Feeds

756 items (596 unread) in 23 feeds

• Anxo Quintana (25 unread) [xml|www]
• Quin.tv (30 unread) [xml|www]
• Paz Abraira (120 unread) [xml|www]
• Francisco Jorquera [xml|www]
• Iago Tabarés [xml|www]
• Bieito Lobeira (3 unread) [xml|www]
• Charo Fernández Velho [xml|www]
• O blog de Francisco Rodrí­guez (11 unread) [xml|www]

BlogsMunicipais (407 unread)

• Dominga Brión (98 unread) [xml|www]
• Xoán Santaló [xml|www]
• Félix Juncal (6 unread) [xml|www]
• Roberto Fernández Lores (85 unread) [xml|www]
• Fina Quintáns, Portavoz Municipal do BNG de Oleiros (92 unread) [xml|www]
• Rocío da Igrexa Prego, Candidata do BNG á Alcaldía de Cerceda [xml|www]
• Xosé Manuel Becerra (55 unread) [xml|www]
• Sandra González [xml|www]
• Víctor Caamaño Rivas [xml|www]
• Santi Domínguez Blog (10 unread) [xml|www]
• Rosana Pérez (9 unread) [xml|www]
• Xurxo Rodrí­guez Méndez (10 unread) [xml|www]
• O blog de Xabier Iglesias (17 unread) [xml|www]
• O blog de Xosé Anxo Laxe (24 unread) [xml|www]
• Fernando Casal Tacón (1 unread) [xml|www]

Dominga Brión (98 unread)

• 

  Loita contra a sida

  Posted: December 2, 2008, 4:19pm CET by Domi

  

  O BNG de Ribeira non quixo faltar á cea solidaria que, como cada ano, organiza a a asociación antidroga Renacer, coa finalidade de recadar fondos para a súa loita contra a sida.

  Así, a portavoz do grupo municipal nacionalista, Dominga Brión (primeira pola dereita), e o Responsábel Local, Xosé Alberto Lorenzo (terceiro pola dereita), participaron neste acto solidario que congregou a unhas 120 persoas que encheron un coñecido restaurante ribeirense o pasado sábado, día 29 de novembro.

  Cabe lembrar que a prevención segue sendo a mellor arma na loita contra a sida.

  Nova na Voz:
  Noite solidaria en Ribeira

• 

  Actuación integral en dous lugares de Carreira

  Posted: December 1, 2008, 9:05am CET by Domi

  O BNG solicitou novamente diante do Goberno do PP unha actuación integral nos lugares de Toxeira de Antromatos e Barrosas, de Carreira, que supoña: a dotación de auga e saneamento; a canalización de pluviais, necesaria para evitar asolagamentos en torno a algunhas vivendas; a pavimentado de todas as pistas; a dotación dos puntos de luz necesarios

  En Carreira, concretamente nos lugares de Toxeira de Antromatos e Barrosas, preto da Capela da Guía, hai un nutrido grupo de vivendas, algunhas das cales contan con máis de 50 anos de antigüidade, que non dispoñen de auga e saneamento, a pesar de que chega moi preto das súas casas e de ter solicitado a dotación deste servizo en infinidade de ocasións.

  Esta veciñanza pensa que para este Grupo de Goberno hai xente de primeira, segunda e terceira categoría, incluíndoos a eles na última delas. Non poden crer que residindo en pleno centro da parroquia non conten cos servicios que hoxe en día se poden considerar primarios, falamos de auga, saneamento, alumeado público e estradas.

  Os accesos ás súas vivendas seguen a ser as pistas sen pavimento, moi deterioradas e que coas choivas do inverno se converten en lodozais intransitables, causando inseguranza incluso para a veciñanza que alí reside.

  É tamén necesaria a dotación dalgúns puntos de luz, así como a canalización de augas pluviais que impidan o asolagamento en torno a algunhas vivendas.

• 

  O PP é incapaz de recoñecer os seus erros

  Posted: November 28, 2008, 10:42am CET by Domi

  Mentres o BNG non dubida en promover diante do goberno de Ribeira, da Xunta ou do Estado calquera iniciativa que signifique unha mellora na calidade de vida da cidadanía de Ribeira ou mesmo respaldar calquera proposta na mesma liña, proceda de onde proceda, o Goberno do PP de Ribeira é incapaz de recoñecer os seus erros, primeiro paso para poder corrixilos, e só apoian aquelas iniciativas que van dirixidas á Xunta ou ao Estado cando eles non forman parte deses gobernos.

  Alegando que “xa están niso” ou que contan “co respaldo dos servizos técnicos”, votan en contra de calquera proposta do BNG e mesmo lles molesta que poñamos enriba da mesa as demandas da cidadanía, sobre todo se poñen en evidencia a súa xestión. Así quedou patente unha vez máis no Pleno Ordinario do pasado 24 de Novembro, no que o PP votou en contra de todas as nosas iniciativas, agás da moción pola que solicitábamos á Consellería de Política Territorial, Obras Públicas e Transporte a dobre bionda na Autovía da Barbanza.

  Estiveron a tempo de rectificar resolvendo favorabelmente o Recurso de Reposición contra a permuta de Fontán, no Touro. Pero non quixeron; seguen na súa teima de dilapidar o patrimonio público para beneficiar a uns poucos en perxuízo de todos e todas. Lembremos que nesta permuta o Goberno do PP cambia 3.000 m2 de edificabilidade para ampliar 41 m2 unha praza.

  Tamén rexeitaron a nosa iniciativa pola que reclamamos a protección e recuperación do Peirao Fenicio e na que instamos ao goberno do PP a reparar o deterioro ocasionado polas obras ilegais que o propio Concello fixo ao seu carón, negándose ademais a apoiar a proposta que lle fixemos de xestionar diante dos organismos competentes todas as axudas que estimen oportunas para recuperar este ben de interese cultural.

  Na mesma liña, foron incapaces de recoñecer as deficiencias existentes no alumeado público, a pesar de que a intervención do BNG e mesmo as imaxes aportadas durante o debate da iniciativa presentada interesádonos pola situación do alumeado público non deixaron lugar a dúbidas. Se non se recoñecen as eivas dificilmente se poden adoptar as medidas necesarias para arranxar con urxencia todas as deficiencias existentes no alumeado público, co cal, o risco de accidentes, do que xa temos padecido dolorosísimas experiencias en Ribeira, é unha evidencia.

  Ao longo das 4 horas que durou o Pleno o PP deu mostras do moito que lle molesta que dende o BNG poñamos en primeiro plano da actualidade política as demandas da cidadanía, como é o caso da moción presentada polo BNG reclamando o arranxo da Praza dos Muiños, que non chegou a debaterse por falta de tempo, pero que dende o BNG puxemos enriba da mesa durante o debate doutros puntos da orde do día, algo que irritou enormemente ao alcalde.

  Sen embargo, este goberno do PP non dubida en reclamarlle, sen ningún rubor, a outras administracións ou entidades o que eles mesmos son incapaces de facer como goberno municipal en Ribeira. Nesta liña, o BNG apuntou a situación que padecemos en moitas rúas de Ribeira co seu nome absolutamente ilexíbel, aproveitando o debate dunha moción do PP na que se pedía que na autoestrada AP-9, na saída de Padrón, se incluíse un indicativo de Ribeira. O PP demostra así unha e outra vez que só ve a palla no ollo alleo e é incapaz de ver a “viga” no propio.

• 

  Respaldo unánime da Corporación á dobre bionda

  Posted: November 27, 2008, 10:31am CET by Domi

  A Corporación Municipal de Ribeira respaldou de xeito unánime a iniciativa do BNG pola que solicitaba que o Pleno instara á Conselleria de Política Territorial, Obras Públicas e Transporte a que dote todo o percorrido da autovía do Barbanza cun sistema de protección de dobre bionda para os moteiros/as que circulen por ela

  Máis información sobre esta iniciativa

  Nova na Voz:
  A corporación reclama que se instale dobre bionda en toda a autovía da Barbanza

• 

  Impulso ao aforro enerxético no alumeado do Nadal

  Posted: November 25, 2008, 11:58pm CET by Domi

  O BNG ven de presentar unha iniciativa pola que lle solicita ao Goberno do PP que teña en conta criterios de aforro enerxético á hora da contratación e instalación do alumeado de Nadal coa contratación de sistemas que utilicen tecnoloxías eficientes e de baixo consumo

  Directivas europeas e as súas aplicacións normativas estatais e autonómicas veñen demandando a implantación progresiva de medidas de promoción do aforro enerxético nos diferentes servizos públicos. O alumeado público supón non só un importante gasto para as arcas municipais senón tamén unha importante contribución á contaminación atmosférica.

  No tempo de Nadal é habitual que o Concello contrate a instalación de alumeado ornamental. É pois unha boa ocasión para que se proceda, á hora da contratación, a seleccionar modelos de alumeado que apliquen tecnoloxías eficientes que supoñan un importante aforro enerxético. O Concello contribuiría tamén, con esta medida, a difundir na poboación o exemplo de que o aforro enerxético é cousa de todos e todas.

  Existen no mercado modelos que aplican lámpadas con tecnoloxía LED que, sen menoscabo da calidade estética, supoñen un importante aforro no gasto enerxético e no impacto ambiental conseguinte.

  Un hipotético maior custo de aluguer podería perfectamente ser compensado cunha máis racional distribución do tempo de uso e conexión. Isto permitiría tamén incrementar os puntos de ornamentación a máis lugares no rural que estes anos viron anuladas iluminacións que si tiñan anteriormente.

