A nosa lingua, a nosa identidade

Este domingo, milleiros de persoas dixémoslle ao PP e a Feijoo que queremos vivir na nosa lingua. Que non imos dar un paso atrás na defensa do noso idioma. A identidade dun país non depende duns resultados electorais e a administración pública , sexa a que sexa, ten a obriga de defender a nosa personalidade lingüística. Pero o PP quere usarnos de laboratorio. Segregar os nosos rapaces e rapazas en distintas clases: esa é a súa proposta.
Se pensabades que os tempos do apartheid remataran, estabades equivocados. Xa está o PP para promovelo.

Orzamentos perdedores

Todos sabemos que con case 1.600.000 euros de orzamento- con máis de 266 millóns de ptas-, que se poderían facer moitas cousas por Baralla. Pero claro, fai falla rigor e control no gasto e confianza no futuro do concello, e iso é algo que o alcalde non ten. O orzamento que aprobou en pleno o PP para o ano 2009 supón un descenso con relación ao ano 2008 de máis do 11 %. O diñeiro destinado a obras baixa máis dun 57 %, máis de 292.000 €, pola súa falta de traballo, de control do gasto e pola súa mala xestión. A obra estrela, volve ser a “ampliación do cemiterio”. Esa, precisamente, é a visión de futuro que o Sr. Capón lle dá ao concello. E o que necesita Baralla é máis vida e saídas laborais para a nosa mocidade.Non se inclúe nin un euro para o polígono industrial, nin para o Centro de Día, nin para a galescola, nin para as traídas de auga, nin para saneamentos, nin se aposta por un plan anual de conservación de pistas.

Residencia privada

Hoxe temos pleno extraordinario, no que o alcalde leva a votación o convenio coa empresa-fundación San Rosendo para a construción dunha residencia da terceira idade. O alcalde vaille “regalar” a esta empresa-fundación privada as obras de accesos, traída de auga, saneamento, peches, portas de entrada, aparcadoiro e rede eléctrica. Si, o mesmo alcalde que rexeitou destinar diñeiro dos orzamentos do Concello para a construción dun centro de día con prazas de residencia, vaille pagar as obras de urbanización a San Rosendo. Si, esa empresa-fundación que xestiona hoteis de catro estrelas. Esa empresa-fundación que ten un presidente condenado pola audiencia provincial de Ourense por suposta apropiación indebida (El Correo Gallego dixit). Un proxecto de residencia que non contempla un centro de día, porque iso non dá cartos. E cantos veciños e veciñas de Baralla van poder pagar os máis de 1300 € ao mes que custa cada praza das residencias privadas de San Rosendo? Pero xa sabemos que “o negocio chama negocio”.

Ampliar os servizos sociais

Todos coñecemos casos de persoas, de veciños nosos que precisarían que o Concello lles asignase o servizo de axuda a domicilio. Por certo, unha actuación para a que o Concello vai recibir este ano da Vicepresidencia da Igualdade, preto de 88.000 € para cubrir os gastos de axuda no fogar para dependentes e para os servizos sociais de atención primaria. Esa é a aposta do BNG: intentar manter os maiores preto dos seus veciños e familia. E por iso aumentamos o financiamento da axuda no fogar nos concellos, puxemos en marcha o programa xantar na casa, e agora o servizo de transporte adaptado 065.
Falta por ver que vai facer o PP con esas alternativas. Os anuncios de Feijoo non lles dan moita vida. E a actitude do noso alcalde xa quedou clara coa nosa proposta para crear o Centro de Día. Dicía que non había terreos. El por suposto, aposta máis polas residencias privadas, polo negocio privado. Por algo está no PP.

Hoxe temos pleno

Hoxe, ás 8 temos pleno ordinario do Concello. Outra vez máis, é o BNG que concentra as propostas do pleno. Levamos unha iniciativa para reclamar o amaño das escolas rurais de Baralla, que despois de máis de 20 anos de alcaldía do sr. Capón seguen con problemas de humidade, con cristais rotos, sen subministración de auga e sen servizos, como é o caso das da Condomiña, Sudrio, Vilartelín ou Aranza.
Ademais, entre outras cuestións, imos preguntar pola redacción do proxecto de Plan Xeral de Ordenación Urbana e reclamar a limpeza de pistas e camiños municipais que quedaron atrancadas por causa dos temporais deste inverno.
Tamén no interese polos plenos se demostra a apatía do alcalde polo concello. Demostrado está que só lle interesa manter a súa situación persoal.

