Máis medidas reaccionarias

O PP vén de anunciar a eliminación do programa de gratuídade dos libros de texto, unha medida que introducía a mecánica de coidado dos libros e que beneficiaba a máis de 82.000 familias que a día de hoxe non saben que vai pasar. Tamén na educación, o PP aposta por recortar gasto social. Non é nada novo, pero non por iso menos grave.
Por certo, para atentar contra o idioma si que corren. Onte, o PP aprobaba no parlamento a eliminación do exame de galego das oposicións na administración e hoxe xa publicaba a modificación da Lei no DOG. Esa decisión ábrelles as portas aos opositores de fóra de Galiza. Supoño que a mocidade que votou PP nas eleccións ao Parlamento galego tomará nota de como traballa o PP para crear postos de traballo. Pero para os de fóra.

O mesmo trato para os gandeiros galegos

Onte centos de gandeiros pedíronlle á Xunta de Galiza e ao Ministerio de Madrid que lle poñan solucións á grave crise que está padecendo o sector agrario, do leite e da carne. Feijoo e o PP cansáronse de dicir que tiñan a solución. E xa se vai vendo cal é: volver a dar axudas, primar as explotacións para que abandonen o sector. A súa receita é eliminar o sector. E o Ministerio? Desde o Estado, milleiros de euros para os bancos, para as caixas, …milleiros de euros para a automoción,… Pois o BNG reclama o mesmo trato para o noso sector económico básico: axudas directas para o sector do leite. Os gandeiros galegos, a economía galega ten os mesmos dereitos.

Ataques ao idioma

Nestes tempos de crise, do único que se ocupa o PP e o sr. Feijoo é de poñer riba da mesa propostas de ataque contra o idioma. Nunha das últimas decisións, o PP elimina o galego para a superación das probas das oposicións. A mellor maneira de abrirlles as portas aos opositores do resto do Estado ás prazas da Xunta. Vénme á memoria o caso dunha amiga e veciña que acabou destinada en Cataluña despois de aprobar unha oposición da Seguridade Social. Ela ten que deixar Baralla e usar o catalán, como é lóxico, no seu traballo e mentres, o Sr. Feijoo e o PP dedícanse a abrirlles as portas aos de fóra do País para que se presenten as nosas oposicións.
Por certo, coincido co que dixo o noso Portavoz Nacional, Guillerme Vázquez, quen lle pedia a Feijoo que ademais de lles facer esa enquisa aos pais (e vailles preguntar tamén ás nais?) sobre o idioma no que queren escolarizar os seus fillos, que estenda, xa que logo, esa enquisa a avós, tíos, curmáns e demais familia.
Eu reclamo o meu dereito, como padriño de pía, a participar na pequena porcentaxe que me corresponda de elección do idioma no que se vai escolarizar a miña afillada. E espero contar co apoio da Igrexa nesta petición. Cae de caixón, non?

Mañá, pleno do Concello

O BNG DE BARALLA PÍDELLE AO CONCELLO QUE AXILICE O DESBROZAMENTO DAS PISTAS
Pregunta tamén polo proxecto de selamento do vertedoiro licitado polo bipartito
O BNG de Baralla vai defender mañá venres, ás 8 da tarde, no pleno da Corporación, unha iniciativa na que lle pide ao alcalde que axilice os traballos de limpeza e desbrozamento das pistas municipais e de accesos aos núcleos, e así mesmo, que se dirixa ao resto das administracións, para reclamar a limpeza mecánica dos viais e estradas da súa competencia. Nalgúns casos, os silveiros e herba “dificultan a visibilidade nos distintos viais e pistas do concello e, incluso nos cruzamentos pode provocar algún accidente”.
Os nacionalistas inciden en que as actuacións de desbrozamento e limpeza, necesarias todos os anos, aínda se fan máis imprescindíbeis este ano, como consecuencia dos temporais do pasado inverno.
Así mesmo, o BNG vaise interesar pola situación actual, co cambio de goberno na Xunta, do proxecto licitado polo bipartito de selamento do vertedoiro municipal de lixo. Becerra lembra que tivo que ser co BNG no goberno da Xunta cando se puxese en marcha o pechamento do vertedoiro e por iso reclama agora información. O nacionalista incide en que “quéremos saber se o PP vai facer as obras previstas para pechar o vertedoiro ou tamén as vai paralizar”.
O BNG tamén vai presentar unha proposta para que o alcalde asuma encargarlle prioritariamente as obras e os servizos e a compra de material en empresas, comercios e autónomos de Baralla. O voceiro nacionalista fai fincapé en que “son os que pagan os impostos en Baralla e o concello debe pensar neles prioritariamente”. Para o BNG esa actuación permite fortalecer o tecido económico local e manter os postos de traballo.