  Iniciativa Municipal:
  2008-11-25-aforro_enerxetico_nadal.pdf

• 

  Día Internacional Contra a Violencia de Xénero

  Posted: November 25, 2008, 11:49am CET by Domi

  O BNG ven de presentar unha iniciativa municipal pola que solicita que se mellore a efectividade das accións contra a violencia de xénero a través da creación de protocolos locais e/ou comarcais que incorporen os recursos sanitarios, sociais, educativos e de seguridade, e que teñan como finalidade axilizar o acceso á atención e aos recursos para as mulleres que padecen a violencia machista

  O 25 de novembro, Día Internacional Contra a Violencia de Xénero, ten que ser unha data de compromiso dos gobernos co conxunto de organizacións sociais e da cidadanía en xeral para a sensibilización e a actuación respecto do grave problema que constitúe a violencia machista.

  É, pois, unha data para a denuncia activa de toda a sociedade en contra da violencia que se exerce contra as mulleres en razón do seu xénero.

  Todas, todos, podemos facer algo contra a violencia machista

  Os cambios e avances no tratamento legal da violencia de xénero, os recursos creados para atender as mulleres en situación de violencia de xénero, as campañas de sensibilización e os pasos que se deron para avanzar na consolidación dos dereitos das mulleres son necesarios para loitar contra este fenómeno, mais é necesario optimizar o seu uso e achegalos con maior eficacia ás mulleres.

  Por outro lado, a prioridade das accións políticas que se dirixen á atención das mulleres que padecen a violencia machista é tal que non deben verse influídas por conxunturas económicas, antes ben, poñen en evidencia a necesidade de atender con maior eficacia á hora de prestar os recursos, aínda en momentos de crise.

  O papel que teñen os Concellos é fundamental, pois desde eles pódese garantir a atención, o acceso aos recursos e a prevención directamente. Así poden constituírse en modelo para todas as veciñas e veciños na actuación eficaz e posta en marcha de políticas de intervención reais e que sexan eficaces á hora de mentalizar na prevención da violencia e actuar coordenada e axilmente ante situacións deste tipo.

  Este compromiso é fundamental á vista das cifras de denuncias realizadas e cifras de casos concretos de violencia que en moitas ocasións acaban coa vida das mulleres a mans das súas parellas ou ex-parellas.

  É necesario implicar o conxunto da cidadanía, trasladarlle a información actualizada, e corresponsabilizar os axentes sociais para que poidan intervir directamente sobre os casos que se puiderem dar, porque tratándose dun problema de carácter social, imbricado nos valores sociais existentes e cun carácter estrutural, que ten as orixes nas relacións de poder historicamente desiguais entre homes e mulleres, precisa de medidas artelladas desde a propia sociedade.

  Temos que construír unha sociedade onde o centro sexan as persoas, sen distinción de sexo, e igualitaria.

  É por isto polo que cómpre a implicación de todas as administracións, tamén das municipais, no desenvolvemento de actuacións encamiñadas a previr e paliar esta situación. E son tamén os Concellos quen poden artellar mecanismos de responsabilización e implicación de toda a cidadanía para acabar coa violencia machista.

  Iniciativa Municipal:
  2008-11-25solicitude25novembro.pdf

• 

  Interesámonos pola situación do alumeado público

  Posted: November 23, 2008, 11:47pm CET by Domi

  O BNG ten presentada unha moción pola que solicita que se arranxen urxentemente todas as deficiencias existentes no alumeado público para evitar o risco de accidentes

  Na iniciativa municipal tamén se demanda que o Goberno do PP encargue un estudo da situación do alumeado público en todo o Concello e que informe do mesmo á Corporación Municipal

  Nos últimos días puidemos comprobar o estado de lamentable abandono no que se atopan as instalacións do alumeado público en diferentes lugares do noso Concello. Non hai máis que dar unha volta pola Avda. de Ferrol, Avda. da Coruña ou a Rúa de Galicia, entre outras, onde hai varias farolas que non teñen as tapas de rexistro das conexións, e están os cables ao alcance de calquera neno/a, podendo provocar un grave accidente. Tamén comprobamos que en Xarás, Sancortes, e no lugar de Sampedro en Palmeira os cuadros eléctricos atópanse sen porta, podéndose acceder a eles con facilidade. Na entrada ó porto da Ameixida, a conexión da acometida é unha verdadeira chapuza, pois á vista están os cables enroscados nun poste de formigón moi deteriorado, podendo provocar en calquera momento unha descarga eléctrica.

  O 20 de febreiro do 2007 faleceu un mozo por unha descarga eléctrica que recibiu ao apoiarse nunha farola do alumeado público. Entre outras cousas, o Grupo Municipal do BNG solicitou daquela que se adoptasen as medidas oportunas para que non volveran a suceder accidentes deste tipo.

  Preocúpanos e parécenos gravísimo que desde o Goberno do PP non se tomara ningún tipo de medida, e que se lle permita á empresa que ten a concesión do alumeado público ter as instalacións en tan lamentable estado co risco que isto supón de accidente grave, ou mesmo de morte.

  Iniciativa Municipal:
  2008-10-16alumeado_publico.pdf

• 

  Pleno Ordinario de Novembro

  Posted: November 23, 2008, 10:20pm CET by Domi

  

  Na sesión plenaria do vindeiro luns, día 24 de novembro, debateranse un importante número de iniciativas presentadas polo BNG: 6 mocións e un bo número de solicitudes, as que hai que engadirlle as pendentes de Plenos anteriores que non se trataron por falta de tempo. Cabe indicar que, por unha cuestión organizativa, está limitado o número de mocións a presentar por cada grupo municipal. En concreto ao BNG correspóndenos un máximo de 6. Lembramos que os plenos son públicos e poden asistir todas aquelas persoas que o desexen.

  Pulsa enriba da iniciativa para obter máis información sobre a mesma.

  As mocións son en relación cos seguintes temas:

  1.- Reclamamos a protección e recuperación do Peirao Fenicio
  2.- Solicitamos a dobre bionda na Autovía da Barbanza
  3.- Interesámonos pola situación do alumeado público
  4.- Reclamamos o arranxo da Praza dos Muiños
  5.- Demandamos un plan de fomento do transporte público
  6.- Interesámonos polo estado da rede de sumidoiros

  Outros temas de interese:
  Resolución do Recurso de Reposición contra a permuta de Fontán no Touro: o Goberno do PP cambia 3.000 m2 de edificabilidade por ampliar 41 m2 unha praza.

• 

  Interesámonos polo estado da rede de sumidoiros

  Posted: November 22, 2008, 11:53am CET by Domi

  O BNG de Ribeira ven de presentar unha moción pola que solicita ao Goberno Municipal do PP información en relación co estudo realizado sobre o estado da rede municipal de sumidoiros

  Tamén reclama que se leven a cabo, dun xeito planificado, as actuacións recomendadas no devandito estudo, e outras se fora preciso, para poñer fin ao grave problema de cheiros e inundacións que sofre periodicamente o noso concello. Ao mesmo tempo solicita que mentres non se solucione totalmente o problema, o Goberno Local poña en marcha medidas que minimicen e compensen, no seu caso, os problemas causados á cidadanía

  Desde hai moito tempo o BNG ten presentado iniciativas tendentes á superación dos problemas de cheiros e inundacións que o mal funcionamento da rede de sumidoiros ven causando á cidadanía de Ribeira. É este un problema que, sendo competencia de xestión municipal, non ten visos de solución pese a vir de moito tempo atrás. Por lembrar só algunha das últimas iniciativas, o BNG presentou en Outubro de 2007 unha moción instando ao Goberno Municipal á elaboración por empresa competente dun estudo técnico serio que incluíra as medidas correctoras posibles para poñer fin aos graves problemas de funcionamento da rede de sumidoiros en Ribeira. Incomprensiblemente, esta proposta fora rexeitada pola maioría de goberno do Partido Popular.

  En maio de 2008 volvéronse producir graves problemas de inundacións e cheiros no centro de Ribeira provocando as lóxicas protestas de veciños e comerciantes que, unha vez máis, vían seriamente afectada a súa actividade normal. Foi nestas datas que o Goberno Municipal anuncia na prensa “a inmediata contratación a unha empresa especializada dun informe técnico que, ao mesmo tempo ofreza solucións a este problema”. O Goberno Municipal asume así a proposta do BNG que rexeitara nove meses antes. Sen embargo, a estas alturas aínda o se nos informou do contido do devandito informe técnico ao resto dos grupos municipais.

  Iniciativa municipal:
  2008-11-14estudo_tecnico_cheiros_en_ribeira.PDF

• 

  A veciñanza reclama o arranxo da Praza dos Muiños

  Posted: November 19, 2008, 10:42pm CET by Domi

  

  A veciñanza e o BNG de Ribeira reclaman conxuntamente o arranxo da Praza dos Muiños

  O BNG presentou unha moción para debater no vindeiro Pleno Municipal pola que lle solicita, unha vez máis, ao Goberno Municipal do PP que arranxe con urxencia a Praza dos Muiños

  Na iniciativa tamén demanda que se adopten de inmediato as medidas de seguranza necesarias para evitar accidentes en tanto non se acometan as devanditas obras

  Pola súa banda, a veciñanza iniciou unha recollida de sinaturas para reclamar o arranxo da praza

  O BNG de Ribeira reuniuse cos veciños e veciñas da Praza dos Muiños para apoiar as súas demandas e darlle información en relación coa iniciativa presentada. Para o BNG o arranxo desa praza é unha necesidade imperiosa tanto para a veciñanza e usuarios da mesma, entre os que se atopan meniños e meniñas de 0 a 3 anos, como para toda a cidadanía de Ribeira.

