Entradas etiquetadas ‘mercados’

Xullo 2nd, 2010

Vagar para escribir

Uf, levo non sei cantos días sen escribir unhas letras neste caderno. Non sei que dicir no meu descargo. A verdade é que estes días non parei, de aquí para alí, fixen unha chea de cousas, moito activismo político e moito contacto coa sociedade, e iso non sempre che deixa marxe para porte a escribir. Desculpas mil! En todo caso, fun algo máis dilixente no Facebook e no Twitter, que xa sei eu que son de consumo máis rápido, pero que tamén teñen a súa utilidade comunicativa, ou cando menos iso espero.

A verdade é que estes días foron frenéticos. Teño a sensación de que o ritmo de aceleración da Historia, e non me quixera poñer pomposo, é hoxe moito maior que en calquer tempo pasado. Vai todo rapidísimo e un evento solápase sobre o outro a unha velocidade tal que moitas veces non hai tempo a reflexionar con acougo non sobre o que sucede na superficie, senón sobre os fenómenos subxacentes, o que hai detrás do que vemos.

Xa que me poño, quixera non perder a oportunidade de abordar sumariamente tres temas:

1. A sentenza do Tribunal Constitucional sobre o Estatut.

A verdade é que non me surprendeu grandemente. Véxoa plenamente congruente coa recentralización en marcha no Estado. Un Estado que se nega a suprimir Ministerios que invaden competencias autonómicas. Un Estado que promove unha lexislación básica para a privatización das caixas de aforro e a súa desterritorialización. Ese Estado está claro que non vai tolerar o máis mínimo avanzo cualitativo cara ao autogoberno das nacións sen Estado.

2. Os insaciábeis mercados.

Leo a noticia de que os insaciábeis mercados (en concreto, unha axencia de cualificación, desas que non tiveron reparos en cualificar coa máxima nota as hipotecas sub-prime) teñen na cabeza rebaixar a puntuación á débeda española. Paréceme un escándalo que poda estar en mas privadas (as axencias de cualificación son empresas privadas de capital norteamericano) a cualificación da débeda pública de Estados soberanos. Cada vez que unha desas axencias baixa a puntuación, o erario público ten que pagar máis cara a débeda. Ou sexa, ten que incrementar a transferencia da renda desde os contribuíntes (que na inmensa maioría somos traballadoras e traballadores) aos prestamistas (que son a grande banca internacional).

Isto así non vai. Isto hai que cambialo e canto antes.

3. As declaracións de Feijóo sobre o voto emigrante.

O presidente do Goberno galego nen máis nen menos que pediu onte aos emigrantes que se empadronasen en concellos galegos para votaren, xa que agora non o van poder facer nas municipais.

Mais iso é claramente unha fraude de lei: hai que acreditar unha residencia de cando menos seis meses nun concello para empadronarte.

Que lle pasa a Feijóo? Creo que o traizou o subconsciente. Creo que o PP está bastante nervoso e que ve que, se nas próximas municipais non poden votar os residentes ausentes, se lle poden ir das mans non poucas Alcaldías no noso País.

Xuño 11th, 2010

Quen elixiu os mercados? A quen representan?

Estes días veño utilizando un termo que considero non só útil, senón modernísimo, se por modernísimo entendemos o que é actual, o que lle convén ao momento que vivimos.

O termo é Rebelión. E contrápoñoo a unha alternativa que por suposto non considero nen útil nen modernísima: a sumisión. Non é útil para as maiorías sociais e desde logo non é moderna, é máis ben un termo que, de seguilo, nos levaría de volta ás condicións de vida do século XIX, cando moitas das conquistas das que agora desfrutamos (e que nos queren arrebatar) aínda non foran nen imaxinadas.

Vivimos momentos moi convulsos, mais tamén vivimos momentos apaixonantes para aqueles que estamos na vida pública co obxectivo de mellorar as cousas para a nosa nación, Galiza, e tamén, por que non dicilo, para cambiar o mundo.

Temos por diante unha crise económica, certo, pero tamén unha crise da democracia. Unha crise que consiste en que por vez primeira en décadas a xente pode ver con claridade como os poderes políticos son simples apéndices dos poderes económicos. Cando un gobernante di que ten que recortar salarios e conxelar pensións ou abaratar o despedimento porque llelo están pedindo os mercados, en que lugar fica a democracia? Quen elixiu os mercados? Que lles deu o poder que teñen? A quen representan?

Non podemos aceptar mansamente este mundo. O BNG, desde logo, non o acepta. E traballará duro para que a política volva a representar á xente e non aos especuladores.