477 temas (306 sen ler) en 21 canles
Anxo Quintana
(13 sen ler)
[xml|www]
Paz Abraira
(59 sen ler)
[xml|www]
Francisco Jorquera
[xml|www]
Iago Tabarés
[xml|www]
Olaia Fernández Davila
[xml|www]
Bieito Lobeira
(1 sen ler)
[xml|www]
Charo Fernández Velho
[xml|www]
BlogsMunicipais
(233 sen ler)
Dominga Brión
(56 sen ler)
[xml|www]
Xoán Santaló
[xml|www]
Félix Juncal
[xml|www]
Roberto Fernández Lores
(56 sen ler)
[xml|www]
Fina Quintáns, Portavoz Municipal do BNG de Oleiros
(40 sen ler)
[xml|www]
Rocío da Igrexa Prego, Candidata do BNG á Alcaldía de Cerceda
[xml|www]
Xosé Manuel Becerra
(28 sen ler)
[xml|www]
Sandra González
[xml|www]
Víctor Caamaño Rivas
[xml|www]
Santi Domínguez Blog
(8 sen ler)
[xml|www]
Rosana Pérez
(9 sen ler)
[xml|www]
Xurxo Rodríguez Méndez
(10 sen ler)
[xml|www]
O blog de Xabier Iglesias
(12 sen ler)
[xml|www]
O blog de Xosé Anxo Laxe
(14 sen ler)
[xml|www]
BlogsMunicipais (100 sen ler)
Volve a Ribeira a exposición “TRANSFORMANDO GALIZA”, unha iniciativa que continúa por todo o País e a través da cal o BNG pretende dialogar coa sociedade galega e amosarlle o traballo das consellarias nacionalistas na Xunta de Galiza durante estes tres últimos anos.
DATA: Sábado, 30 de agosto.
LUGAR: Paseo do Malecón, ao carón do Palco da Música. RIBEIRA.
HORA: A exposición do camión do BNG “Transformando Galiza”, estará aberta ao público entre as 10:00 e as 15:00 horas. Actuará un mago e repartiranse agasallos entre as persoas asistentes.
A Consellaría de Vivenda e Solo abre o prazo para a presentación de alegacións ao plan do macropolígono comarcal
Clica na imaxe para ver a Ordenación do Polígono en PDF
A Consellaría de Vivenda e Solo ven de informar que se somete a información pública durante un prazo de dous meses, dende a a súa publicación no Diario Oficial de Galiza, o Proxecto Sectorial do Parque Empresarial de Barbanza, nos concellos de Ribeira e A Pobra do Caramiñal e Informe de Sostenibilidade Ambiental do Proxecto Sectorial do Parque Empresarial de Barbanza, nos concellos de Ribeira e A Pobra do Caramiñal.
Durante ese prazo, calquera persoa poderá examinar dita documentación, en horario de oficiña, nas dependencias da Consellería de Vivenda e Solo, sitas no Polígono de Fontiñas, Área Central, s/n, en Santiago de Compostela e nos concellos de Ribeira e A Pobra do Caramiñal e presentar ante esta Consellería as alegacións, documentos e xustificacións que estime pertinentes.
Cúmprese así un requisito máis para a construción do Poligono Comarcal da Barbanza con máis dun millón de metros cadrados de superficie, dos cales a metade estarán ocupados pola actividade meramente industrial.
A Consellería de Vivenda, que dirixe Teresa Táboas, espera que a licitación das obras se produza a finais deste ano.
Nova na Voz:
Vivenda abre o prazo para a presentación de alegacións ao plan do macropolígono
ADEGA e a Plataforma Medioambiental de Corrubedo veñen de apoiar a moción presentada polo BNG para que o concello de Ribeira solicite a declaración de Espazo Natural de Interese Local para a “Laxe Brava” (Corrubedo) e toda a contorna do cabo Corrubedo
Van de seguido uns paragrafos da nota de prensa:
“Diante das intencións da Consellería de Pesca –coa complicidade indignante da de Medio Ambiente– de esnaquizar 308.000 m2 de litoral corrubedense virxe na punta da Laxe Brava por medio do Plan de Acuicultura de Galiza, o Concello de Ribeira pode escudarse na Lei Galega de Conservación para afastar os seus bens máis prezados das poutas das transnacionais e a especulación. Sería mediante a declaración desta contorna como “Espazo Natural de Interese Local”.
