Vivenda protexida para a nosa xente, aproveitemos a oportunidade

Cambre, 17 de novembro de 2008.- Hai ben pouco tempo, calquera mozo ou moza con idea de se emancipar, ou xente maior que quixer obter a súa propia vivenda, atopábase con problemas irresolúbeis. Só o mercado libre ofertaba vivendas e, os prezos eran inalcanzábeis. Hipotecas máis parecidas a condenas perpetuas e condicións de vida de auténtica penuria era o que lles esperaba.

E chegou a crise. Agora nin iso porque a banca non solta un euro nin nas condicións máis leoninas. As vivendas protexidas, de protección pública ou prezo taxado, inexistentes. O panorama resulta penoso.

Por iso é máis importante o proxecto da Consellería de Vivenda e Solo. Por iso, a determinación da conselleira é de obrigado recoñecemento. Porque nun período de tempo razoábel haberá no mercado un número suficiente de vivendas para a xente, con estándares de calidade elevados, con prezo regulado e, en lugares céntricos e non afastados dos principais núcleos. Porque ademais, construiranse novos barrios dotados de zonas verdes, de equipamentos comunitarios, das infraestruturas necesarias.

En moitas zonas, como é o noso caso de Cambre, virá a suplir unha planificación urbanística, unha ordenación do territorio, non realizada polo goberno municipal.

Promoverá a economía local, a construción e as empresas auxiliares, a hostalaría. Vai supor, nos próximos dez anos, todo un motor para a nosa economía local.

Diante disto hai que adoptar unha posición responsábel. Pódese negociar ou aportar modificacións que melloren os proxectos. Incluso axudar aos afectados obter maiores contrapartidas polas súas propiedades. Pero o que non se pode facer, desde a responsabilidade de quen debería defender o interese xeral, é tirar pedras contra a maioría, situarse á marxe das necesidades da nosa xente.

É unha vergoña ver algunhas actitudes que sen a mínima información e con total desprezo pola verdade utilizan a demagoxia máis ruín para descualificar un proxecto necesario. Alá eles¡ Todos e todas sabemos que a dereita deste País non quere vivendas protexidas. Xa o demostraron, tiveron máis de tres lustros o poder nas súas mans e non as fixeron. Que deixen traballar polo menos, que non estorben¡

Xabier Iglesias

Plan de vivenda, como auga de maio¡

Cambre, 14 de novmbro de 2008.- Aínda non saio do meu asombro ao ver algunhas reaccións ao Plan de Vivenda que presenta a Consellaría de Vivenda e Solo. Cando tiven a primeira aproximación ao Plan, hai apenas uns días, a sensación foi de que nos tocara a lotería. Non podo comprender como se pode ver doutra maneira. Que a Xunta de Galiza invista case 50

unha das zonas incluídas no plan

millóns de euros no noso municipio, que dese investimento os veciños e veciñas de Cambre poidan gañar 120.000m2 de espazos verdes ou 33.000 destinados a equipamentos, e todo sen gastar un só euro dos orzamentos de Cambre, é para estar satisfeitos.

Pero non só é iso. Imaxinemos o que vai supoñer en ingresos públicos e para a xente. Taxas por licencias de obras, actividade do sector da construción, da hostalaría, dos servizos e de empresas auxiliares, postos de traballo,… case nada nunha etapa de profunda crise económica como a que padecemos.

Pero ademais é que crearemos “cidade”, e será de maneira planeada e seguindo o interese da maioría, non polo capricho especulador dos poucos de sempre. Poderemos conformar a grande trama urbana entre o Temple e Cambre, tan necesaria para o futuro. Coa suficiente poboación para que os negocios e iniciativas empresariais teñan garantía de supervivencia, coas conexións e mobilidade aseguradas de maneira planificada, con solo para equipamentos sociais e zonas verdes e de lecer.

E o que ven ser o obxectivo primordial do plan, con vivendas de calidade e ao alcance da nosa xente.

Está en exposición pública. É o momento de estudalo, de reflexionar e de facer aportes e suxestións que o melloren, que fagan que se adapte mellor a nosa realidade. É o momento da colaboración institucional intelixente, de traballar xuntos. Temos os mesmos intereses, os da maioría, os da xente. Nese punto é fácil o encontro, e nel estaremos os do BNG de Cambre.

