcionario encargado do sorteo para que explicara o motivo de facer primeiro o dos “suplentes” e logo o dos “titulares”, manifestando este que se facía así porque o último sorteo era o que quedaba “grabado” no ordenador.

En ningún momento se dixo que eran dous sorteos iguais nos que se elixían todos os membros das mesas, tanto titulares como suplentes, e que se facía un segundo sorteo “reserva” para que, no caso de haber algunha reclamación ou erro, non se tivera que convocar outro pleno, explicación que deixaría claro o asunto e evitaría a polémica xurdida.

Onte día 6 convocouse un pleno urxente, para volver a facer o sorteo, con dous puntos na orde do día: o primeiro para anular o sorteo do día 2 e o segundo para facer o novo sorteo.

Ao comezo da sesión a alcaldesa informou que ao ir a notificar ás persoas elixidas, no pleno do día 2, detectouse que algunhas xa non estaban censadas no concello e que, ao buscar onde estaba o erro, comprobouse que para facer aquel sorteo utilizárase erroneamente o censo das eleccións xerais do ano pasado.

Na quenda de intervencións eu manifestei que os veciños e veciñas de Sanxenxo non tiñan porque pagar os erros cometidos polo Concello e que polo tanto os concelleiros do grupo municipal do BNG renunciabamos ao cobro da asistencia a este pleno e pedín que así constara na acta.

Á alcaldesa, como sempre, –pau se remas, pau se non remas- semellou non gustarlle o noso posicionamento e dixo que xa vía os titulares da prensa do día seguinte, nos que o BNG anunciaba a renuncia ao cobro das asistencias. Tamén especulou con que os nacionalistas utilizabamos calquera erro dos funcionarios para saír na prensa.

Cal non sería a miña sorpresa, ao repasar a prensa de hoxe, cando, en vez de ver o titular que anunciaba a alcaldesa (cousa que non me extrañou porque non lle dixéramos nada), vexo que é ela a protagonista dos titulares, e “cargando” contra os funcionarios.

“Cosas veredes amigo Sancho!”

O desta muller coido que é cuestión de estudo!

Infraestruturas e soldos

Rematado o exercicio de 2.008 no Concello de Sanxenxo podemos tirar dúas conclusións: unha boa e outra mala.

A boa, segundo se mire, é que non aumentou o endebedamento financeiro.

A mala é que, ao non pedir o préstamo de 2.211.719 euros que estaba previsto no orzamento, deixáronse de executar infraestruturas moi importantes para os veciños e veciñas do Concello.

Lembremos para que eran estes 2,2 millóns de euros:

- Cidade Deportiva de Sanxenxo ………… 804.457 euros.
- Centro Socio-Cultural O Revel …….……. 562.512 euros.
- Recuperación Litoral Ría de Arousa …. 444.750 euros.
- Gardería de O Revel …………………………. 400.000 euros.

     TOTAL ………………………………….….. 2.211.719 EUROS.

E por que había que pedir un préstamo para estas obras si xa estaban previstas e figuraban no orzamento do ano 2.007?

Pois porque xurdiron dous imprevistos:

- Enlace da Autovía co Parque Empresarial ..….. 1.500.000 euros.
- Nova Estrada Parque Empresarial a Vilalonga ..… 711.719 euros.

       TOTAL ……………………..…………………………….. 2.211.719 EUROS.

Como a economía non está para pedir moitos préstamos, os gobernantes do PP de Sanxenxo pensaron (?) e decidiron:

Deixamos de facer o Centro Socio-Cultural e a Gardería de O Revel e botámoslle a culpa ao Informe ISA que nos pediu a Xunta no ano 2.007.

Tamén podemos deixar de facer a Cidade Deportiva de Sanxenxo e volvemos a botarlle a culpa á Xunta, polo da ampliación da Vía Rápida ata o Grove.

O da recuperación do Litoral da Ría de Arousa podemos deixalo sen facer, total xa o temos prometido desde hai anos e non pasou nada por non facelo.

A nova estrada do Parque Empresarial ata Vilalonga ten que agardar porque a Deputación ten que poñer outro millón e non lle deben quedar moitos cartos para iso.

O que non podemos deixar de pagar é o millón e medio do enlace co Parque Empresarial que senón cabreamos a algúns!

Tranquilos, deixamos de facer un par de proxectos máis que estaban previstos nos 26 millóns para investimentos e xa está, total ninguén nos vai dicir nada porque todo o mundo sabe que coa crise o Concello tivo menos ingresos.

Pero, inda que o Concello teña menos ingresos, os nosos 362.200 euros anuais estarán seguros, non?

Tranquilos, eses están garantidos.

Pois entón, viva la vida, as infraestruturas previstas xa se farán e cos 3 millóns de ZP xa lle dicimos aos veciños que estamos gañando o soldo!

Inventario Municipal de Bens

No ano 2.001, Telmo Martín, ao mesmo tempo que comezou a tramitación do PXOM tamén contratou a unha empresa (de Madrid, por suposto!) a realización dun estudo para actualizar  o Inventario Municipal de Bens, polo “módico” prezo de 49.200 euros (8.200.000 pesetas daquel entón).

O estudo foi entregado ao Concello no ano 2.002.