O BNG de Ribeira presentou o pasado 11 de xullo unha moción, que será tratada no primeiro pleno de setembro. A fórmula de Espazo Natural de Interese Local, prevista na Lei Galega de Conservación, evitaría o desenvolvemento urbanístico nunha zona con hábitats prioritarios e en parte integrante da rede Natura 2000 e paralizaría o plano sectorial de acuicultura. Para ADEGA e a Plataforma de Corrubedo non sería entendíbel que o Pleno do Concello de Ribeira non iniciase os trámites para protexer a costa de Corrubedo, pois no seu día se manifestou en contra do proxecto de macropiscifactoría na Laxe Brava…”
Máis información:
nota-de-adega-e-a-plataforma-de-corrubedo.pdf
Moción do BNG:
Laxe Brava: Espazo Natural de Interese Local
Nova en Galicia Hoxe:
Piden que Laxe brava sexa espacio natural de interese local
Novas relacionadas:
O BNG detén a aprobación do Plano Acuícola
Davila advirte de que “existe unha evidente falta de medios para protexer ás mulleres vítimas de malos tratos” e solicita que nos Orzamentos do Estado para 2009 “se consignen as partidas necesarias para garantir unha aplicación efectiva da Lei Integral contra a Violencia de Xénero
Madrid,11 de Agosto 08. A parlamentaria do BNG no Congreso dos Deputados, Olaia Fernández Davila, ven de presentar unha iniciativa na que lle demanda ao Goberno que incremente os medios policiais para a protección das vítimas da violencia de xénero.
A deputada nacionalista considera que a Lei Integral contra a Violencia de Xénero, que entrou en vigor o 1 de xaneiro de 2005, “foi un paso histórico (....) pero vemos como empezan a cobrar razón as voces que dende un principio advertirion que a lei podería quedar sen efectividade se non se acompañaba dunha dotación orzamentaria suficiente para a súa aplicación, especialmente no referido á creación de xulgados especializados e na protección das vítimas”.
Só 600 policías para atender 36.000 ordes de protección
Así, Davila denuncia que “neste momento existe un claro déficit de persoal policial para protexer as vítimas da violencia de xénero”, tal e como puxeron de manifesto o pasado 28 de xullo todos os sindicatos con representación no Consello Xeral da Policía.
E é que segundo os últimos dados, a Unidade de Protección de Mulleres Maltratadas só conta con 600 axentes, para atender as 36.000 ordes de protección (solicitáronse un total de 91.441) dictadas polos xuíces dende que se comezou a aplicar a lei.
Neste sentido, a deputada do BNG subliña que “durante o debate parlamentar da lei consideráronse necesarios uns 5.000 policías para facer efectivo o seu cumprimento”.
Deste xeito, Davila denuncia que “neste momento nas grandes cidades do Estado cada policía adicado á protección das vítimas da violencia de xénero ten ao seu cargo máis de 20 ordes de protección de vítimas, cando os protocolos de instrucción fixan un máximo de 12 ordes por axente para garantir unha protección efectiva”, unha situación que aínda se agrava máis nas comisarías locais ou de distrito.
Os Orzamentos do Estado para 2009 deben recoller as partidas necesarias para garantir o cumprimento da lei
A este respeito, a deputada do BNG comparte as críticas dos sindicatos ao feito de que o último Catálogo de Postos de Traballo para o Corpo Nacional de Policía, aprobado polo Goberno e que entrou en vigor en xaneiro deste ano, “non contemplase un dimensionado en recursos humanos e orzamentarios acorde coa magnitude do problema ao que nos enfrontamos”.
Ante esta situación, Olalla Fernández Davila solicítalle ao Goberno que nos Orzamentos Xerais do Estado para 2009 “se incrementen os recursos para garantir unha aplicación efectiva da Lei Integral de Medidas contra a Violencia de Xénero, especialmente no referido á creación de xulgados especializados e ao incremento do número de axentes de policía destinados á protección das vítimas”.
Asimesmo, pregúntalle ao Goberno se “é consciente de que a falta de medios para garantir a seguridade das mulleres vítimas da violencia de xénero pon en perigo moitas vidas” e, polo tanto, se “vai incrementar con carácter de urxencia o cadro de persoal da Unidade de Protección de Mulleres Maltratadas”.
Por útimo, e entre outras cuestións, a deputada do BNG solicita información sobre o número de axentes destinados en Galiza á protección das vítimas de malos tratos.