Sabemos do carácter conciliador e de aposta polo diálogo da Conselleira Táboas, teno demostrado, seguro que os posíbeis afectados polos proxectos van atopar solucións aos problemas que poidan aparecer.

Non é o momento de falar diso, tempo haberá, pero poderíamos preguntarmonos se isto sería necesario de ter contado os últimos anos cun planeamento municipal elaborado para cumprir cos desexos da maioría. A resposta é doada, creo.

Xabie Iglesias

Contra a violencia machista, que máis se pode facer?

Cambre, 12 de novembro de 2008.- Dentro dun rato, veciñas e veciños, persoal funcionario, representantes institucionais, concentrarémonos diante do concello, baixo as bandeiras de loito desde onte, para manifestarmos unha vez máis, a nosa dor e repulsa polo asesinato dunha muller, outro máis.

Lendo o acontecido, un se pregunta que máis se pode facer. Que máis poden facer as institucións, que medidas tomar. Que outra cousa lle queda por facer á sociedade para evitar estes crimes. Como impedir esta barbaridade, de que un home, nun espazo privado ou sen testemuñas, poida agredir a unha muller.

Ademais, este caso, segundo as informacións, escápase da posíbel acción protectora ou disuasoria, da capacidade de prevención. Unha muller estranxeira, vivindo no País irmán, que se despraza a Galiza sen pasar por control de fronteiras algún. O normal nesta Europa que queremos. Sen denuncias previas. Nunha auto autoestrada, nun veículo privado,…, todo acaba. É tan fácil matar a alguén, sobre todo cando un cre ser o propietario¡

E claro, é a sensación de impotencia a que domina. Nin siquera os máis irreflexivos poderían pretender un sistema de “vixiancia absoluta”. Sempre habería espazos para o crime.

Pero hai saída, hai moito que facer. A prevención, a disuasión, pasa por dirixirse aos espazos máis íntimos das persoas, ás súas conciencias. E niso é no que nos temos que empeñar. Seguramente tardaremos moito tempo, xeneracións, pero é a única maneira de evitalo. As institucións e poderes públicos teñen a obriga de continuar poñendo en marcha o entramado lexislativo e normativo necesario, de dotarse dos medios de prevención e axuda suficientes. A sociedade ten que pechar filas para que cada vez sexan menos e máis reducidos os espazos de impunidade para os agresores. E necesitamos con urxencia mover as conciencias das persoas, unha educación en igualdade que faga inconcebíbel unha relación de dominio sobre as mulleres.

Nesto último é ao que todos e todas podemos contribuír. Cada quen desde o seu ámbito de actuación. Porque todos sabemos que non se trata de accidentes, ou de episodios de alteración ou desequilibrio. Fanno porque cren que o poden facer e, iso é o que hai que romper.

Nestas datas, próximas ao 25 de novembro, xa temos un nome e unha cara que poñer, na que concentrar a mirada cando saiamos a reivindicar que pare a violencia machista. Terríbel imaxe que nos responsabiliza a todos. Porque, podemos facer moito¡

Xabier Iglesias

Hai luz verde para o Plan Xeral?

Cambre, 1 de novembro de 2008.- No mesmo pleno municipal ao que me refería na anterior entrada, o do xoves 30, a Corporación tomou outra trascendente decisión, a de rescindir o contrato coa empresa redactora do Plan Xeral de Ordenación Municipal. Unanimidade, que ben¡ diría calquera, pero todo ten matices.

Había que facelo, creo que até o Alcalde deuse conta de que a situación era insostíbel. Máis de dez anos cun contrato para nada. Un concello en expansión como o noso, rexíndonos por normativas obsoletas e contrarias á mínima racionalidade.  Un discuro no que todas as forzas políticas coindidimos. Aínda que todas non, os socialistas non abriron a boca. Como se non fora con eles.  Os demais si, o falar non ten cancela. Claro, até que desde o BNG lles tivemos que lembrar cales foron as posicións de cada quen  cando se mandou a proposta de Plan Xeral para a súa aprobación pola Xunta, en maio de 2003.  Proposta votada a favor por Psoe e PP.   O BNG non a apoiou e advertíu, ademais, da ilegalidade do documento, entre outras barbaridades por non incluír o trazado da Vía Ártabra. E pasou o que pasou, que foi rexeitado.

Na pasada lexislatura foi o Psoe o responsábel do urbanismo, desde o BNG aportamos estabilidade a un goberno para que todos poideramos “facer os deberes”. Houbo quen os fixemos e houbo quen non e por iso seguimos a voltas co Plan Xeral.

