Máis medidas reaccionarias

O PP vén de anunciar a eliminación do programa de gratuídade dos libros de texto, unha medida que introducía a mecánica de coidado dos libros e que beneficiaba a máis de 82.000 familias que a día de hoxe non saben que vai pasar. Tamén na educación, o PP aposta por recortar gasto social. Non é nada novo, pero non por iso menos grave.
Por certo, para atentar contra o idioma si que corren. Onte, o PP aprobaba no parlamento a eliminación do exame de galego das oposicións na administración e hoxe xa publicaba a modificación da Lei no DOG. Esa decisión ábrelles as portas aos opositores de fóra de Galiza. Supoño que a mocidade que votou PP nas eleccións ao Parlamento galego tomará nota de como traballa o PP para crear postos de traballo. Pero para os de fóra.

Mañá, pleno do Concello

O BNG DE BARALLA PÍDELLE AO CONCELLO QUE AXILICE O DESBROZAMENTO DAS PISTAS
Pregunta tamén polo proxecto de selamento do vertedoiro licitado polo bipartito
O BNG de Baralla vai defender mañá venres, ás 8 da tarde, no pleno da Corporación, unha iniciativa na que lle pide ao alcalde que axilice os traballos de limpeza e desbrozamento das pistas municipais e de accesos aos núcleos, e así mesmo, que se dirixa ao resto das administracións, para reclamar a limpeza mecánica dos viais e estradas da súa competencia. Nalgúns casos, os silveiros e herba “dificultan a visibilidade nos distintos viais e pistas do concello e, incluso nos cruzamentos pode provocar algún accidente”.
Os nacionalistas inciden en que as actuacións de desbrozamento e limpeza, necesarias todos os anos, aínda se fan máis imprescindíbeis este ano, como consecuencia dos temporais do pasado inverno.
Así mesmo, o BNG vaise interesar pola situación actual, co cambio de goberno na Xunta, do proxecto licitado polo bipartito de selamento do vertedoiro municipal de lixo. Becerra lembra que tivo que ser co BNG no goberno da Xunta cando se puxese en marcha o pechamento do vertedoiro e por iso reclama agora información. O nacionalista incide en que “quéremos saber se o PP vai facer as obras previstas para pechar o vertedoiro ou tamén as vai paralizar”.
O BNG tamén vai presentar unha proposta para que o alcalde asuma encargarlle prioritariamente as obras e os servizos e a compra de material en empresas, comercios e autónomos de Baralla. O voceiro nacionalista fai fincapé en que “son os que pagan os impostos en Baralla e o concello debe pensar neles prioritariamente”. Para o BNG esa actuación permite fortalecer o tecido económico local e manter os postos de traballo.

Obras con sentidiño

Sentidiño. Rigor e control, deben ser os criterios cos que se deben planificar e realizar as obras. Pero xa sabemos que é moito pedirllle a este alcalde. Agora que se están executando as obras financiadas polo Fondo de Investimento Local, falta faría, por exemplo, sentidiño para canalizar a auga nos accesos, por exemplo, de Pol, para evitar que lles entre a auga nas casas. Rigor e control, para evitar, por exemplo, danos e gretas na igrexa. En definitiva, sentido común.

Residencia para ricos

Nada sorprendente. Onte, o sr. alcalde e o PP apostaron por darlle cartos públicos a empresa San Rosendo para facer en Baralla unha residencia que os nosos xubilados non van poder pagar. Ou hai algún que cobre 1300 euros ao mes? Por certo, xa son curiosas as présas que lles entraron para asinar o convenio. O caso é que San Rosendo está facendo un negocio redondo. Non tivo que pagar os terreos, ten os cimentos da obra xa construídos e outra boa parte ímoslla pagar todos cos nosos impostos. Así fai obras calquera. E as empresas e empresarios de Baralla, mentres, sen axudas e o concello sen polígono. Para San Rosendo, saneamento e traída de auga a conta dos nosos cartos, e moitas das nosas aldeas sen auga e sen saneamento. Ben se ve en quen pensa este alcalde. No negocio privado.