Iniciativa parlamentar:
proteccion_vitimas_violencia_xenero.pdf
O BNG reclamalle á Corporación Municipal que rexeite a proposta de modificación da Directiva sobre Tempo de Traballo, realizada o pasado 9 de xuño pola maioría cualificada de ministros e ministras de Traballo da Unión Europea
Tamén solicita que este acordo sexa trasladado á Presidencia do Goberno do Estado, á Presidencia do Parlamento Europeo e a todos os Grupos Parlamentares que conforman a Cámara Europea, e que se inste á Xunta de Galiza a dirixirse ao Goberno Central demandándolle que manteña en todas as reunións oficiais que se celebren sobre esta problemática unha posición claramente contraria a modificación desta Directiva
O pasado 9 de xuño en Luxemburgo, os ministros e ministras de Traballo dos 27 Estados da Unión Europea aprobaron, por maioría cualificada, a proposta de modificación da Directiva Europea sobre Tempo de Traballo.
Entre as modificacións previstas está a de incrementar a xornada laboral semanal, superando as 48 horas actuais, que poderá chegar até as 60 horas semanais e, no caso dos traballos con gardas, até as 65 horas. Estas xornadas poderán facerse en cálculo trimestral, co cal as horas semanais aínda poderán ser máis, xa que o único requisito para este incremento de xornada é un acordo individual entre a empresa e o traballador ou a traballadora.
Esta proposta do Consello de ministros e ministras de Traballo da UE chega logo de catro anos de debates e seis intentos frustrados, e racha con toda unha traxectoria, moi anterior á creación da UE, de redución das xornadas laborais.
Claro que tamén debemos destacar o apoio decidido do PSOE a esta modificación, co significativo abandono no transcurso da reunión onde se acordou do ministro español de Traballo, e a abstención na votación da delegación do Goberno español, que resulta aínda máis grave.
A loita pola minoración da xornada é unha constante da historia do movemento obreiro. A finais do século XVIII e comezos do XIX, os traballadores e traballadoras facían xornadas de até 16 horas diarias, dando lugar ao “Movemento polas dez horas” que, logo de anos de protesta, consigue as dez horas laborais, aprobada polo Parlamento inglés en 1847, cumpríndose inicialmente só para homes menores de dezaoito anos e mulleres de calquera idade; posteriormente, en 1874, xeneralizouse a todos os traballadores e traballadoras o límite máximo de 10 horas ao día. E agora a xornada proposta polos ministros e ministras da UE vólvenos a aquela data do ano 1847.
A primeira regulación que abarcou unicamente á duración da xornada laboral foi na Conferencia Xeral da Organización Internacional do Traballo (OIT), hai 91 anos, na que se acordou unha xornada de 8 horas ao día e 48 horas á semana. E en 1983, aprobouse no Estado Español, que a xornada máxima sería de 40 horas semanais.
Para o BNG, esta proposta dos ministros e ministras de Traballo da UE, é o maior retroceso social dos últimos anos e vai no camiño contrario dos logros que, logo de moitos anos de loita sindical, dábanse por consolidados.
Cada vez máis a desregularización do mercado laboral, dende normativas ou sentenzas europeas, incide negativamente nas conquistas sociais dos traballadores e das traballadoras galegas.
Iniciativa Municipal:
2008-07-18-directiva-ue-tempo-de-traballo.pdf
DATA: Sábado, 9 de agosto.
LUGAR: Paseo do Malecón, ao carón do Palco da Música. RIBEIRA.
HORA: A exposición do camión do BNG “Transformando Galiza”, estará aberta ao público entre as 10:00 e as 15:00 horas. Rolda de prensa de presentación aos medios ás 12:30 horas.
INTERVIRÁN: Dominga Brión, portavoz local do BNG no concello de Ribeira.
ASUNTO: Presentación da campaña do BNG “Transformando Galiza”. A exposición percorrerá toda Galiza nas vindeiras semanas. Nela poderase ver un resumo das iniciativas levadas a cabo polo BNG dende a Xunta de Galiza.
Perplexidade inicial e sorriso final: é o que nos produce a “resposta” dada polo PP de Ribeira logo da presentación en rolda de prensa das alegacións do BNG ao “anteproxecto para colectores xerais e EDAR de Corrubedo”. Perplexidade porque foi o propio Concello de Ribeira quén, coa publicación do correspondente anuncio no Boletín Oficial da Provincia o pasado 9 de xullo, abriu o prazo de vinte días para que calquera cidadán ou colectivo que o considere oportuno exerza o DEREITO de presentar diante da administración correspondente as propostas de mellora á obra que se presenta a exposición pública: eso son as alegacións. Dicir, como fai o grupo de goberno municipal que o BNG “chega tarde” porque o Concello xa as presentara antes, sendo como son coñecedores do prazo dos vinte días, converte o “chega tarde” nun lapsus no que se descobre que a tardanza á que alude o goberno municipal se refire “ao protagonismo” do que máis adiante nos acusa. E velaí a verdadeira preocupación do executivo local: o protagonismo.