Díxenno no pleno, o que pasou é coñecido dos cidadáns e chegado o momento saberán decidir. Nós, como forza política, queremos mirar ao futuro. Queremos contribuír a que o documento urbanístico se aprobe canto antes, queremos tender a  man para chegar a acordos de amplo respaldo político e cidadán.  Outros que sigan mirando ao pasado, nós queremos construír.

Semella, oindo os discursos, que todos queremos o Plan Xeral, estupendo. Pero, que Plan?  Agardo que pronto podamos comezar a entrar no fondo do asunto, nos contidos e na estratexia de planeamento. Veremos, nese momento, até onde chega a coincidencia. Comprobaremos, nese punto, o que entende cada quen por “interese xeral”.

Xabier Iglesias

O acordo para as contas de 2008 comeza a dar resultados

Cambre, 31 de outubro de 2008.- O acordo acadado en agosto para aprobar os orzamentos deste ano, comeza a funcionar. Xa dixeramos que a única condición era o cumprimento do asinado, que queriamos que quen goberna, gobernara.  No pleno ordinario celebrado onte, xoves 30 de outubro, a corporación ratificou por unanimidade o acordo acadado polo BNG e o PSOE para a cesión ao Consorcio Galego de Igualdade e Benestar, dunha parcela no barrio do Temple para a construción da segunda Galescola de Cambre e o primeiro Centro de Día para persoas maiores.

Seguramente, os lectores de prensa diaria quedarán sorprendidos ao saber isto. Nos medios o que destacou foi a dinamita do PP, que utimamente dispara a todo o que se move, poñendo en cuestión até aos altos funcionarios encargados da fiscalización e control das contas. Parafraseando aos veciños de Axterix, “estes romanos tolearon¡” Onde vai o PP? Con esta liña de actuación é evidente. A enquistarse nunha oposición marxinal e tremendista.  Insisten en tirar contra o BNG, contra a nosa xestión no goberno anterior, e chegan ao paroxismo de votar en contra do pago dunha factura polo remate das instalación dun centro de Servizos Sociais, que veciñas e veciños levan disfrutand desde hai tres anos. O dito, tolearon.

Pero ao noso, mentres uns prefiren aquilo de “canto peor, mellor”, desde o BNG adicámonos a obter equipamentos e servizos para a xente. Sexa desde o goberno, ou desde a oposición. Con esta decisión tomada onte, nun prazo razonábel, agardamos que pouco máis dun ano, sesenta persoas maiores do noso concello poderán dispor de atención de día e, outros oitenta rapaces poderán ter praza  de educación de infantil de calidade.  O nacionalismo é útil e significa benestar para a nosa xente.

Xabier Iglesias
Mais información :

Apoiaremos os orzamentos deste ano

Cambre, 7 de agosto de 2008.- Pois si, algo máis dun mes sen me poñer co blog e algunhas cousas están a cambiar en Cambre. A máis importante é que acadamos un acordo co Psoe , que goberna en minoría, para apoiar os orzamentos. Resúltame curioso como, producido o feito e anunciado publicamente, explicados ademais os contidos e alcance do acordo, o interese xornalístico está en se entraremos no goberno local. Non digo que a especulación sobre esa posibilidade non teña morbo, pero para min o máis importante é que se vaia a adquirir unha parcela para un novo colexio público. Francamente, ver a desesperación dunhas nais que se senten impotentes ao non poderen escolarizar aos seus fillos no colexio do barrio por falta de prazas, paréceme de máis interese que aventurar profecías sobre o goberno.

Levo varios días respondendo preguntas sobre iso. “Que non, que se trata de orzamentos, dos de 2008 e non é sen tempo, que do futuro falaremos cando chegue”.

Agardo, como os demais, acontecementos. Pero para min a maior expectativa cínguense a comprobarmos si este goberno socialista é capaz de cumprir cos acordos e xestionar uns orzamentos de consenso. Para iso, díxenllo ao Alcalde publicamente, poden contar con nós, co BNG. Para colaborar a que saian ben as cousas que lle interesan a xente, para que dentro de tres anos non teñamos que ver a outras nais desesperadas por non ter escola para os seus fillos. Para iso mantemos a nosa man tendida. Hai que comezar en setembro cos novos orzamentos, cos de 2009. Hai que falar de desatascar o documento do Plan Xeral, hai que falar da Galescola e do Centro de Día para os maiores.