  A Praza dos Muiños constitúe un espazo público de arredor de 2.000 m2 que, debidamente acondicionado, converteríase nunha zona de ocio no medio do casco urbano tanto para a veciñanza do entorno como para a de todo o pobo.

  Ribeira non dispón de moitas áreas de ocio porque para o goberno do PP iso nunca foi unha prioridade. A súa xestión neste concepto sempre deixou moito que desexar. Non hai máis que lembrar os 400.000€ presupostados para o arranxo da Praza do Concello que logo se “rebaixaron” milagrosamente en 100.000€. Ou a máis recente permuta de 3.000 m2 de edificabilidade co obxectivo de ampliar unha praza en 41 m2. Estas actuacións en áreas nun estado de conservación aceptábel, resultan claramente despilfarradoras de recursos económicos municipais, e representan ademais un agravio comparativo para co entorno da Praza dos Muiños que nos perxudica a todos e todas.

  Iniciativa Municipal:
  2008-11-14-praza-dos-muinos.pdf

  Nova na Voz:
  O mal estado da praza dos Muíños desata as queixas dos residentes e motiva unha recollida de firmas

  Nova relacionada na Voz:
  A praza das eternas promesas

  Hemeroteca dunha promesa incumprida da precampaña das Municipais 07:
  Nova no Correo:
  Proxecto de luxo para a olvidada plaza do barrio Os Irmandiños
  Nova no Canal Rías Baixas:
  O concello recuperará a Praza dos Muíños como espazo de ocio

• 

  Reclamamos unha actuación integral na fonte de Vixán

  Posted: November 18, 2008, 5:42pm CET by Domi

  

  O BNG presentou unha iniciativa municipal pola que lle solicita ao Goberno do PP de Ribeira que acometa unha actuación integral na fonte de Vixan que supoña a recuperación total do entorno:

  • A limpeza e mellora dos accesos
  • O saneamento do regato que leva as augas liberadas
  • A recuperación da fonte e do lavadoiro
  • A colocación de paneis informativos

  A fonte de Vixán era unha das fontes da parroquia de Carreira máis visitada, pero cada vez son menos os veciños/as da parroquia ou incluso de parroquias limítrofes que veñen a por auga. Moita desta xente queixase polo estado en que se atopa a fonte e os accesos á mesma. Na fonte tamén hai un lavadoiro que antigamente empregaban as xentes do lugar.

  Na actualidade as escaleiras que baixan á fonte dende a parte alta xa non se ven, están totalmente cubertas de silveiras, o mesmo lle pasa á propia fonte á que case non se lle ve o torno. Os accesos que hai á mesma dende o Roeiro, Vixán, Toxeira de Antromatos e Os Buxos están impenetrables; para chegar á fonte debese ir provisto dunha fouce para abrir paso. O lavadoiro está cheo de terra, cristais, latas e silvas; a cuberta case non existe. O regato polo que saen as augas liberadas que vai a dar á Ponte de Vixán, e posteriormente á Lagoa está colonizado polo lixo.

  A veciñanza recolleu sinaturas en repetidas ocasións solicitando ao Concello de Ribeira que se acondicione esta zona. Até o de agora só se fixeron intervencións puntuais e momentáneas, seguindo todo ese entorno sumido no abandono.

  Iniciativa Municipal:
  2008-09-01actuacion_integral_fonte_vixan.pdf

• 

  “Quintana demostroume que cumpriu”

  Posted: November 18, 2008, 3:46pm CET by Domi

  

  Encontro de Anxo Quintana coas redeiras en Quin.tv

  Manuela, redeira de Aguiño, cre que Quin é un político diferente aos outros: “Este tamén prometeu cousas, pero polo menos demostrou que o que prometeu cumpriuno”.

• 

  Que se manteña a ubicación do bar da Casa da Xuventude

  Posted: November 17, 2008, 11:37pm CET by Domi

  O BNG reclámalle ao Goberno do PP de Ribeira que tome as medidas oportunas para que se manteña a ubicación orixinal do bar da Casa da Xuventude

  A chamada Casa da Xuventude de Ribeira estase construíndo no barrio de Abesadas. Este é un equipamento para o que, dende o BNG, solicitamos reiteradamente a súa execución e adaptación ás necesidades da mocidade ribeirense.

  Na actualidade, próxima á Casa da Xuventude, estanse construíndo os cimentos dunha pequena edificación anexa que non aparece recollida no proxecto orixinal. Ao parecer, según información dos servizos técnicos municipais, trátase do bar da Casa da Xuventude que no proxecto orixinal aparecía noutra ubicación distinta. Neste momento estanse construíndo a cimentación desta edificación moi próxima a un edifico de vivendas que ten un supermecado no seu baixo.

  Tal como se está facendo, esta construción vai a estar situada a 2,70 metros da parede do edificio e a só 1,70 metros do voadizo do mesmo, quedando así moi preto das vivendas.

  A veciñanza non está dacordo con que esta edificación se sitúe tan preto das vivendas xa que poderían darse situacións de risco para a seguridade dos mesmos.

  Iniciativa Municipal:
  2008-11-15-modificacion_construcion_casa_xuventude.pdf

• 

  Solicitamos no congreso a retirada dos postes de telégrafos

  Posted: November 14, 2008, 11:45am CET by Domi

  O BNG SOLICITA NO CONGRESO QUE CORREOS “ARRANXE DE FORMA URXENTE” A SITUACIÓN DO SEU TENDIDO DE POSTES DAS RÚAS DE PALMEIRA

  Francisco Jorquera demándalle tamén ao Goberno que Correos “pague de forma inmediata as indemnizacións aos afectados polo accidente do pasado verán”, no que un camión enganchou os cabos e provocou danos en vehículos e nunha casa

  O portavoz do BNG no Congreso dos Deputados, Francisco Jorquera, ven de presentar unha iniciativa na Cámara Baixa pola que lle demanda a Correos que arranxe “de forma urxente” a situación do seu tendido na avenida de Palmeira (Ribeira).

  Francisco Jorquera denuncia que os vellos postes de madeira de Correos e Telégrafos “afean notablemente o entorno urbano, dificultan os tránsito para os peóns pola beirarrúa e supoñen un risco para a seguridade, xa que dificultan gravemente o tránsito de camións cara ao porto e os desfiles de carrozas durante as festas”.

  Ante esta situación, o deputado do BNG demándalle ao Goberno que Correos retire os postes da Avenida de Palmeira e que, en caso de ser necesario manter o tendido nesta zona, “se substitúa por un de menor impacto visual, como un tendido canalizado baixo terra”.

  “Correos debe pagar de xeito inmediato as indemnizacións polo accidente do pasado verán”

  Francisco Jorquera lembra que “a veciñanzas, os partidos políticos e o concello de Ribeira veñen manifestando dende hai anos a súa queixa pola situación deste tendido, sen que Correos e Telégrafos teña feito nada”.

  Neste sentido, advirte de que “o pasado verán un camión engarrou nun dos cabos de Correos nesta travesía e botou abaixo catro postes que danaron coches e a solaina dunha casa”.

  Sen embargo, a día de hoxe “os afectados polo accidente aínda non percibiron ningunha compensación debido, ao parecer, ás diferenzas entre a empresa aseguradora do camión accidentado e Correos”.

  O deputado do BNG considera que “a evidente mala situación do tendido de Correos foi o causante do accidente” e por iso demándalle ao ente postal que “pague con carácter de urxencia as indemnizacións aos afectados”.

  Iniciativa Parlamentar:
  2008-11-13-postes-correos-palmeira.pdf

• 

  Alegamos contra a permuta de Fontán, no Touro

  Posted: November 13, 2008, 3:00pm CET by Domi

  O BNG ven de interpoñer recurso de reposición contra o acordo do Pleno da Corporación, de 29 de setembro de 2008, polo que se aproba a permuta do 10% de aproveitamento urbanístico que lle corresponde ao Concello no Plan Parcial SUZ-4-Fontán co inmoble ruinoso sito na Avda. Xeneral Franco á altura do número 65, solicitando que se dicte unha resolución que revoque e anule o citado acordo plenario

  No Pleno Ordinario do pasado 29 de setembro o PP de Ribeira aprobou en solitario unha permuta pola que cambia o 10% da edificabilidade que lle corresponde na urbanización Fontán do Touro por unha edificación ruinosa na Rúa Xeneral Franco coa intención de derrubala para ampliar en 41 m2 unha pequena praza alí existente.

  Isto é tremendamente grave porque ese 10% da edificabilidade representa 582 m2 de terciario (en baixos e locais multiusos, sempre necesarios para a prestación de servizos a toda a cidadanía) e 2.390 m2 para a construción de 20 vivendas de protección oficial. Polo tanto, regalar todo isto a cambio de ampliar unha praza en 41 m2 parece, cando menos, un insulto á intelixencia da cidadanía de Ribeira

  A lexislación vixente establece a poxa pública como regra xeral de alleamento dos inmobles dos Entes locais, tal como se establece no artigo 112 do Regulamento de Bens das Entidades Locais, aprobado por Real Decreto de 1372/ 1986 (RBEL). A única excepción a esta regra é que no expediente que autorice a permuta queden precisadas e acreditadas as razóns concretas que a fagan aparecer como unha necesidade non simplemente como unha conveniencia.