Este é, por exemplo, o estado da escola da Condomiña

Consulta a mocion sobre amaño das escolas

Pleno para mañá

É o BNG quen introduce no pleno propostas sobre as necesidades dos veciños e veciñas de Baralla. O BNG vaille propoñer ao alcalde que reserve dúas partidas económicas dentro dos orzamentos do ano 2009 para facerse cos terreos ou co edificio precisos para construción do Centro de Día de Baralla e para poñer en marcha o polígono industrial na parte que lle corresponde ao concello. Para Baralla é clave crear emprego para que a nosa mocidade se quede aquí e por iso é urxente desenvolver o solo industrial. E así mesmo, que os nosos maiores poidan contar nun futuro próximo cun centro de atención integral como o Centro de Día. Dúas actuacións para crear emprego, asentar poboación e parar así a caída de poboación do concello. Este alcalde xa ten a triste marca de ser quen levou ao concello a baixar no seu día dos catro mil habitantes e agora xa dos 3.000.Un dato que marca un punto de inflexión para o futuro do concello, unha situación para a que é preciso poñer en marcha medidas de fondo e de investimento produtivo como as que puxo en marcha o BNG desde as distintas consellarías da Xunta, pero que precisan tamén da combinación da actuación dos gobernos municipais. E no caso de Baralla, esa acción municipal non existe. E por iso, as propostas do PP son as de asumir a defensa do alcalde nos seus xuízos.

• Orde do día do Pleno
• Mocion orzamentos 2009
  

Pleno do Concello 20:00 h

A estrada Baralla-O Cádavo

• Clica para ver partidas nos orzamentos

Nos orzamentos da Xunta para o ano 2009, xa aparece a primeira partida para a mellora da estrada Baralla-O Cádavo, neste caso para o proxecto e as expropiacións necesarias. Imos estar tamén atentos para informar os veciños e para que o proxecto respecte o máis posíble o valor ambiental e turístico da zona. Nese sentido, no seu día, xa levamos a pleno unha iniciativa para solicitarlle a Política Territorial incluíse a construción dun paseo fluvial-peonil na marxe esquerda dirección Baleira, entre Baralla e Neira de Rei. A zona méreceo.

• Orzamentos Xunta 2009

A máis de dous “pedáneos” por parroquia

Contaba hai uns días o xantar particular que organizou o alcalde polo San Vitorio. Ese que pagamos todos. Este venres pregunteille por el no Pleno, polo número de persoas que asistiron, polo custo e polos criterios do convite. O subsconciente xa o levou a respondernos que “lo voy a pagar yo”. Si, vostede vai asinar o pago, pero cos cartos de todos. Como sospeitaba o gasto supera os 3000 euros.Tamén me dixo que foran 153 persoas, despois de sumar empregados do Concello, parte da Corporación (nós non asistimos), Garda Civil, Xuíz de Paz e pedáneos (cos seus respectivos acompañantes). Pero claro non saen as contas. Porque gardas civís sabemos todos cantos hai e parroquias temos 30. Polo visto, ten máis de dous “pedáneos” por parroquia.

E as subvencións?

A pouco de rematar o ano, nada se sabe da convocatoria municipal de subvencións que estabelce a ordenanza en vigor. Nada se sabe das axudas que agradecerían as asociacións culturais, de mulleres, de veciños, os clubes deportivos que temos no concello. Nada se sabe, porque esa é a táctica deste alcalde.
Nós imos presentar unha iniciativa no próximo pleno para reclamar que abra esa convocatoria. Queremos transparencia e apoio ao traballo das asociacións e á vontade dos nosos deportistas.

Mocion BNG subvencións

Ordenanza reguladora de subvencións do Concello de Baralla