Despois diso, queda moito tempo, falaremos do goberno.

Xabier Iglesias

Días intensos e tempo de lume purificador.

Cambre, 23 de xuño de 2008.- Acabamos de pasar uns días intensos, de moita actividade. A mágoa é que, unha vez máis, fora para poñernos ao lado dos que reivindican e reclaman. Que sexa necesario que os cidadáns sáian a reclamar por cousas que deberían estar solucionadas hai tempo dá que pensar. Conseguiremos algo, seguro, pero non deixa de ser un anacronismo que haxa que sair á rúa para reclamar que se arranxen unhas beirarrúas, nun dos barrios máis poboados de Cambre, en pleno paseo marítimo, que se supón que debe estar en “estado de revista”.  Iso despois de levar case seis meses entre zanxas e entullos.  Non se enteraría o Alcalde? Por se acaso ímosllo recordar no pleno desta semana. Tampouco os veciños están dispostos a esquecer e, teñen anunciado concentracións cada venres.

Isto foi o venres, pero é que o sábado volvimos a coincidir con moitos deles na Coruña, na manifestación pola “Recuperación da Ría”.  Ao cabo tamén son ribeiráns e sinten a Ría o mesmo que as súas beirarrúas.

O da Ría “clama ao ceo” e, algúns dos que participaron nela son  para unha antoloxía das paradoxas. Ver como seccións do PP -benvidas sexan, por certo- reclaman a limpeza da Ría despois de botar desde “sempre” á fronte da Xunta sen mover…un Euro para amañala ou,  a algún Alcalde próximo re-convertido a ecoloxista despois de que a súa administración permitise vertidos continuados, que  aínda seguen hoxe, é para se poñer a reflexionar.  Pero, en fin, aínda tiñamos que ser moitos máis…

Hoxe é San Xoán. Despois de pasar polo necesario rito purificador do lume, de coller novos folgos e queimar o “vello”, é moito o traballo que nos espera.  Nesta mesma semana comisións informativas e Pleno, onde seremos a voz de moitas  das preocupacións dos nosos veciños e veciñas. Faremos o posíbel por conseguir solucións para a xente.

Ah¡, dos orzamentos de Cambre, nada aínda. Por se alguén o preguntaba. Estará o goberno ocupado coa organización da “lumeirada”? Falta lles facía -falta nos facía- que pasaran polo rito da purificación neste solsticio renovador¡

Xabier Iglesias

Nenos sen colexio, mulleres sen traballo.

Cambre, 20 de xuño de 2008.- Esta semana recibimos, no BNG de Cambre, un correo dunha veciña que nos encheu de desacougo.  O de sempre, xente que queda sen acceso aos servizos de benestar que, a maioría, pensamos que xa son univerais. E son sete os cativos na mesma situación.

Imaxinen, no Temple (Cambre), con dous colexios públicos na parroquia onde vive, un deles fronte a súa casa, non consigue aula para o seu fillo. A solución, decidida pola delegación provincial de educación e polo Concello é envialo a un colexio, da parroquia máis lonxana, a Brexo, que non ten horarios adaptados nin servizos de conciliación (almorzos e comedor), que lle permitan, á nai que nos escribe,  manter a súa actividade laboral. Tamén é mala sorte¡ Dos cinco colexios públicos de Cambre, mándannos ao único que non conta con estes servizos.

A estas alturas a ampliación do colexio que lles corresponde, o do Graxal, debería estar case acabando e, non comezou ainda. O Alcalde terá que explicar por que lle deu tantas voltas ás negociacións cos propietarios do tereeo, para acabar firmando un convenio urbanístico só beneficioso para eles. Por iso, por iniciativa do BNG, o Pleno de Cambre decidiu que non se edificará máis xunto ao colexio, que esas parcelas serán exclusivamente para uso público.

No día de hoxe, grazas ao esforzo realizado polo BNG na pasada lexislatura, en Cambre hai programas e servizos de conciliación para as familias, programas que axudan á igualdade real das mulleres. Froito deses investimentos, da negociación con outras institucións e da colaboración coas ANPAS, as nenas e nenos poden almorzar e xantar nos colexios. As familias téñenno un pouco mellor. Pero o problema son as prazas escolares, que non chegan. Curso tras curso hai que andar parcheando. Esíxese un esforzo de xestión, de imaxinación e de vontade. Polo que se ve, para este comezo de curso, no Graxal, non houbo nada diso.