A nosa lingua, a nosa identidade

Este domingo, milleiros de persoas dixémoslle ao PP e a Feijoo que queremos vivir na nosa lingua. Que non imos dar un paso atrás na defensa do noso idioma. A identidade dun país non depende duns resultados electorais e a administración pública , sexa a que sexa, ten a obriga de defender a nosa personalidade lingüística. Pero o PP quere usarnos de laboratorio. Segregar os nosos rapaces e rapazas en distintas clases: esa é a súa proposta.
Se pensabades que os tempos do apartheid remataran, estabades equivocados. Xa está o PP para promovelo.

Orzamentos perdedores

Todos sabemos que con case 1.600.000 euros de orzamento- con máis de 266 millóns de ptas-, que se poderían facer moitas cousas por Baralla. Pero claro, fai falla rigor e control no gasto e confianza no futuro do concello, e iso é algo que o alcalde non ten. O orzamento que aprobou en pleno o PP para o ano 2009 supón un descenso con relación ao ano 2008 de máis do 11 %. O diñeiro destinado a obras baixa máis dun 57 %, máis de 292.000 €, pola súa falta de traballo, de control do gasto e pola súa mala xestión. A obra estrela, volve ser a “ampliación do cemiterio”. Esa, precisamente, é a visión de futuro que o Sr. Capón lle dá ao concello. E o que necesita Baralla é máis vida e saídas laborais para a nosa mocidade.Non se inclúe nin un euro para o polígono industrial, nin para o Centro de Día, nin para a galescola, nin para as traídas de auga, nin para saneamentos, nin se aposta por un plan anual de conservación de pistas.

Negocios cun condenado por apropiación indebida

Como vos contaba hai uns días, o alcalde eo PP, aprobaron asinar un convenio coa fundación-empresa San Rosendo, que preside Benigno Moure, para facerlles con cartos de todos os veciños, unha boa parte das obra da residencia privada. Finalmente, o Tribunal Supremo condenouno por apropiarse de máis de 500.000 € dunha anciá ingresada nunha das súas residencias. Esa é a xente a quen o Sr. Capón e o PP lle vai regalar o diñeiro para facer as súas obras.

Se queres ver a sentenza pica enTribunal Supremoh
Tipo órgano: Tribunal Supremo. Sala de lo Penal Municipio: Madrid — Sección: 1 Ponente: JULIAN ARTEMIO SANCHEZ MELGAR Nº Recurso: 1317/2008 — Fecha resolución: 14/04/2009 Tipo resolución: Sentencia Resumen: * Delito continuado de apropiación indebida. Conceptuación como delito de estafa continuad…

Obras con sentidiño

Sentidiño. Rigor e control, deben ser os criterios cos que se deben planificar e realizar as obras. Pero xa sabemos que é moito pedirllle a este alcalde. Agora que se están executando as obras financiadas polo Fondo de Investimento Local, falta faría, por exemplo, sentidiño para canalizar a auga nos accesos, por exemplo, de Pol, para evitar que lles entre a auga nas casas. Rigor e control, para evitar, por exemplo, danos e gretas na igrexa. En definitiva, sentido común.

Residencia para ricos

Nada sorprendente. Onte, o sr. alcalde e o PP apostaron por darlle cartos públicos a empresa San Rosendo para facer en Baralla unha residencia que os nosos xubilados non van poder pagar. Ou hai algún que cobre 1300 euros ao mes? Por certo, xa son curiosas as présas que lles entraron para asinar o convenio. O caso é que San Rosendo está facendo un negocio redondo. Non tivo que pagar os terreos, ten os cimentos da obra xa construídos e outra boa parte ímoslla pagar todos cos nosos impostos. Así fai obras calquera. E as empresas e empresarios de Baralla, mentres, sen axudas e o concello sen polígono. Para San Rosendo, saneamento e traída de auga a conta dos nosos cartos, e moitas das nosas aldeas sen auga e sen saneamento. Ben se ve en quen pensa este alcalde. No negocio privado.

Consulta o BOE do 2006 no que se publicaba o orzamento do centro de día de Baralla

Ver máis prensa

Residencia privada

Hoxe temos pleno extraordinario, no que o alcalde leva a votación o convenio coa empresa-fundación San Rosendo para a construción dunha residencia da terceira idade. O alcalde vaille “regalar” a esta empresa-fundación privada as obras de accesos, traída de auga, saneamento, peches, portas de entrada, aparcadoiro e rede eléctrica. Si, o mesmo alcalde que rexeitou destinar diñeiro dos orzamentos do Concello para a construción dun centro de día con prazas de residencia, vaille pagar as obras de urbanización a San Rosendo. Si, esa empresa-fundación que xestiona hoteis de catro estrelas. Esa empresa-fundación que ten un presidente condenado pola audiencia provincial de Ourense por suposta apropiación indebida (El Correo Gallego dixit). Un proxecto de residencia que non contempla un centro de día, porque iso non dá cartos. E cantos veciños e veciñas de Baralla van poder pagar os máis de 1300 € ao mes que custa cada praza das residencias privadas de San Rosendo? Pero xa sabemos que “o negocio chama negocio”.