Vexamos: no pleno do pasado maio, o BNG non só se pronunciou, como nega o Goberno local, senón que o fixo claramente anunciando que presentaría as súas propias alegacións que, en todo caso, serían complementarias, nunca contradictorias, con outras que se presentasen.
As alegacións do BNG inclúen, ademais das consensuadas en Pleno, algunhas relativas á calidade ambiental do Proxecto, á minimización das molestias aos veciños e veciñas de Corrubedo e á calidade paisaxística dun contorno, moi visitado. Refírense á diminución ao máximo da altura (cota) da EDAR, á minimización dos ruídos no exterior e proximidades da propia EDAR, á instalación de pantallas vexetadas así como á recuperación dos camiños afectados pola instalación.
As alegacións do BNG só pretenden propoñer a Augas de Galiza unha serie de melloras que todos e todas compartimos, pero só serán efectivas si se explicitan en tempo e prazo. Nós non temos culpa de que o Goberno Local “esquecera” introducir estas melloras nas súas alegacións. As preocupacións do executivo local polo que é un simple e democrático exercicio do dereito de alegación prodúcennos perplexidade e só se entenden polo interese en ocultar o seu “esquecemento” ou polo medo do Partido Popular a perder protagonismo diante da maioría social de Ribeira. A carencia de ideas deste Goberno é tal que cada vez máis recorre a actuacións a rebufo das iniciativas do BNG como quedou patente na recente convocatoria dun Pleno extraordinario, o último día, para a presentación de alegacións ao Plan Director de Instalacións Náuticas logo de que o BNG tivera levado a cabo unha campaña informativa e recollido varios centos de alegacións individuais de veciños e veciñas de Ribeira. Se daquela, nin agora, o BNG non criticou as alegacións aprobadas no Pleno, por que agora o PP critica as nosas? O dito, un sorriso.
Xosé Luís Groveiro
Concelleiro do BNG de Ribeira
Estamos xa metidos de cheo nas Festas de Verán, unhas festas que este ano por primeira vez inclúen unha verdadeira Semana Grande. Xa non temos que mirar para outras cidades con envexa e lamentarnos porque as nosas festas se limitaran a unha serie de concertos espallados ao longo do verán. Vigo merecía unha Semana Grande é este ano por fin a ten. Os vigueses e as viguesas poden sentir o verdaeiro espírito dunha cidade en festas. Fíxose un gran esforzo para programar un calendario de actividades para todos os gustos e para todas as idades. Elaborouse un programa que fixera posible sentir que a cidade está realmente de festa, que permitira vivir na rúa que Vigo está de celebranción. Hai música, teatro, maxia, danza, humor, cine, mostras de artesanía e gastronomía, actividades para os máis cativos…
Estes días estou acudindo a moitos dos espectáculos e actividades que se están desenvolvendo e a sensación que teño é que había moito tempo que a cidadanía agardaba por unhas festas de verdade, onde poder involucarse e gozar do ambiente festivo. A boa acollida que está tendo o programa anímanos a seguir mellorando para vindeiros anos, pero reafírmanos na idea de que este é o camiño que hai que seguir.
Non hai que esquecer tampouco que as Festas de Vigo, ademais de ser para goce dos vigueses e as viguesas, deben ser un aspecto que poña en valor a cidade e contribúa a súa proxección exterior. Teñen que ser tamén un dos sinais de identidade da nosa cidade. Este ano puxemos o primeiro chanzo para que andando o tempo as festas sexan un elemento máis de ínterese da cidade, como acontece noutros lugares.
Ese é un traballo que temos que facer entre todos. Desde o que a nós nos corresponde podedes estar certos de que imos seguir traballando a reo para perfeccionar todo o que sexa necesario. Pero os vigueses e as viguesas tendes tamén un papel moi importante que desenvolver. A vosa participación é fundamental. Convídovos a sumarvos á festa, a que participedes e gocedes das Festas de Vigo, as vosas festas.
O BNG de Ribeira presentou en tempo e forma sete alegacións ao anteproxecto de contrato de concesión de obra pública “Colectores Xerais e EDAR de Corrubedo, Ribeira (OH.315.756)” redactado pola Administración Hidráulica de Galiza, que se publicou no BOP nº 157 de 9 de xullo de 2008.