No pleno da vindeira semana, o día 26, trataremos este asunto. Veremos que responde o actual responsábel municipal de educación.

Xabier Iglesias

Trampas co “urbanismo” .

Cambre, 18 de xuño de 2008.- Non hai mellor maneira de aplacar as críticas e os desencontros que meter aos discrepantes a compartir a xestión das cousas que critican. Máis ben,  facerlles crer que están a compartir a xestión. Na realidade trátase de lles facer perder o tempo con nimiedades e procedimentos, mentres os asuntos serios, as cousas que importan, van por outo lado.

Un exemplo: o Alcalde crea unha comisión informativa especial para a elaboración do PXOUM, só a reune cando desde a oposición nos poñemos “serios”. Cando a xunta, trae uns técnicos redactores a soltar rollos sen fin sobre legalismos e normativas. Cando se intenta ir ao concreto, ao grao, non pasamos de xeralidades e lugares comúns, e así…un ano despois (xa vai un ano), todo o que hai feito é o informe de impacto ambiental, por riba tivemos que corrixilo desde a oposición. Pois xa está ben¡

Pero, mentres, que ninguén se pense que o “urbanismo” está parado. O Alcalde se encarga de iniciar as tramitacións de planes sectoriais nos “solos aptos para urbanizar” pendentes. Separados da malla urbana, cun impacto medioambiental enorrme, cunhas propostas de densificación do territorio claramente inasumibeis polo crecemento de Cambre. E, o máis importante, sen nengún beneficio para os intereses xerais. Só contribuirá a densificar máis as estradas, a agravar os deficíts de prazas escolares e sanitarias e, a degradar máis o territorio.

Agardemos poder correxilo. Nós imos propoñelo.

Xabier Iglesias

Por un concello saudábel

Cambre, 17 de xuño de 2008.- Retomo as comunicacións cun dos asuntos que presentaremos ao Pleno Ordinario do vindeiro 26 de xuño. Trátase da proposta de creación do Consello Municipal de Deportes.

Onte fixemos pública esta iniciativa e, hoxe, ven recollida en varios medios de comunicación da comarca. Por iso, ao longo da mañá recibín varias chamadas de persoas vinculadas a actividade deportiva no noso concello. Mesmo dalgún empresario do sector. Agradezo sinceiramente estas comunicacións porque fixeron que centrara mellor a nosa proposta. Precisamente por que non formularon parabéns sen máis, senón porque querían saber exactamente en que consistía e porque expresaban as dúbidas sobre a viabilidade da idea. E non era por lles parecer mal a proposta, ao contrario, maís ben era porque consideraban como prioritario saber cal é o camiño que leva o Deporte en Cambre, cara onde imos.

Non podo máis que sintonizar con esa preocupación. Son consciente que o que se nos pide, máis aló dun modelo de xestión, dun organismo novo, é unha orientación das políticas deportivas. Que o que pensa e propón o BNG disto?

Porque, hoxe por xoxe, non se pode dicir que non exista promoción do deporte en Cambre, que si existe. Ou que non haxa infraestrutura deportiva, que tamén. Ou, mesmo, que non se apoien determinadas especialidades, que se fai.  O problema é que chegamos a un punto no que non se nota coerencia nas políticas deportivas, no que a inercia domina e as cousas se fan sen criterio. 

É necesario poñer en valor todo ese esforzo humano e económico e tirarlle máis rédito social. Necesitamos unha sociedade máis saudábel, para nós e para os nosos fillos, tamén para os nosos maiores e, un órganismo como o que propoñemos pode ser o instrumento adecuado.  Nel, podemos debatir, todas e todos os implicados o que e o como do deporte en Cambre. Podemos definir as liñas de actuación, podemos deseñar e perfilar os obxectivos, podemos opinar sobre a orientación e a xestión dos recursos.  Tamén, porque non, para que a práctica deportiva poda supoñer unha fonte de riqueza, ser o sustento dunha actividade económica importante.

Nesta liña irán as nosas argumentacións no debate político en Pleno. Agardo da receptividade do resto dos grupos e, sobre todo, que o goberno saiba aproveitar as boas ideas e poñelas en marcha. Neste, como en tantos outros temas, falta nos fai.

Xabier Iglesias

 Le a nota emitida polo BNG