  Consideramos, polo tanto, que non está suficientemente acreditada a necesidade desta permuta. Neste caso parece máis ben que esta permuta se fai pola conveniencia de beneficiar a un poucos en perxuizo de moitos, de toda a cidadanía de Ribeira. Non é entendible que nun momento de crise económica como o que estamos a padecer, á que lle hai que engadir o elevado prezo que dende hai algúns anos ten a vivenda en Ribeira, se priorice a política de permutas en detrimento de políticas sociais como a de dotacións públicas e a construción de vivendas de promoción pública. Así, se o Concello ten dificultade para a edificar estas vivendas só ten que cederlle a edificabilidade á Consellería de Vivenda e Solo para que ela se encargue.

  Por outra banda, outra das razóns que se alegan para impugnar o acordo plenario polo que se aprobou a permuta destes 582 m2 de terciario, máis 2.390 m2 de edificabilidade para a construción de 20 vivendas de protección oficial é a valoración da mesma. Parécenos moi grave que a valoración deste ben público se atope moi por debaixo do valor real e de mercado do mesmo. Así os 582 m2 valóranse en 90.210 €, e os 2.390 m2 valóranse en 195.597,60€. En total o valor do 10% da edificabilidade é de tan só 285.807,60€. Mentres, unha casa cunha superficie de chan de 41 m2, e cunha superficie contruida en estado ruinoso de 181 m2, se valora en 221.320,23€. O que aínda nos parece máis grave é que na súa valoración non se teña en conta que está afectada no PXOM de Ribeira practicamente no 50%. A diferencia compénsase entregando ao Concello unha cantidade de 64.487,37€.

  Aínda considerando importante crear espazos públicos, entendemos que non pode facerse a calquera prezo. A fórmula que adopta neste caso o goberno do PP é claramente perxudicial para os intereses de Ribeira. Cambiar preto de 3.000 m2 de edificabilidade por unha ampliación de 41 m2 nunha praza e pouco máis de 10 millóns e medio de pesetas parécenos un prezo demasiado alto; un despilfarro de recursos que un goberno responsábel non se debe permitir, e menos en época de crisis. Por esa razón solicitamos que se revoque e anule o devandito acordo plenario.

  Recurso Reposición Permuta Fontán:
  2008-10-28recurso_reposicion_permuta_fontan.pdf

• 

  Reclamamos novamente o arranxo da Praza dos Muiños

  Posted: November 12, 2008, 10:32pm CET by Domi

  

  O BNG de Ribeira reclámalle unha vez máis ao Goberno Municipal do PP que arranxe con urxencia a Praza dos Muiños

  Tamén demanda que se adopten de inmediato as medidas de seguranza necesarias para evitar accidentes en tanto non se acometan as devanditas obras

  O aspecto que presenta actualmente a Praza dos Muiños, un amplo espazo no centro do casco urbano de Ribeira, é absolutamente lamentábel: o seu entorno está cheo de maleza e a parte central da mesma en canto chove encharcase de auga, converténdose nun lugar tremendamente inseguro para toda a cidadanía, especialmente para os nenos e nenas que teñen que acceder por ela a unha escola infantil alí ubicada. Sen ir máis lonxe, hoxe mesmo unha señora sufriu unha caída que lle provocou unha grave lesión nun ombreiro. Ademais, a falla de impermeabilización desta praza produce importantes filtracións de auga ao garaxe que hai debaixo, ocasionando mesmo danos nos vehículos alí estacionados.

  O arranxo da Praza dos Muiños representaría poñer a dispor da cidadanía un amplo espazo público, algo que non abunda no casco urbano. Por esta razón trátase dunha actuación longamente demandada pola veciñanza, que ve como ano tras ano o goberno do PP incumpre sistematicamente as súas promesas de arranxala.

  O BNG, recollendo as demandas da veciñanza, presentou unha iniciativa en marzo na que lle reclamaba ao goberno popular que se remataran un bo número de obras que deixou abandonadas na localidade unha empresa que, daquela, suspendeu pagos. Entre elas a Praza dos Muiños.

  O Alcalde, en resposta ás preguntas do BNG comprometeuse en sesión plenaria, en máis dunha ocasión, a contratar con outra empresa as obras que quedaron abandonadas. Sen embargo nesta praza, pasado un tempo máis que prudencial, as obras aínda non se retomaron, o que demostra a incapacidade de xestión do goberno de PP, pese a ter unha persoa con dedicación exclusiva para obras. Isto é especialmente grave porque precisamente o abandono das mesmas deixou esta Praza nunha situación moito peor do que estaba antes de que as mesmas se iniciaran.

• 

  Solicitamos que se comprobe o Mirador de Cubeliños

  Posted: November 10, 2008, 4:03pm CET by Domi

  

  O BNG reclámalle ao Goberno Municipal do PP que dea as ordes oportunas para que os servizos técnicos municipais comproben se a urbanización Mirador de Cubeliños, que se está a construír en Cubeliños, se axusta á licencia concedida polo Xunta de Goberno Local acorde co Plan Xeral de Ordenación Municipal (PXOM) de Ribeira, especialmente no tocante a alturas, retranqueos, fondos máximos en planta baixa e plantas de pisos, ocupación e edificabilidade

  Tamén solicita que, de non ser así, se proceda á súa paralización inmediata e a restitución da mesma á legalidade vixente

  En Cubeliños, a carón da Escola Infantil Municipal de Ribeira estase construíndo un bloque de vivendas denominada “Mirador de Cubeliños”. A ordenanza que regula esta edificación no Plan Xeral de Ordenación Municipal (PXOM) é a 1ª: “Residencial intensiva colectiva en manzana”, destinada ás áreas de chan con alta densidade de poboación.

  Nos parámetros de edificación desta ordenanza cabe resaltar que a parcela mínima é de 100 m2, con un frente mínimo de 6 metros. A ocupación máxima é do 100%. O fondo máximo da planta baixa é de 25 m e de 18 m. nas plantas de pisos. Con respecto ás alineacións, a ordenanza establece as definidas nos planos correspondentes, con caracter obrigatorio.

  Se analizamos con detenimento o PXOM podemos comprobar o trato privilexiado que ten no mesmo este solar, tendo en conta que está a carón de parcelas reguladas pola ordenanza 6.3B e mesmo de chan rústico. No tocante á construción, polo que se pode apreciar a simple vista, parece que non se cumpren algúns dos parámetros de edificación, xa de por sí privilexiados. Por esa razón o BNG ten recibido queixas tanto da veciñanza máis próxima como da doutros puntos do Concello que non entende como se permite, nese entorno, ese volumen de edificación.

  Iniciativa Municipal:
  miradorcubelinos.pdf

  Nova no Canal Rías Baixas:
  O BNG pide que se corrixan irregularidades nunha urbanización en Cubeliños

• 

  Demandamos solucións para acadar o saneamento integral

  Posted: November 6, 2008, 4:46pm CET by Domi

  O BNG de Ribeira reuníuse coa Asociación Sagres de aguiño para tratar a situación da EDAR de Ribeira

  O BNG solicita que se respecte e se faga valer o acordo plenario unánime do día 30 de xullo do 2007 e, ao mesmo tempo, que o Goberno Municipal do PP realice as xestións necesarias diante da Consellería de Medio Ambiente para que Ribeira poida contar canto antes co saneamento integral.

  Na tarde de onte a voceira municipal do BNG de Ribeira, Dominga Brión, e os membros do Grupo Municipal Anxeles González Cruxeiras, Ana Álvarez e Luís Teira, acudiron á reunión convocada no Auditorio de Aguiño pola Asociación Sagres. A esta xuntanza asistiron tamén representantes do resto dos grupos municipais.

  Neste encontro tratouse durante máis de hora e media sobre a situación na que se atopa neste momento o proxecto da EDAR de Ribeira, elaborado pola Consellería de Medio Ambiente en base á proposta de localización en Pinisqueira que inicialmente acordou a Xunta de Goberno Local do PP en sesión celebrada o 9 de febreiro do 2006.

  Dende o BNG manifestámolle a nosa preocupación porque, un ano despois da entrevista mantida co Conselleiro de Medio Ambiente, aínda non se lle remitira formalmente dende o concello a terceira proposta de localización para a EDAR (antes de chegar a Conresa á dereita) presentada na reunión celebrada con él o 25 de outubro de 2007, pese a que o Alcalde sempre afirmara o contrario, a última vez no Pleno ordinario celebrado o pasado 27 de outubro.

  Indicámoslle que este feito foi recoñecido polo Alcalde na Xunta de Voceiras/os celebrada o pasado día 4 de novembro, ante a demanda do BNG para que se lle facilitara copia do documento remitido á Consellería de Medio Ambiente. En resposta á nosa insistencia na importancia de efectuar ese envío formal, o alcalde comprometeuse á súa remisión oficial (por escrito, con rexistro de saída), compromiso que tamén ratificou o voceiro do PSOE na reunión celebrada onte.