O saneamento integral de todo o Concello é unha vella reivindicación do BNG, conscientes da necesidade de dotarnos do mellor sistema de tratamento das augas residuais para o desenvolvemento sustentábel de Ribeira, preservando a riqueza da Ría da Arousa e o privilexiado entorno natural do que contamos: Parque Nacional das Illas Atlánticas, Parque Natural de Corrubedo e Lagoas de Carregal e Vixán, Rede Natura e outros espazos de especial protección.
Por esa razón, o BNG solicita que se teñan en conta as alegacións no expediente do contrato de concesión de obra pública “Colectores Xerais e EDAR de Corrubedo, Ribeira (OH.315.756)”, se nos notifique todos os actos administrativos que se decidan co obxectivo de formular alegacións, suxestións, etc. e no seu caso, os recursos que procedan así como todo tipo de medidas para dotarnos do mellor sistema de tratamento das augas residuais e defender o noso litoral e os nosos espazos protexidos.
Alegacións do BNG á EDAR de Corrubedo:
alegacions-edar-corrubedo-bng.pdf
O BNG ven de presentar unha moción diante do Pleno do Concello pola que lle solicita ao Goberno Municipal que solicite da Consellería de Medio Ambiente a declaración de Espazo Natural de Interese Local para a franxa Costeira do Faro de Corrubedo a Punta Espiñeirido incluíndo o promontorio de Laxe Brava e o seu contorno. Este acordo conleva o compromiso do Concello para o cumprimento das condicións incluídas no decreto 124/2005 de 6 de Maio, nomeadamente o de elaborar o Plan de Conservación e de Uso Público deste espazo.
Ainda que estaba na orde do día do pasado pleno de xullo, por falta de tempo será debatida no vindeiro pleno de setembro. A xeito de resume indicar que esta figura de protección, que debe ser solicitada a iniciativa do concello diante da Consellería de Medio Ambiente, obriga á elaboración dun plano de conservación que será vinculante para as administracións, prevalece sobre o planeamento urbanístico e, de ser aprobada, obrigará, de ser o caso, á revisión dos planos de ordenación territorial e/ou SECTORIAL incompatibles con co plano de conservación.
O patrimonio público paisaxístico e natural constitúe un valor que os poderes públicos teñen obriga de preservar, recuperar e poñer en valor tamén como recurso xerador de capacidades productivas.
O Concello de Ribeira e o seu contorno conta con espazos públicos de altísimo valor ambiental algúns deles con diferentes figuras de protección recollidas na Lei Galega de Conservación (Lei 9/2001 de 9 de Agos-to) e outras. Si aceptamos que estas figuras de protección favorecen a sustentabilidade destes espazos e, polo tanto, tamén da súa capacidade de creación de riqueza na pesca, marisqueo, turismo…, debemos tamén asumir a responsabilidade do Goberno Municipal á hora de velar polo interese xeral da poboación promovendo, desde a legalidade vixente, as medidas de protección a espazos locais de recoñecido valor nos casos que desde outras administracións competentes non se atendan.
É coñecida a intención da Consellería de Pesca da Xunta de Galiza (avalada por informes da Consellaría de Medio Ambiente e de Política Territorial) de detraer do dominio público gran parte dos 308 000 m2 que pretende destinar, como concesión, a empresa privada de producción acuícola dentro do Plan Acuícola de Galiza que a mesma consellería promove. Desoíndo os centos de alegacións presentadas, incluíndo o propio Concello, a Consellería de Pesca fixo caso omiso da práctica totalidade dos sectores sociais e cidadáns de Ribeira mesmo amosando, sen rubor, flagrantes contradiccións fronte a alegacións si aceptadas noutros lugares como Seráns e Couso.
A Lei 9/2001 contempla como figura de protección a de “Espazo Natural de Interese Local”. O decreto 124/2005 de 6 de Maio, desenvolve esta figura que debe partir da iniciativa dos propios concellos que debe-rán elevar a proposta, cos informes e trámites precisos, á Consellería de Medio Ambiente. A declaración de Espazo Natural de Interese Local conlevará a elaboración dun Plan de Conservación de Promoción así como unha partida orzamentaria que poderá ser complementada con axudas doutras administracións para as que terán caracter preferente.