É moi bonito! Ten unha chea de Tomos que están agardando, desde aquel entón, no despacho da Secretaría Xeral a que se constitúa a Comisión para analizalo e aprobalo!

Isto provoca que, a día de hoxe, o Concello non teña a completa seguridade de que propiedades son municipais.

Xa quedou demostrado polo BNG no ano 2.005 cando se dubidou si o Concello era propietario ou non dunha parcela dentro do Solo Urbanizábel de Miraflores.

Naquel entón, ante a denuncia do BNG, o Concello constitúe unha comisión para determinar si a parcela era propiedade municipal e o 7 de xaneiro de 2.005 a devandita comisión levanta unha acta confirmando a titularidade do Concello.

O 31 de xaneiro do mesmo ano o goberno municipal recoñece, mediante nota de prensa a titularidade da parcela.

O día 8 de febreiro seguinte, outra comisión corrixe á primeira e confirma que a parcela non é municipal.

Todo este “esperpento” confirma o descontrol que hai no Concello no que atinxe aos bens de titularidade pública.

O actual goberno do PP, lonxe de corrixir este xeito de actuar, segue o mesmo camiño.

No ano 2.005 o Concello mercou as fincas de O Revel. No ano 2.007 mercou parcelas en Dorrón para ampliar o colexio público. Hoxe, 2 e 4 anos despois, levouse á Comisión de Contas a inclusión no Inventario Municipal de Bens destas propiedades.

Sen tempo non é!

Mais, pensades que foi por decisión propia? Pois non!

Isto faise porque no mes de maio de 2.008, hai case un ano, a Consellaría de Educación requírelle ao Concello un certificado da Secretaría Xeral no que se faga constar que as parcelas, para a construción dos novos colexios de Vilalonga e Dorrón, figuran no inventario de bens.

Unha vez mais teño que rematar dicindo: éche o que hai!

Pleno Extraordinario

Onte celebrouse o pleno para aprobar os proxectos que se van facer co Fondo Estatal de Investimento Local.

Foron aprobados claro. Os concelleiros e concelleiras do BNG votamos en contra, non porque non queiramos que se fagan os proxectos, senón polo xeito.

En primeiro lugar porque o BNG xa manifestou no seu día que o decreto do goberno central é un parche para tapar as carencias de financiamento que teñen as corporacións locais.

O goberno de Madrid non quere saber nada de abrir un debate para chegar a acordos que solucionen dunha vez este problema.

Esta foi outra das medidas ao estilo Zapatero: “café para todos”. Lembremos os 2.500 euros por fillo ou os 400 euros das rendas. Tanto da os ingresos que teñan as familias.

Agora fan o mesmo con este fondo. Dividiron os 8.000 millóns de euros entre o número de habitantes dos concellos e ala, o que tocara! Non se teñen en conta para nada outras circunstancias que diferenzan aos concellos galegos. Tanto da un concello de Castela cun só núcleo de poboación que un galego con 100 núcleos espallados!

Con estes cartos, “caídos do ceo”, gobernos municipais como o de Sanxenxo, que nunca teñen en conta a opinión dos grupos da oposición, van vender estas obras como xestión propia e para seguir mercando vontades!

Que importa que estes proxectos non cren novos empregos, o importante é que se beneficie aos veciños afíns e que as “nosas” empresas sigan tendo “choio”!

A alcaldesa dixo que igual que son estes 32 proxectos podían ser outros 30 calquera. Mais son estes o non outros, porque será?

Nin o portavoz do PP nin a alcaldesa foron capaces onte de defender a súa proposta de obras. En vez de facer isto, dedicáronse a descualificar ao BNG (estamos en campaña!), chegando a dicir que eles facían as cousas con transparencia non como o BNG que ten comprados aos medios de comunicación!

Xa facía tempo que non me ría tanto!

Fondo Estatal (III)

Outro dos proxectos que presenta o Concello para gastar os cartos do Fondo Estatal de Investimento é o asfaltado do vial que vai de Dadín ata Gondar, na curva do Reiniño para entendernos.

Por parte deste vial transcorre a nova estrada, proxectada no PXOM, que vai do Parque Empresarial ata A Xuncabranca en Vilalonga.

A construción deste novo vial foi anunciado pola alcaldesa o día 8 de marzo do ano pasado, dicindo que se faría no ano 2009 mediante un convenio coa Deputación e que tería un custe de 1,7 millóns de euros.

Si agora queren asfaltar parte dese vial, unha de dúas, ou non teñen pensado facer a nova estrada ou  vanse “tirar” 51.617 euros do erario público!

Claro que, como os cartos veñen de Madrid…

Fondo Estatal (II)

Onte dixen que a maioría dos proxectos presentados polo PP, como destino dos fondos estatais, son necesarios.

 Dixen a maioría, e non todos, porque hai algúns investimentos que terán que xustificar moito a súa necesidade.

Comezarei hoxe co denominado: “Pavimentación de vial en Seixal – Parroquia de Padrinán” .

Segundo o plano que acompaña ao proxecto, trátase dun camiño que non leva a ningures.

A que veciños pode beneficiar o asfaltado dun camiño que remata en solo non sectorizado?

De que van a servir os 33.597,56 euros que se van gastar aí?

Mañá seguirei con máis proxectos!