  Tamén lle informamos ás persoas asistentes que o BNG ten presentado sendas iniciativas diante da Xunta de Goberno e do Pleno da Corporación solicitando que se respecte e se faga valer o acordo acadado por unanimidade de toda a Corporación Municipal de Ribeira o día 30 de xullo do 2007 e, ao mesmo tempo, que o Goberno Municipal do PP realice as xestións necesarias diante da Consellería de Medio Ambiente para acadar un entendemento a fin de que o Concello de Ribeira poida contar canto antes co saneamento integral para as súas augas residuais da maneira máis sostíbel e consensuada posíbel.

  Por último, temos que lamentar que a representante do grupo popular só se comprometera a darlle traslado ao alcalde do alí ocorrido, pese a insistencia dos membros da Asociación Sagres, do BNG e do resto dos grupos da corporación en ofrecer a súa colaboración e acadar un compromiso conxunto para avanzar na búsqueda de solucións na liña de acadar o saneamento integral para o Concello de Ribeira. Alegando compromisos familiares, a voceira popular dou por rematada a sesión obrigando ao resto dos asistentes a abandonar o lugar da reunión, o Auditorio de Aguiño, ao ser ela mesma a encargada de pechar o local.

  Iniciativa Municipal:
  2008-10-30edarribeira.pdf

  Nova relacionada no Correo Gallego:
  Ni la ventanilla única acelera el agónico trámite para la EDAR

• 

  Reclamamos un Plan de fomento do transporte público

  Posted: November 5, 2008, 11:27am CET by Domi

  O BNG de Ribeira ven de presentar unha iniciativa municipal pola que solicita a elaboración dun Plan para promover a utilización do transporte público

  Tamén demandamos que se habilite unha partida no orzamento municipal para que este Plan conte, entre outras medidas, coa dotación necesaria para subvencionar os prezos dos billetes de transporte público para pensionistas e alumnado de ensinanzas postobrigatorias

  O parque móbil de vehículos de turismo no concello de Ribeira é cada vez maior. Isto conleva problemáticas de distinto tipo como o aumento de contaminación acústica e ambiental. Asemade intensifícase o problema do tráfico pola falta de aparcamentos públicos gratuítos e o colapso que se produce sobre todo nas vías principais e no casco urbano do concello. Estes problemas veríanse minimizados ou incluso eliminados se a cidadanía incrementara a utilización dos medios de transporte público – autobuses – para desprazarse.

  Sería necesario un Plan que fomentara o incremento da utilización deste tipo de transporte en detrimento dos vehículos de turismo propios. Este plan debería incluír, entre outras medidas, a reducción dos prezos dos billetes para captación de novos/as usuarios/as.

  Os actuais prezos son excesivos especialmente para determinados colectivos como pensionistas –persoas xubiladas, con discapacidades,...-; e rapaces e rapazas que asisten ós IES do concello no ensino postobrigatorio –bacharelato e ciclos formativos de F.P.- que non teñen dereito ó transporte escolar.

  Iniciativa Municipal:
  2008-10-16-solicitude-transporte.pdf

• 

  Solicitamos arranxos na Autovía da Barbanza

  Posted: November 3, 2008, 11:13pm CET by Domi

  

  O BNG presentou unha iniciativa no Parlamento de Galiza, que se debaterá o vindeiro mércores, pola que se reclama á Consellaría de Política Territorial que se arranxen tódas as deficiencias detectadas na autovía da Barbanza

  No que respecta ao Concello de Ribeira as deficiencias máis importantes refírense á necesidade de mellorar a ponte de Ventín e de acondicionar os accesos ás fincas particulares, que se atopan cortados ou alterados

  A deputada do BNG, Ana Pontón, presentou no Parlamento unha iniciativa a través da cal insta á CPTOP, a darlle unha solución a tódalas deficiencias detectadas ó longo do actual trazado da autovía do Barbanza, a maioría delas referidas á reparación e reposición dos camiños existentes, á restauración dos accesos ás fincas que aínda permanecen cortados ou á previsión de recollida de augas e canalizacións.

  Dende o BNG somos conscientes de que esta infraestrutura é de vital importancia para o desenvolvemento da comarca. Aínda así, consideramos que as obras deben executarse, con total garantía, respectando os intereses da veciñanza e prexudicándoos o menos posible. Por esta razón reclamamos a solución urxente dos problemas por parte da empresa concesionaria das obras antes de que rematen os traballos.

  Ponte de Ventín

  Entre as deficiencias detectadas ó longo de todo o trazado, está a necesidade de mellorar a nova ponte construída na zona de Ventín. Esta ponte sobre a autovía da estrada de Palmeira a Moldes é excesivamente estreita polo que non permite o paso de dous vehículos a par de ancho superior ao dun turismo: furgonetas, camións, etc. É de destacar que esta estrada será un acceso secundario ao futuro parque empresarial da Barbanza.

  Hai que lembrar que o BNG volveuse a interesar fai poucos días no Parlamento Galego pola seguranza nesta autovía, reclamando a colocación de sistemas de contención adecuados ás necesidades das e dos motociclistas.

• 

  Reclamamos a retirada dos postes da vergoña

  Posted: November 3, 2008, 10:49am CET by Domi

  

  O BNG de Ribeira reclámalle ao goberno do PP que inste ás empresas e administracións pertinentes para que se retire os postes que xa non se utilizan ou que están “sementados” polas rúas e beirarrúas do noso concello estorbando o paso de persoas e vehículos.

  Dende o BNG de Ribeira temos solicitado xa en numerosas ocasións ao goberno local que tomase as medidas oportunas para que fosen retirados os postes (de electricidade, teléfonos, etc.) que xa non teñen utilidade ou que están situados nas rúas ou beirarrúas.

  Nestes días saíu publicado na prensa local o malestar da veciñanza pola presenza de postes, neste caso de telégrafos en Palmeira, situación esta de especial demanda xa que hai tempo que non teñen utilidade.

  Os nosos espazos públicos precisan ser seguros para un axeitada circulación vial e sobre todo que non se entorpeza o paso dos/das viandantes.

• 

  Adxudicado o proxecto de expropiación do Parque Barbanzan

  Posted: October 31, 2008, 12:14am CET by Domi

  A CONSELLERÍA DE VIVENDA E SOLO ADXUDICA POR 59.392 € A REDACCIÓN DO PROXECTO DE EXPROPIACIÓN DOS TERREOS NOS QUE SE VAI DESENVOLVER O PARQUE EMPRESARIAL DO BARBANZA

  A empresa adxudicataria, Nortagro S.L., disporá dun prazo de 2 meses para redactar este documento que despois iniciará a tramitación administrativa coa exposición ao público

  A Consellería de Vivenda e Solo adxudica por 59.392 € a redacción do proxecto de expropiación dos terreos necesarios para o desenvolvemento do Parque Empresarial do Barbanza, que se emprazará entre os municipios de Ribeira e Pobra do Caramiñal. A empresa que resultou adxudicataria, Nortagro S.L. , disporá dun prazo de 2 meses para redactar este documento.

  O proxecto de expropiación deberá conter a relación de fincas afectadas polo desenvolvemento deste parque, a identificación dos propietarios e a superficie das fincas. O prazo para elaborado este documento é de 2 meses. Unha vez elaborado, se iniciará a tramitación da expropiación coa exposición pública deste documento para presentación de posibles alegacións.

  O proxecto do Parque Empresarial do Barbanza foi declarado de incidencia supramunicipal polo Goberno galego a principios do mes de setembro deste ano. Esta declaración vén motivada pola magnitude da actuación – que se desenvolverá sobre 1 millón de metros cadrados – e porque dará resposta ás necesidades de solo produtivo na comarca do Barbanza, detectadas no estudio de viabilidade medioambiental, técnica e económica no que se analizaron 10 millóns de metros cadrados de terreo.

  O investimento total previsto nesta actuación é de 32.062.224 euros, dos que máis de 27 millóns se dedicarán á urbanización e 4,1 millóns se empregarán na adquisición de terreos.

  Características do parque

  O Parque Empresarial do Barbanza desenvolverase sobre unha superficie total de 1.008.928 metros cadrados entre os municipios de Ribeira e Pobra do Caramiñal, que comparten unha economía relacionada co sector pesqueiro e cunha actividade industrial concentrada na conserva. Da superficie total, 541.520 metros cadrados serán de uso empresarial e industrial, 311.824 metros cadrados para espazos libres, 124.198 metros cadrados para a rede viaria e 31.386 metros cadrados para equipamentos.

  Tamén incluirá naves modulares para os pequenos empresarios que queiran instalarse co obxectivo de dar resposta ás súas necesidades de solo produtivo a un prezo e nunhas condicións razoables. Estas naves terán un tamaño aproximado de 500 metros cadrados e serán adxudicadas en réxime de aluguer con opción de compra transcorridos 10 anos.

  Ademais, o futuro Parque Empresarial do Barbanza contará cun edificio de usos múltiples para dar servizo aos empresarios que se instalen neste parque, tanto de Ribeira como de Pobra do Caramiñal. Este edificio, que contará con espazos comúns de novas tecnoloxías, estará situado nunha parcela de uso dotacional público e será adxudicado por concesión administrativa durante un prazo determinado de tempo.

  O Parque Empresarial do Barbanza está incluído no Proxecto Galiza Suma, que supón a construción de parques empresariais estratéxicos e ben dimensionados, cunha alta calidade arquitectónica e tecnolóxica, con dotacións e servizos propios do século XXI.