Iniciativa Municipal:
2008-07-30laxebrava_interese_local.pdf
Máis información:
LEI 9/2001, DO 21 DE AGOSTO, DE CONSERVACIÓN DA NATUREZA
Espazos naturais de interese local / Voutureira – San Cibrao das Viñas
Unha ampla representación do BNG de Ribeira, encabezada pola voceira municipal, Dominga Brión, e o grupo municipal practicamente ao completo participou na multitudinaria manifestación nacionalista que percorreu as rúas de Compostela neste 25 de Xullo.
Máis de 25.000 persoas asistiron á manifestación convocada polo BNG con motivo do día da Patria Galega. No seu discurso, o portavoz nacional, Anxo Quintana, dedicou parte do seu tempo ao período de crise económica que estamos a vivir. Cualificou o actual período como a primeira crise da globalización ultraliberal: “Os apóstolos do ultraliberalismo agora gardan silencio fronte a unha crise global que evidencia o esgotamento do modelo enerxético baseado no petróleo, que evidencia todo o sen sentido especulativo do sistema financeiro mundial, e que revela unha aguda crise alimentaria que condea a millóns de persoas á fame extrema”.
O BNG presentou unha moción que se debaterá no Pleno do vindeiro luns, día 28, pola que reclama que o concello de Ribeira declare, a partir de 2009 e para sempre, o 24 de Xullo, Día da Dorna, Festivo Local.
A Festa da Dorna é unha festa orixinal e específica do concello de Ribeira que se ven celebrando dende hai 60 anos. Esta festa implica tanto á mocidade como a xente maior ao longo da súa celebración. Son milleiros os e as participantes nela e tamén son miles as persoas que visitan o noso concello durante estas celebracións.
En 2005 a Festa da Dorna foi Declara de Interese Turístico Galego e dende aquela tanto o BNG como a propia Cofradía da Dorna, avalada por miles de firmas, solicitaron que o 24 de xullo fose festivo local.
Esta medida facilitaría a participación e implicación dos e das ribeirenses que traballan este día, co cal contribuiríase a facer a unha festa máis grande e mellor. Como é sabido, os concellos teñen a potestade de fixar 2 festivos locais ao ano.
O BNG ven de presentar unha iniciativa municipal pola que solicita que o Goberno de PP do Concello de Ribeira, cumpra a Lei 52/2007, de 26 de decembro de Memoria Histórica e retire: escudos, placas e demais simboloxía franquista.
Tamén reclama que se cambie o nome das rúas que connoten a exaltación do antigo réxime totalitario por outros adaptados á nosa realidade galega.
No noso concello quedan varios símbolos franquistas na paisaxe urbana. Só por citar uns exemplos: o escudo preconstitucional da capitanía, o símbolo da falanxe en varias fontes e o sangrante caso do nome da rúa Xeral Franco no centro da nosa cidade. Son moitos os colectivos e persoas que se sorprenden que aínda teñamos no noso entorno todos estes símbolos. Dende o BNG xa temos solicitado anteriormente que se procedera a eliminar esta simboloxía que recorda a unha ideoloxía totalitaria e asasina, da que seguro ninguén se considera herdeiro.
A Lei 52/2007, de 26 de decembro, pola que se recoñecen e amplían dereitos e se establecen medidas en favor de quenes padeceron persecución ou violencia durante a guerra civil e a dictadura – máis coñecida como Lei de Memoria histórica – establece no seu artigo 15 sobre Símbolos e monumentos públicos o seguinte:
“As Administracións públicas, no exercicio das súas competencias, tomarán as medidas oportunas para a retirada de escudos, insignias, placas e outros obxectos ou mencións conmemorativas de exaltación, persoal ou colectiva, da sublevación militar, da Guerra Civil e da represión da Dictadura.”
Iniciativa municipal:
2008-06-05lei_memoria_historica.pdf
A Corporación Municipal do Concello de Ribeira, reunida onte, día 17 de xullo (último día para a presentación de alegacións) en pleno extraordinario e urxente, aprobou por unanimidade presentar unha alegación ao Plan Director das Instalacións Náutico Deportivas de Galicia elaborado polo ente público Portos de Galicia, nos seguintes termos:
Primeiro.- Manifestar a súa oposición á actuación 3.21: Reconfiguración das dársenas portuarias do Plan Director das Instalacións Náutico Deportivas de Galicia, xa que esta actuación suporía a eliminación dun treito da praia de Coroso – As Carolinas, a ocupación dunha importante superficie de lámina de auga e afectaría ao Paseo Marítimo que discorre a carón do mar.