Consulta o BOE do 2006 no que se publicaba o orzamento do centro de día de Baralla

Ver máis prensa

Pleno para mañá

É o BNG quen introduce no pleno propostas sobre as necesidades dos veciños e veciñas de Baralla. O BNG vaille propoñer ao alcalde que reserve dúas partidas económicas dentro dos orzamentos do ano 2009 para facerse cos terreos ou co edificio precisos para construción do Centro de Día de Baralla e para poñer en marcha o polígono industrial na parte que lle corresponde ao concello. Para Baralla é clave crear emprego para que a nosa mocidade se quede aquí e por iso é urxente desenvolver o solo industrial. E así mesmo, que os nosos maiores poidan contar nun futuro próximo cun centro de atención integral como o Centro de Día. Dúas actuacións para crear emprego, asentar poboación e parar así a caída de poboación do concello. Este alcalde xa ten a triste marca de ser quen levou ao concello a baixar no seu día dos catro mil habitantes e agora xa dos 3.000.Un dato que marca un punto de inflexión para o futuro do concello, unha situación para a que é preciso poñer en marcha medidas de fondo e de investimento produtivo como as que puxo en marcha o BNG desde as distintas consellarías da Xunta, pero que precisan tamén da combinación da actuación dos gobernos municipais. E no caso de Baralla, esa acción municipal non existe. E por iso, as propostas do PP son as de asumir a defensa do alcalde nos seus xuízos.

• Orde do día do Pleno
• Mocion orzamentos 2009
  

O temporal e un alcalde incapaz

Nin unha soa medida de urxencia adoptou o Sr. Capón para mitigar os efectos do temporal de vento dos pasados días que provocou a caída árbores, paus do tendido eléctrico e de cableado eléctrico e como consecuencia a interrupción da subministración.Todos sabemos que a responsabilidade da falta de subministración eléctrica é da empresa subministradora FENOSA, pero este alcalde dedicouse atender aos seus negocios persoais no canto de se ocupar dos problemas dos seus veciños. Non fixo nada para reducir as consecuencias do temporal.
Dada a situación e a experiencia vivida no anterior temporal de neve, por que non alugou xeradores de gran potencia para cubrir puntualmente as zonas que volveron quedar sen subministración, para evitar novas perdas en explotacións agrícolas, bares e restaurantes, empresas e vivendas particulares, nunha época na que se acumula a matanza, ou os problemas de enfermos e xente maior? Por incapacidade e por pasotismo.
E as brigadas do concello? Por que non apareceron para solucionar problemas puntuais de caídas de árbores e incluso para tratar de localizar as zonas de avarías eléctricas nas liñas de baixa tensión co obxectivo de trasladarlle esa información a FENOSA e ás súas subcontratas e poder acelerar así a reparación dos cortes?
Todos sabemos onde estaban, verdade?

O BNG de Baralla pídelle ao Concello que presione máis a FENOSA

Máis do mesmo

En días coma o de onte é cando se precisa rigor e dedicación. En días coma o de onte é cando un alcalde ten que asumir a situación e as necesidades dos veciños. Pero este alcalde que temos vive no descanso continuo. Vivendas sen luz, sen auga, árbores caídas que impedían o paso… Si, moitas viaxes nos vehículos “oficiais” do Concello, pero poucas solucións. Nin sequera un pouco sal para permitir o paso de persoas e vehículos. Nin sequera un pouco sal para poder camiñar polas beirarrúas da propia vila, na que acudir ao Centro Médico ou a un banco era toda unha aventura de equilibrio. Nada novo neste alcalde do PP: abandono e desinterese.

O BNG denuncia que os veciños tiveron que retirar árbores da estrada de Baralla a Láncara

Veciños de Sudrio na TVG /// Máis reportaxes na TVG

Solo industrial e Centro de Día: obras para o Fondo estatal

Nós teriamos claro que unha parte dos 536.982 € do Fondo estatal de investimento local debe servir para poñer en marcha o solo industrial de Baralla e o Centro de Día. Serían as actuacións máis acaídas aos obxectivos do plan: crear emprego. Dedicar o diñeiro a actuacións que afecten a todos os veciños é a mellor maneira de investilos, porque todos queremos que a nosa mocidade se quede a traballar no noso concello e que os nosos maiores teñan un centro de atención. Ademais serían obras que poderían facer empresas do concello que contratarían xente do concello. Mellorar os servizos públicos, desenvolver obras e actuacións para apoiar os nosos sectores económicos básicos e estender e ampliar a rede de servizos sociais, é a mellor arma de cubrir as necesidades dos que máis o necesitan en épocas de crise como a que vivimos.
A proposta está riba da mesa. Agardemos que o alcalde a acepte.

Ver nota de prensa

O Bloque suxire dedicar o diñeiro do fondo estatal a un centro de día e ao polígono

• Importes do Fondo por concellos