• 

  Ribeira segue sen depurar as súas augas residuais

  Posted: October 30, 2008, 10:45am CET by Domi

  O BNG de Ribeira quere facer un chamamento a cordura e reclamalle ao Goberno Municipal e á Consellaría de Medio Ambiente que cheguen a un entendemento para poder avanzar nun acordo que supoña acadar o obxectivo fundamental (o saneamento integral) da maneira máis sostible e consensuada posible

  Tamén reclama que se faga valer o acordo, consensuado coa veciñanza, acadado por unanimidade de toda a Corporación Municipal de Ribeira o día 30 de xullo do 2007

  Un ano despois volvemos a asistir ao fogo cruzado de declaracións acusatorias e ameazantes entre a Consellaría de Medio Ambiente e o Goberno do PP de Ribeira a respecto da EDAR, que tanto a mesma como o Goberno Municipal pretenden instalar en Aguiño (o ano pasado a estas alturas estabamos na mesma tesitura). Mentres tanto, a cidadanía de Ribeira e a de toda a Ría da Arousa, ten que padecer as consecuencias derivadas de que quen nos goberna non fixera todo o necesario, alomenos até o de agora, para que as augas residuais do noso Concello conten cun sistema de depuración acaído.

  Dende o BNG de Ribeira reclamamos un pouco de cordura e solicitamos que se faga valer o acordo acadado por unanimidade de toda a Corporación Municipal de Ribeira o día 30 de xullo do 2007. Cabe lembrar que todos os Grupos políticos con representación no Concello de Ribeira, incluído o PSOE, votaron a favor dunha iniciativa do BNG que recolle as demandas veciñais, e que nós presentamos en Pleno en base a un compromiso acadado nunha xuntanza organizada pola Comisión Veciñal de Aguiño, hoxe Asociación Sagres, o 19 de xullo do 2007, na que participamos xunto coas Voceiras do PP e IPdeR e co Voceiro do PSOE.

  O acordo adoptado por unanimidade foi o seguinte:

  1. Que o proxecto da EDAR de Ribeira se someta aos trámites de Avaliación de Impacto Ambiental e de Avaliación Estratéxica da Sostibilidade.

  2. Que se solicite da Xunta de Galicia unha depuradora específica para o Polígono Industrial de Xarás.

  3. Que, en todo caso, o emisario se prolongue até augas profundas, fóra da enseada, en augas con correntes oceánicas, onde se asegure o mínimo impacto e unha rápida dilución e difusión no medio receptor.

  4. Que o incremento na intensidade de uso do espazo destinado á planta depuradora vaia acompañado das preceptivas medidas compensatorias.

  Se tanto a veciñanza como todos os Grupos Municipais foron capaces de chegar a este acordo de mínimos, non se entenden agora posturas de enfrontamento e mesmo ameazantes na prensa por parte de quen nos goberna que só poden traer problemas para toda a sociedade ribeirense e arousán.

  Considerando fundamental abordar o saneamento integral do noso Concello, débese valorar tamén que o xeito de levalo a cabo non debe hipotecar o futuro do noso patrimonio natural, económico e social. Pensamos que decisións non acaídas tomadas ata o momento non deben impedir avanzar nun acordo que supoña acadar o obxectivo fundamental (o saneamento integral) da maneira máis sostible e consensuada posible.

  Baixo esta premisa, queremos, pois, facer novamente un chamamento para que o Goberno Municipal e Consellaría de Medio Ambiente cheguen a un entendemento e Ribeira poida contar canto antes coa mellor depuración posíbel para as súas augas residuais.

• 

  Por qué o PP rexeita protexer a Laxe Brava?

  Posted: October 29, 2008, 10:59pm CET by Domi

  Os PePes de Ribeira demostraron no pasado pleno de 27 de outubro que o seu interese pola conservación de Laxe Brava é só de boca para fóra. Rexeitar na propia casa (Concello) o que reclaman en casa allea (Xunta) déixaos en evidencia.

  A declaración de Espazo Natural de Interese Local que propón o BNG non suporía cambios na cualificación urbanística actual e de usos, pero si que obrigaría a retirar do Plano Acuícola o proxecto da costa do Corgo. E tardaría dous meses.

  Desprezando as máis de setecentas alegacións en contra da planta acuícola así como as máis de 300 sinaturas recollidas en Corrubedo apoiando a proposta de protección do BNG, o goberno do PP, baseándose en argumentos tan falsos como inmorais, afirma defender “aos veciños” mediante un contencioso administrativo contra a Xunta de Galiza. Este recurso, que pagará toda a cidadanía de Ribeira, tardará varios anos en resolverse e ten moi poucas posibilidades de prosperar.

  Por qué o PP prefire a vía xudicial custosa, longa e inútil? Por qué non quer asumir o goberno de Ribeira a protección que a Lei de Protección da Natureza lle permite dun xeito moito máis barato, rápido e seguro?

  Na Laxe Brava, en dous ou tres anos, o dano pode ser irreparable. Nese tempo, sen ningún tipo de protección ambiental e ao amparo do Plano Acuícola, pode instalarse alí unha macropiscifactoría, daquela xa sen volta atrás. ¿Que vantaxe saca de aquí o Partido Popular? Pois deixar que o mal avance e culpar mentres tanto ao BNG (¡!). E “aparecer” ata as vindeiras eleccións autonómicas e municipais como “defensor” dos veciños que, mentres, estarán sufrindo uns expedientes de expropiación que o mesmo Goberno Municipal podería ter evitado.

  Desde o BNG seguiremos insistindo para desenmascarar, diante da cidadanía de Ribeira, a conducta inmoral deste goberno do PP que non ten reparo en utilizar o máis prezado patrimonio natural e paisaxístico de Ribeira, e as propiedades dos seus veciños, na súa negra estratexia de manterse no poder a toda costa.

  Se aínda se pode salvar Laxe Brava, quén se rende?

• 

  Reclamamos a protección e recuperación do Peirao Fenicio

  Posted: October 28, 2008, 2:00pm CET by Domi

  

  O BNG de Ribeira presentou unha moción diante do Pleno da Corporación municipal de Ribeira pola que lle reclama ao Goberno do PP que proceda á paralización das obras que está realizando a carón do Peirao Fenicio de Aguiño, se non cumpren coa legalidade vixente, instandoo a reparar os deterioros ocasionados e a recuperar este ben de interese cultural xestionando ante os organismos competentes todas as axudas que se estimen oportunas

  Tamén solicita que se redacte un Plan de Especial de Protección para o patrimonio arqueolóxico do noso Concello, tal e como o marca a Lei 16/1985 de Patrimonio Histórico Español no seu artigo 20.1

  O Porto de A Cobasa (GA15073041), coñecido como Peirao Fenicio de Aguiño, e un dos xacementos catalogados como Patrimonio Arqueolóxico pola Dirección Xeral de Patrimonio da Xunta de Galicia, recolleito así no Inventario de Xacemento Arqueolóxicos do Concello de Ribeira que está en posesión desta Dirección Xeral, como se reflicte no PXOM deste Concello.

  Como todo ben de interese cultural, goza dunha protección, por un lado integral onde o límite queda definido polas estructuras visibles na superficie que dito xacemento testemuña e os seus usos están regulados pola Lei 8/1995 do Patrimonio Cultural de Galicia e polo Decreto 199/97, que regula a actividade Arqueolóxica na Comunidade de Galicia; a outra protección e un área de respecto arredor do perímetro exterior dese ben, baseándose no artigo regular nº 30 das N.C.P.S. da COTOP adaptada ó contexto de cada un destes bens catalogados. En todo caso, todas as intervencións que alí se fagan están condicionadas á resolución favorable da Dirección Xeral de Patrimonio.

  Na actualidade, na área de protección estase a realizar unha obra que consiste na instalación dunha estación de bombeo, onde hai un movemento de terras importante que acada os tres metros de profundidade. Esta obra está a escasos 10 metros do Peirao Fenicio e como consecuencia da mesma o Peirao sufriu a caída dunha fieira de pedras coas que contaba.

  Iniciativa Municipal:
  2008-10-17peirao-fenicio.pdf

  Máis información…

• 

  Reclamamos no Parlamento a dobre bionda na autovía

  Posted: October 28, 2008, 3:33am CET by Domi

  

  O BNG volve a interesarse no Parlamento Galego pola colocación de sistemas de contención adecuados ás necesidades das e dos motociclistas na autovía da Barbanza

  A deputada do BNG, Ana Pontón, lembra na iniciativa presentada que o Plan de Seguridade Viaria de Galiza 2006-2010 prevé entre as súas liñas de actuación a “adaptación progresiva da infraestrutura e o seu equipamento ás particularidades dos e das motociclistas nos itinerarios máis frecuentados”, ao obxecto de identificar e actuar nos tramos de concentración de accidentes mortais.

  O Grupo Parlamentar do BNG tense interesado pola aplicación desta liña dea actuación prevista para a adecuación das barreiras de seguridade metálicas, para convertelas en barreiras de protección de motociclistas. Así nunha resposta remitida á Cámara galega a Consellaría de Política Territorial, Obras Públicas e Transportes dicía: “Polo que respecta á futura autovía da Barbanza, indicar que se deron as instrucións oportunas ás sociedades concesionarias das vías de alta capacidade de Santiago-Brión, Salnés e Barbanza para empregar o sistema de protección de motocicletas de tipo continuo”.