Segundo.- Propoñer ó ente público Portos de Galicia a realización dunha ampliación da dársena deportiva de Ribeira que sexa racional e consensuada con tódolos sectores afectados, isto é, o propio ente público de Portos de Galicia, a Confraría de Pescadores de Ribeira, o Club Náutico Deportivo de Ribeira, todas aquelas entidades afectadas e o Concello como representante de tódolos veciños e veciñas.
O BNG de Ribeira ven de presentar alegacións para que se retire do Plan Director de Infraestructuras Náutico–Deportivas a actuación 3.21 referente á ampliación do Clube Náutico de Ribeira substituíndoa, en todo caso, por unha actuación máis racional, sustentábel e acordada con todos os sectores sociais afectados
Ao mesmo tempo durante estes días o BNG fixo unha campaña informativa e de recollida de alegacións. Hoxe entregamos no rexistro unhas 300 alegación ao Plano. Mañán, xoves, último día para presentar alegacións, faremos entrega do resto.
Por outra banda, mañán, último día para presentar alegacións, celebrarase un pleno extraordinario urxente para consensuar e aprobar unha alegación conxunta de toda á corporación a ampliación do porto deportivo de Ribeira recollida neste Plano de Portos de Galiza.
Alegacións do BNG de Ribeira:
2008-07-16-alegacions_plano_portos_deportivos.pdf
Nova no Canal Rías Baixas:
O BNG de Ribeira recaba o apoio da cidadanía en contra da ampliación do náutico
O BNG de Ribeira reclama que o Goberno Municipal dea cumprimento á moción aprobada no Pleno de 26 de febreiro para establecer unha liña de transporte que enlace o núcleo urbano de Ribeira co Vilar por Gude
No Pleno do Concello celebrado o 26 de Febreiro de 2007 aprobouse por unanimidade unha moción presentada polo BNG na que o Goberno Municipal se comprometía a realizar “as xestións oportunas para establecer á maior brevidade posible unha liña de transporte que enlace o núcleo urbano de Ribeira cos lugares de Gude e Vilar e cun número de servizos en función da demanda e das necesidades da poboación”.
Na exposición de motivos da devandita moción xa se aludía á importancia para os veciños e veciñas residentes, así como dos moitos visitantes que se achegan ó Parque Natural, de dispoñer deste servizo de transporte. As máis de 400 sinaturas que acompañaban a nosa petición así o confirmaban.
O 27 de xullo de 2007, o BNG volveu a insistir diante o Goberno municipal para dar cumprimento a este acordo plenario. Agora, ano e medio despois de ter tomado o acordo, o Goberno Municipal segue sen darlle cumprimento, cousa para os veciños e veciñas incomprensible dada a escasa cuantía económica dun servizo para o que, ademais, as Xunta de Galiza ten establecido liñas de finanzamento que o Goberno Municipal podería aproveitar.
Iniciativa municipal:
2008-07-16-transporte_vilar-gude.pdf
Nos últimos días estamos a escoitar máis dunha manifestación sobor da chegada do AVE á nosa cidade, os prazos de execución e os investimentos necesarios para que se cumpran os compromisos que veñen facendo tanto o presidente do Goberno como destacados representantes do PSOE. Son moitas as declaracións que se están a facer sobre esta infraestrutura, a situación actual dos distintos tramos do AVE en Galiza e o corredor do Eixo Atlántico, que debe servir para a unión de Galiza, e en especial Vigo, co norte de Portugal. A pesar diso a realidade é que non se disipan as dúbidas sobre cando e como chegará o AVE.
Galiza e Vigo xa sufriron as consecuencias de ser os últimos na chegada das autovías. Cando noutros lugares do Estado español xa tiñan resolta esa demanda, todavía andabamos aquí cos estudos informativos, informes de impacto ambiental, etc. Cando noutras zonas do Estado estaban desenvolvendo xa unha clara política económica vinculada ás comunicacións terrestres e transporte por estrada, as empresas viguesas e galegas tiñan que loitar con tempos de sete, oito ou nove horas para achegar os seus produtos a lugares como Madrid, Euskadi, Cataluña ou Andalucía.
Dende o Bloque Nacionalista Galego dixemos xa tanto no Parlamento do Estado en Madrid como en Santiago que non podemos permitir que unha vez máis sexamos os últimos na consecución dunha infraestrutura que é fundamental para o noso desenvolvemento. Os galegos e as galegas, os vigueses e as viguesas non somos cidadáns de segunda categoría e xa está ben de que todos os recursos teñan sempre destinatarios prioritarios noutras zonas do Estado español.