  Máis durante estes meses as asociacións de motoristas da comarca da Barbanza veñen expresando as súas dúbidas sobre o impacto e aplicación desta medida anunciada. É notábel a inquedanza e preocupación de certos sectores sociais e cremos conveniente que se dean todas as garantías no tocante á seguranza dos futuros usuarios e usuarias desta futura autovía.

  Iniciativa Parlamentar:
  2008-10-15dobre-bionda-autovia-barbanza.pdf

• 

  Reclamamos a protección da Ría da Arousa

  Posted: October 25, 2008, 9:37am CEST by Domi

  O BNG de Ribeira solicitará no Pleno do vindeiro luns, día 27, que a Corporación Municipal rexeite o uso da boca da Ría da Arousa como vertedoiro de 148.000 toneladas residuos procedentes de Vigo ou doutra instalacións portuarias.

  Tamén reclamaremos que se inste ao Porto de Vigo a buscar unha alternativa a este cemiterio de lodos contaminantes e que se transmita á Xunta de Galiza e á Consellaría de Medio Ambiente o rexeitamento e a preocupación da Corporación por estas práticas.

  As dársenas pesqueiras do Berbés en Vigo son o lugar onde se vertían, ata hai dez anos, cando se estreou a depuradora do Lagares, todas as augas residuais da cidade e o sitio onde seguen desaugando hoxe todas as empresas instaladas no porto, que aínda, en 2008, carecen de conexión coa rede de saneamento. Metais pesados, clorobifenilos, e hidrocarburos completan a mestura contaminante de alto contido en chumbo da zona, como revelan diversos estudos sobre a contaminación da ría, que coinciden en considerar este punto como o máis contaminado da ría viguesa. Este espazo preténdese dragar para trasladar a unha zona entre Sálvora e Ons as 148.000 toneladas de lodos contaminados resultantes da operación.

  Non é a primeira vez que a área entre Sálvora e Ons se utiliza como estercoleiro. A Autoridade Portuaria de Vilagarcía depositou xa nese mesmo lugar 1,8 millóns de toneladas de lodos. E precisamente ese é o argumento de peso utilizado pola institución portuaria viguesa para xustificar a elección. Trátase ademais, din eles, dunha zona da ría “bastante externa”, polo que descartan a afección a zonas de baño e bancos marisqueiros.

  Porén un investigador do Instituto de Investigacións Mariñas, pertencente ao Centro Superior de Investigacións Científicas (CSIC) sinala que a súa vertedura (en Sálvora) provoca unha acción de dispersión polas correntes mariñas; non é un colector hermético que se deposita no fondo, senón un vertido directo que se dispersa nunha columna de auga en función das correntes.

  Diferentes colectivos ecoloxistas e confrarías teñen denunciado os prexuicios ambientais destes millóns de metros cúbicos de lodos, unha situación que veñen denunciando dende hai tempo, pero que agora cobra nova relevancia ao coñecerse o verquido de novos residuos industriais e químicos procedementos do porto vigués.

  Iniciativa parlamentar e comarcal

  Ante o perigo que este tipo de verteduras na boca da Ría da Arousa supón, xa que está en xogo, ademais do equilibrio medioambiental nunha zona privilexiada, un sector productivo que ten precisamente entre Ons e Sálvora unha extraordinaria zona de traballo, o BNG presentou iniciativas municipais en todos os concellos da Barbanza así como unha iniciativa no Parlamento Galego.

  Iniciativa Municipal:
  lodos.pdf
  
  Iniciativa Parlamentar:
  2008-08-06-lodos-salvora.pdf

• 

  Atentado contra o Peirao Fenicio de Aguiño

  Posted: October 23, 2008, 11:09am CEST by Domi

  

  A DELEGACIÓN DE CULTURA INFORMA A PATRIMONIO DAS OBRAS QUE SE ESTÁN A FACER NA PRAIA DA COBASA, NA PARROQUIA DE AGUIÑO, AOS EFECTOS DE POSIBLE APERTURA DE EXPEDIENTE

  Solicítase igualmente ao SEPRONA apoio técnico para a comprobación de se a paralización das obras foi efectuada

  O Goberno Municipal de Ribeira realizou o pasado mes de xuño unhas obras na praia da Cobasa, parroquia de Aguiño, para instalar unha estación de bombeo que afectan a unha zona que está catalogada como ben de interese cultural. A zona na que se está a levar a cabo a devandita obra dista menos de 10 metros do peirao Fenicio, ben GA 15073041 “Porto da Cobasa”, protexido polo PXOM do Concello de Ribeira. De acordo coa lexislación de Patrimonio vixente a área de protección dos bens catalogados é de 100 metros.

  Estas obras foron denunciadas pola Asociación Sagres. O BNG de Ribeira, recolleu esta denuncia e deulle traslado á Delegación Provincial de Cultura e Deporte. Dado que o proxecto de obras non foi informado pola Comisión Territorial de Patrimonio Histórico Galego (Art. 32 da Lei de Patrimonio Cultural de Galicia e Art. 30 das Normas Complementarias e Subsidiarias de Planeamento da provincia da Coruña), e poden afectar a bens do Patrimonio Cultural de Galicia, a Delegación solicitou no seu día, concretamente en 20 de agosto de 2008, a paralización cautelar das devanditas obras, mentras se esclareza o seu trámite de autorización, sen haber tido resposta ata a data de hoxe.

  A Delegación Provincial de Cultura e Deporte ven de remitir á Dirección Xeral de Patrimonio un informe de incidencias, aos efectos de posible apertura de expediente informativo, relativo ás devanditas obras.

  Ademais, desde a Delegación Provincial de Cultura e Deporte enviouse tamén escrito ao Servizo do SEPRONA solicitando o seu apoio técnico para a comprobación de se a paralización das obras foi efectuada.

• 

  Laxe Brava: PP de Ribeira, silencio cómplice?

  Posted: October 22, 2008, 12:50pm CEST by Domi

  Aínda que presentada no rexistro o 18 de xullo, a iniciativa do BNG de Ribeira para solicitar a declaración de Espazo Natural de Interese Local (ENIL) para o contorno de Laxe Brava (Corrubedo), vaise debater o vindeiro luns 27 de outubro no Pleno do Concello. Esta figura de protección, contemplada na Lei Galega de Conservación da Natureza, debe ser solicitada polo concello, “permite todos os usos e actuacións que tradicionalmente se viñeron efectuando nese espazo” e obriga, no caso de ser aceptada, á revisión dos planos sectoriais (neste caso o Plano Acuícola) que afecten á zona a protexida.

  Non é preciso, neste punto, detallar a xénese do Plano Acuícola que, pese ao fortísimo rexeitamento político e social, foi redactado pola Consellería de Pesca e presentado, “manu militari”, polo presidente Touriño na mesa do Consello da Xunta.

  Por se non fora dabondo a maioritaria opinión pública e cidadá, relevantes e autorizadas voces se teñen manifestado en favor da necesaria protección deste espazo natural ribeirense excluído, fraudulentamente, da protección da que si goza o seu contorno inmediato: Lugar de Importancia Comunitaria, Zona de Especial Protección para as Aves e Parque Natural de Corrubedo.

  Ademais de ter presentado alegacións en prazo, o Goberno Municipal interpuxo recurso contencioso administrativo contra o Plano Acuícola. Pese a que esta actuación non pon freo ao Plano (nin supón unha vía segura, véxase o caso dos Areeiros), o BNG apoiou a medida, máis que polos resultados agardados, polo valor que neste momento representa a unidade das forzas políticas e sociais de Ribeira dante dun “inimigo” que é, a todas luces, poderoso. E do que está en xogo.

  A proposta de declaración de ENIL para Laxe Brava recibiu parabéns das forzas políticas de Ribeira pero non de todas. O Partido Popular, con maioría no goberno, e polo tanto do que depende actualmente a aprobación da proposta de protección de Laxe Brava, fai uso dun sospeitoso silenzo que fai dubidar fundadamente do seu verdadeiro interese neste asunto.

  Unha forza política no goberno, obrigada polo tanto a velar polo interese xeral da cidadanía, non pode eludir a responsabilidade de defender, coas armas que a Lei pon ao seu alcance, o patrimonio paisaxístico e natural do seu concello.

  Rexeitar a proposta do BNG convertería en falsa a intención protectora das alegacións que o Goberno Municipal de Ribeira presentou ao Plano Acuícola e revelaría sospeitoso o interese real do contencioso interposto.

  E será o Partido Popular de Ribeira cómplice necesario para a desfeita de Laxe Brava?

  Xosé Luís Groveiro
  Concelleiro do BNG de Ribeira

• 

  Solicitamos a doble bionda na autovía da Barbanza

  Posted: October 17, 2008, 12:41pm CEST by Domi

  O BNG de Ribeira ven de presentar unha iniciativa diante do concello de Ribeira para que o Pleno da Corporación inste á Conselleria de Política Territorial, Obras Públicas e Transporte a que dote todo o percorrido da autovía do Barbanza cun sistema de protección de dobre bionda para os moteiros/as que circulen por ela

  Cando estea rematada a autovía do Barbanza vai facilitar a comunicación da nosa comarca co resto de Galiza así como ser a “espiña dorsal” que vertebre as comunicacións dos catro concellos que forman a mancomunidade.

  Sen dúbida, a seguridade vial ten que ser unha das premisas básicas sobre as que se debe pór en marcha esta importante infraestrutura.

  Nos pasados meses foron moitos/as os/as motociclistas que se concentraron polos concellos da comarca demandando a instalación de dobre bionda protectora na autovía do Barbanza.

  Por outra banda o Plan de Seguridade Viaria de Galiza 2006-2010 prevé entre as súas liñas de actuación a “adaptación progresiva da infraestrutura e o seu equipamento ás particularidades dos e das motociclistas nos itinerarios máis frecuentados”, ao obxecto de identificar e actuar nos tramos de concentración de accidentes mortais. Así pois non ten sentido que a nova autovía non teña en todo o seu percorrido un sistema acaído de protección para os moteiros/as que evite a gravidade dos accidentes que se poidan producir.

  Iniciativa Municipal:
  2008-10-18-dobre-bionda.pdf

• 

  Interesámonos no Congreso pola pesca da quenlla

  Posted: October 11, 2008, 10:53am CEST by Domi

  A deputada do BNG no Congreso, Olaia Fernández Davila, rexistrou unha iniciativa parlamentar na Cámara Baixa, na que pide ao Goberno que reconsidere a Orde do MAPA pola que se denega á frota de baixura o cambio de modalidade pesqueira para a pesca de quenlla.

  Xa en xullo o deputado do BNG no Parlamento Galego, Bieito Lobeira, despois de ter unha reunión en Ribeira con afectados deste sector, presentara unha iniciativa relativa á denegación de cambios temporais de modalidade para a captura de quenlla a embarcacións pesqueiras galegas.

  Neste sentido, a deputada do BNG alude á Orde ministerial pola que se regula a pesca coa arte de palangre de superficie para a captura de especies altamente migratorias e pola que se crea o censo unificado de palangre de superficie. Lembra que nos meses de verán o Goberno autorizaba a diversas embarcacións pesqueiras galegas o correspondente cambio de modalidade á arte de palangrillo para a pesca de quenlla, baixo unha serie de limitacións.

  Subliña que moitos barcos de baixura galegos utilizaban desde hai anos esta posibilidade, e que, ademais, “é capturado para o seu aproveitamento íntegro a diferenza doutras frotas que só utilizan a aleta”. Destaca o feito de que este segmento de frota pesca quenlla de maneira artesanal, actividade da que dependen moitos traballadores do mar.

  Por iso, “é difícil entender a decisión do MAPA que supón a denegación automática das solicitudes de cambio de modalidade e, por tanto, a prohibición de que estes buques poidan faenar como o facían tradicionalmente”.

  De aí que inste ao Goberno a replantexarse esta decisión.

  Iniciativa no Parlamento Galego

  Neste senso, xa en xullo o deputado do BNG no Parlamento Galego, Bieito Lobeira, despois de ter unha reunión en Ribeira con representantes deste sector, presentara unha iniciativa parlamentar relativa á denegación de cambios temporais de modalidade para a captura de quenlla a embarcacións pesqueiras galegas. Esta decisión afecta a unhas 35 embarcacións de baixura dos portos de Ribeira, Muxía, Porto do Son, Laxe, Camelle, Burela, Celeiro, San Cibrao e A Guarda.

  Esta iniciativa parlamentar do Bloque Nacionalista Galego debateuse o pasado 22 de Setembro na Comisión de Pesca do Parlamento de Galiza. No debate participou o Director Xeral de Recursos Mariños, Antonio García Elorriaga, quen recoñeceu a inadaptación da normativa do Goberno español á realidade da nosa frota de baixura.

  O Director Xeral comprometeuse a negociar isto co Goberno español, e amosou a súa confianza en que en Novembro deste mesmo ano se poida reconsiderar esta decisión para permitir que na campaña de verán de 2009 se poida reiniciar a actividade. Por outra banda, segundo indicou, o volume de capturas de quenlla é moi cativo en relación co que pescan outras frotas: oscila entre as 30 tns. capturadas en 2003 e as 125 tns. do 2006.

  Iniciativa Congreso:
  2008-10-08captura-quenlla.pdf

  Iniciativa Parlamento Galego:
  30301-captura-quenlla-parlamento-galego.pdf

• 

  Reclamamos unha ordenanza reguladora do urbanismo

  Posted: October 10, 2008, 10:33am CEST by Domi

  O PP de Ribeira, unha vez máis, rexeita unha proposta do BNG para regular o urbanismo

  O BNG de Ribeira ten denunciado en multitude de ocasións a política urbanística do PP de Ribeira. Nesta ocasión presentamos en Pleno unha iniciativa pola que demandamos a elaboración dunha ordenanza para regular o urbanismo en Ribeira. Na moción, que o PP votou en contra no pasado pleno ordinario de setembro, reclamamos algo que nos parece fundamental: a necesidade de crear algún mecanismo que poña fin ó gran caos urbanístico deste Concello; un marco legal no que poida ampararse a cidadanía.

  Son multitude os veciños e veciñas que se queixan pola tardanza das licencias, ou por non saber que facer ao atoparse ante o caso de que as licencias municipais estean condicionadas a autorizacións das Consellerías competentes, porque ninguén lles aclara que pasos teñen que seguir e como deben facelo.

  Pero poñendo como escusa que xa está todo regulado, o Grupo Municipal do PP vota en contra desta proposta que so viña a poñer un pouco de orde neste departamento, onde a lexislación existente, o propio PXOM, é ambiguo e da lugar a múltiples confusións que poden perxudicar considerablemente á nosa veciñanza.

  Iniciativa municipal:
  2008-07-17-ordenanza-reguladora-de-licencias-urbanistica.pdf

• 

  Precisións sobre Laxe Brava

  Posted: October 6, 2008, 4:12pm CEST by Domi

  LBL_TAG_TAGS:  BNG Ribeira  

  

  Ao fío da información publicada no diario El País na edición de Galicia do xoves 2 de outubro sobre o proxecto de Plan de Acuicultura da Consellería de Pesca, en concreto en Corrubedo, e á posición do BNG de Ribeira, remitimos esta breve nota precisando algúns aspectos da súa información que consideramos inexactos:

  “A declaración dos “Espazos Naturais de Interese Local” (incluídos na Lei Galega de Conservación dá Naturaza, de 2001) desenvólvense no decreto 124/2005 da Xunta de Galicia. O procedemento de declaración é, xa que logo, coñecido desde entón. No BNG de Ribeira consideramos a súa aplicación ao coñecer, desde logo oficiosamente, que a proposta de ampliación da Rede Natura excluía o espazo da contorna de Corrubedo, un dos máis fermosos do litoral galego como o demostran os seus mais de 300 000 visitantes anuais. Decidimos presentar a proposta logo de ter en man (abril de 2008) a resposta da Consellería de Pesca rexeitando as alegacións do BNG contra a inclusión de Laxe Brava no Plano Acuícola.

  Aínda que a moción do BNG que propón a declaración de Espazo Natural de Interese Local para Laxe Brava debaterase no Pleno de outubro, ten rexistro de entrada no Concello de Ribeira de 18 de Xullo de 2008. Así pois, é unha iniciativa propia para aplicar unha figura de protección prevista na lei ante a desidia das Consellerías de Medio Ambiente e Pesca que coa súa actuación eluden a súa responsabilidade e trasladan ao Concello de Ribeira a última vía posible para protexer un patrimonio que é de toda a cidadanía.”

  Nova no País:
  Treta del BNG de Ribeira para detener el proyecto

  Nova relacionada no País:
  Medio Ambiente recorta la protección en Corrubedo para incluir una piscifactoría

• 

  Inauguración das salas de lactancia de Ribeira

  Posted: October 3, 2008, 5:09pm CEST by Domi

  LBL_TAG_TAGS:  BNG Ribeira  

  

  A Secretaria Xeral de Igualdade, Carme Adán, e a Directora Xeral de Comercio, Ana Rúa, inauguraron onte en Ribeira un servizo pioneiro que pon en marcha o Centro Comercial Aberto, Viamare, ao que tamén asistiu a voceira municipal do BNG, Dominga Brión.

  A presentación das salas de lactancia realizouse na sede da Asociación de Empresarios de Ribeira e á mesma acudiron o concelleiro do BNG, Xosé Luís Groveiro, e outros membros da Corporación Ribeirense. Tampouco faltaron un importante número de nenos e nenas acompañados das súas nais, que puxeron a nota de cor ao acto.

  As xestións do BNG de Ribeira diante da Secretaría Xeral de Igualdade e da Dirección Xeral de Comercio foron decisivas para acadar a financiación necesaria para a posta en marcha deste servizo nun concello que conta con un censo de máis de 1.000 nenos e nenas de 0 a 3 anos.

  Nova na Voz:
  Viamare dá o pistoletazo de saída ás salas de lactación de bebés coa participación de tres establecementos

• 

  O BNG reclama dignidade no traballo diante do Pleno ribeirense

  Posted: October 1, 2008, 3:44pm CEST by Domi

  LBL_TAG_TAGS:  BNG Ribeira  

  O BNG logrou que por unanimidade a Corporación Municipal de Ribeira rexeitase a proposta de modificación da Directiva sobre Tempo de Traballo, realizada o pasado 9 de xuño pola maioría cualificada de ministros e ministras de Traballo da Unión Europea

  Na iniciativa tamén reclamamos que este acordo sexa trasladado á Presidencia do Goberno do Estado, á Presidencia do Parlamento Europeo e a todos os Grupos Parlamentares que conforman a Cámara Europea. Esta iniciativa foi debatida no Pleno ordinario celebrado o pasado 27 de setembro.