Os políticos e toda a cidadanía debemos esixir que se nos fale con claridade, que se nos diga cales son os investimentos que o Ministerio de Fomento ten previsto facer para cumprir o calendario de 2012 para a chegada do AVE e 2013 para o remate do Eixo Atlántico. Deben dicirnos, sen máis rodeos, cando se van a licitar os tramos que faltan entre Lubián e Ourense, que son a vía fundamental para que a chegada do AVE se faga en prazo. Diante da inconcreción que vimos padecendo, o mínimo que debemos exisir, porque non, é unha visita á cidade da ministra de Fomento para que lle explique a toda a cidadanía viguesa cales son os propósitos que o seu departamente ten a respecto da chegada do AVE a Vigo.
Coa presión en Madrid do BNG tense avanzado moito nestes últimos anos, como por exemplo conseguir que o 8% dos investimentos do Estado en materia de infraestruturas veñan para Galiza. Ben é certo que iso non é sufuciente. Si queremos que o AVE chegue no 2012 teñen que se triplicar estes investimentos, doutro xeito non será posible cumprir os prazos.
A Consellería de Política Territorial, a través do Ente Público Portos de Galiza presenta o “Plan Director de Infraestructuras Náutico- Deportivas”. Desde o pasado 7 de maio, está aberto o prazo para PRESENTACIÓN DE ALEGACIÓNS. O Plan Director prevé dúas intervencións no Porto deportivo de Ribeira, unha delas, a 3.21 suporía, de levarse a cabo, un serio atentado tanto á riqueza natural como económica de Ribeira e polo tanto ao seu patrimonio público.
Como afectará:
- Eliminará o areal das Carolinas na práctica totalidade.
- Do mesmo xeito o actual paseo marítimo, que discorre a carón do mar, separarase definitivamente del debido ao recheo que esta actuación ten previsto.
- O dique de abrigo e o recheo que o Plan prevé sepultarán definitivamente un banco de ostra autóctona e afectará seriamente ao banco e praia de Coroso.
- Entregará a mans privadas o que hoxe é un importante patrimonio de todos e todas.
- Non responde ás necesidades de Ribeira no ámbito dos deportes náuticos.
O BNG convida á cidadanía a manifestar a súa oposición a esta actuación do Plan Director de Infraestructuras Náutico-Deportivas e a presentar alegacións que demostren a oposición de toda a cidadanía de Ribeira a entregar o seu patrimonio natural e a súa capacidade productiva a intereses alleos. O vindeiro mércores, día 16 de xullo, de 11 a 13 horas, estaremos diante do Concello para dar máis información.
Modelo de Alegación:
modelo_alegacion.pdf
Clica na imaxe para ver a ampliación do muelle deportivo en PDF
O BNG de Ribeira vaia a presentar alegacións para solicitar que se retire do Plan Director de Infraestructuras Náutico Deportivas a actuación 3.21 referente á ampliación do Clube Náutico de Ribeira substituíndoa, en todo caso, por unha actuación máis racional, sustentábel e acordada con todos os sectores sociais afectados
O ente Portos de Galiza, da Consellaría de Política de Territorial, elaborou o Plan Director das Instalacións Náutico Deportivas de Galiza, que se atopa en período de exposición pública. Este Plan inclúe a ampliación do Porto deportivo de Ribeira até 700 prazas, moi por encima da demanda existente no noso concello.
Esta actuación supón o recheo de parte da praia de Coroso: practicamente toda a praia das Carolinas até preto das “Pedras de Patiño”. Supón unha privatización do uso dun espazo que na actualidade está sendo libremente utilizado pola cidadanía de Ribeira en xeral para paseo, baño, lecer ou deporte.
Como consecuencia, pasará a mans privadas, probablemente foráneas, ademais de destruír de xeito irreversible os recursos económicos que este espazo xera, nese caso si, na poboación local. De levarse a cabo esta infraestrutura tal como aparece no Plan, eliminaría un banco marisqueiro de ostra autóctona que existe na zona. Ademais, a súa influencia nas correntes mariñas ocasionaría prexuízos tanto na praia de Coroso como nos propios bancos marisqueiros.
Convidamos dende aquí a que presenten alegacións todas aquelas persoas que consideren perxudicados os seus lexítimos dereitos. O BNG estará o vindeiro sábado no mercadillo, de 11 a 13 horas, para dar información sobre este tema.
Nova no Canal Rías Baixas:
O BNG rexeita a ampliación do Náutico polos danos ó banco de Coroso
Nova na Voz:
Os nacionalistas de Ribeira consideran desproporcionada a futura ampliación do náutico